ەندى ءبىر ايدان كەيىن 9-مامىر قارساڭىندا ەلىمىزدە «بەسسمەرتنىي پولك» دەگەن شاباش تاعى باستالۋى مۇمكىن. بۇل اكتسيا ۇلىدەرجاۆالىق شوۆينيزم مەن يمپەريالىق استامشىلىقتى قوزدىراتىن رەسەيلىك پسيحوز. بىلتىر ول رەسەيدە ونلاين رەجيمدە وتكەن. بىزدە كوۆيد-19 سالدارىنان وتكىزىلمەي قالىپ ەدى. بيىل سانەپيد جاعداي قالاي بولارىن قازىرگە بىلمەيمىز. بىراق قالاي بولعاندا دا رەسەيلىك «بەسسمەرتنىي پولك» اكتسياسىنا توسقاۋىل قويىلۋى قاجەت.

ءارى 9-مامىر ءبىز ءۇشىن جەڭىس كۇنى ەمەس، ەكىنشى جاھان سوعىسى قۇرباندارىن ەسكە الۋ كۇنى. ونىڭ مارتەبەسىن دە وسىلاي وزگەرتۋ كۇن تارتىبىندە تۇر. ويتكەنى ءبىز «جەڭىس كۇنىنە» ىلەسە ميلليونداعان مۇگەدەكتەردى «قالالاردىڭ كوركىن بۇزادى» دەگەن جەلەۋمەن كوشەلەردەن تەرىپ اكەتىپ، ۆالاام پانسيوناتتارى ءتارىزدى لاگەرلەرگە توعىتىپ، سوندا ادام سياقتى كۇتىم كورمەستەن، قىناداي قىرىلعان جاعدايلارىن ۇمىتقان جوقپىز.

مايدانگەرلەردى ەسكە الامىز دەگەن جەلەۋمەن سوۆەت-گەرمان سوعىسىندا قازا تاپقان اتا-بابالارىنىڭ سۋرەتىن توبەسىنە كوتەرىپ شەرۋ وتكىزۋ قازاق ءۇشىن تاپقىرلىق ەمەس. ءبىز مۇسىلمان حالىقپىز. توبەسىنە سۋرەتىن كوتەرمەك تۇگىلى بەيىتىنىڭ باسىنا سۋرەت سالۋعا تىيىم سالىنعان. شاريعات جولى بويىنشا سۋرەتتەردى توبەگە كوتەرىپ قۇرمەتتەۋ بۇل – سۋرەتكە تابىنۋ. ال دىنىمىزدە اللادان باسقاعا تابىنۋشىلىقتى شيرك دەيدى. بىزگە ەڭ كەرەگى – مايداندا قازا تاپقان، سوعىستا العان جاراقاتتارىنان كەيىن قايتىس بولعان كۇللى مايدانگەرلەرگە، اكەلەرىمىز بەن اتالارىمىزعا باعىشتالىپ قۇران وقىلۋى. «ءولى رازى بولماي، ءتىرى بايىمايدى» دەگەنىمىز سول.

ۇستىمىزدەگى جىلعى 18-ناۋىزدا رەسەي پرەزيدەنتى ۆ.ءپۋتيننىڭ كەيبىر وداقتاس رەسپۋبليكالارعا «كەتىپ قالعان جەرى» تۋرالى اتىشۋلى مالىمدەمەسى «بەسسمەرتنىي پولك» اكتسيالارىن تمد ەلدەرىندە ۇيىمداستىرۋشىلارعا «جاڭا لەپ» بەرگەنى داۋسىز. قازاقستانداعى سەپاراتيستىك پيعىلداعىلار قالعىپ وتىرماعانى تاعى انىق. بۇرىنعى اسكەري قىزمەتكەر قۋات احمەتوۆتىڭ ايتۋىنا قاراعاندا «بەسسمەرتنىي پولك» اكتسياسىن بەلسەندى تۇردە ۇيىمداستىرۋشىلاردىڭ ءبىرى الماتى قالاسىنداعى اۋعان سوعىسى ارداگەرلەرى مەن مۇگەدەكتەرى ۇيىمدارى ۇيلەستىرۋ كەڭەسىنىڭ توراعاسى مۇرات ابدىشۇكىروۆ دەگەن بىرەۋ كورىنەدى. 2019 جىلى الگى وسى اكتسيامەن 150 مىڭ ادام شىعارامىن دەپ وزەۋرەگەنى، ارتىنان 130 مىڭ ادام شىعاردىم دەگەنى دە ەستە. جالپى اۋعان سوعىسى ارداگەرلەرى ۇيىمدارى «بەسسمەرتنىي پولككە» بايلانىستى ءوز ۇستانىمدارىن اشىقتان اشىق جاريالايتىن كەزى كەلدى. حالىق كىمنىڭ كىم ەكەنىن ءبىلۋى كەرەك. سونداي-اق قازاقستان مۇسىلماندارى ءدىني باسقارماسىنىڭ دا مۇنداي اكتسيانى قۇپتامايتىنى انىق.

ال رەسمي ورىندار كەشەگى سسسر-ءدىڭ يمپەريالىق استامشىلىعىن تۋ ەتكەن «بەسسمەرتنىي پولك» سياقتى اكتسيالاردى توقتاتاتىن شارالاردى جەدەل قولعا العانى ءجون!

مارات ءبايدىلداۇلىنىڭ جازباسى

Abai.kz