مەملەكەت باسشىسى قاراعاندى فارماتسەۆتيكا زاۋىتى شىعارعان «سپۋتنيك-V» ۆاكتسيناسىن سالدىردى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Facebook-تە مالىمدەدى.

«بۇگىن مەملەكەت باسشىسى قاراعاندى فارماتسەۆتيكا زاۋىتى شىعارعان «سپۋتنيك-V» ۆاكتسيناسىن سالدىردى. پرەزيدەنتتىڭ ۆاكتسينا سالدىرعاننان كەيىنگى حال-جاعدايى جاقسى. ەشقانداي جاناما اسەرلەر جوق»، - دەپ جازدى.

ءباسپاسوز حاتشىسىنىڭ ايتۋىنشا، مەملەكەت باسشىسى ۆاكتسينا سالدىرىپ، ۇجىمدىق يممۋنيتەت قالىپتاستىرۋ ارقىلى عانا قازاقستان ازاماتتارى كوروناۆيرۋستى جەڭە الاتىنىنا، بارلىق شەكتەۋلەر الىناتىنىنا، حالىقتىڭ قالىپتى تۇرمىس-تىرشىلىگىنە قايتا ورالاتىنىنا سەنىمدى.

«قاسىم-جومارت توقاەۆ بارشا حالىقتى مەيلىنشە تەزىرەك ۆاكتسينا سالدىرۋعا شاقىردى. بۇل – ءوزىڭدى جانە جاقىنىڭدى قورعاۋدىڭ جالعىز جولى»، - دەدى ءۋالي.

2021 جىلدىڭ قاڭتارىندا پرەزيدەنت كوروناۆيرۋسقا قارسى قازاقستاندىق ۆاكتسينا ءساتتى سىناقتان وتكەن جاعدايدا ەكپە سالىدارتىنىن ايتقان.

«وتاندىق ۆاكتسينانى تەستىلەۋدىڭ وڭ ناتيجەسىنەن ءۇمىتتىمىز. ەگەر جاقسى ناتيجە بولسا، مەن قازاقستاندىق ۆاكتسينانى سالدىرامىن»، - دەدى توقاەۆ 26 قاڭتاردا وتكەن ۇكىمەتتىڭ كەڭەيتىلگەن وتىرىسىندا.

ايتا كەتەيىك، 2020 جىلدىڭ جەلتوقسانىندا قاراعاندى فارماتسەۆتيكا كەشەنىندە رەسەيلىك «سپۋتنيك V» ۆاكتسيناسىن ءوندىرۋ باستالدى. باستاپقىدا زاۋىتتا 2 ميلليون دوزا ءوندىرۋ جوسپارلانعان بولاتىن. اقپاندا ۇكىمەت قازاقستاندا «سپۋتنيك V» ۆاكتسيناسىن وندىرۋگە 15 ميلليارد تەڭگە ءبولدى.

Abai.kz