ۇلتتىق بانك توراعاسى ەربولات دوساەۆ بۇگىن «باسپانا حيت» باعدارلاماسىنا بولىنەتىن قارجىنى 600 ميلليارد تەڭگەگە دەيىن ءوسىرىپ، ونى جىل سوڭىنا دەيىن يگەرۋدى جوسپارلاپ وتىرعانىن جەتكىزدى. بۇل تۋرالى «اراشا» سايتى جازدى.

قازاقستاندا ءۇش اي بۇرىن باسپانا باعاسى قىمباتتادى. بىراق، ۇكىمەتتەگىلەر ءتيىمدى تۇردە ءۇي الۋعا بولاتىن 7-20-25, نۇرلى جەر، باسپانا حيت سەكىلدى باعدارلامالاردى جالعاستىرا بەرەتىنىن ايتادى. بۇل تۋرالى «ينفورمبيۋرو» باعدارلاماسىندا ايتىلدى.

«مامىر مەن ماۋسىم ايلارىندا باسپانا قۇنى ءبىر رەتكە كەلەدى» دەگەن ساراپشىلاردىڭ دا بولجامى ورىندالماۋى مۇمكىن. ويتكەنى قازىر قۇرىلىس ماتەريالدارى قىمباتتاپ كەتكەن.

جىل باسىنان بەرى زەينەتاقى قورىنان اقشاسىن الۋعا 210 مىڭ قازاقستاندىق ءوتىنىش بەرىپتى. ولارعا 1 تريلليون تەڭگەدەن استام اقشا ءبولىنىپ قويعان. ول اقشانىڭ 99,4 پروتسەنتى ءۇي ساتىپ الۋعا نەمەسە يپوتەكانى جابۋعا جۇمسالعان. ءۇش اي بۇرىن باسپانانىڭ قىمباتتاپ كەتكەنى دە سودان. يپوتەكالىق تۇرعىن ءۇي زايمدارىن قايتا قارجىلاندىراتىن كومپانيانىڭ مامانى ايبار ولجاەۆ «ەندى ەكىنشى نارىقتاعى ۇيلەر دە، جاڭا باسپانالار دا ارزاندامايدى» دەيدى ۇلتتىق بانك توراعاسى ەربولات دوساەۆ.

ساراپشىلار باسپانا باعاسىنىڭ قىمباتتاي تۇسەتىنىنە سەنىمدى.

«ءدال قازىر ءۇي باعاسى تۇسەدى دەپ ايتا قويمايمىن. كۆادرات مەترى مىسالى 300 مىڭ بولسا اقىرىنداپ 310 مىڭ بولادى، سوسىن 320 مىڭ بولادى. سول جالپى ءۇيدىڭ باعاسىنا 500 مىڭ، ميلليونداپ قوسىلا بەرەدى. سىرتتان الدىراتىن قۇرىلىس ماتەريالدارى قاتتى قىمباتتاعان. ول ۆاليۋتانىڭ كۋرسىنا بايلانىستى»، – دەيدى «قازاقستاننىڭ ورنىقتىلىق قورى» اق سىرتقى بايلانىستار قىزمەتىنىڭ باس مەنەدجەرى ايبار ولجاەۆ.

ياعني، ۇيگە كەرەكتىنىڭ بارلىعى بىزدە شەتەلدەن كەلەدى. سوندىقتان ەشبىر قۇرىلىس كومپانياسى قىمباتتاعان قۇرىلىس ماتەريالىنان سالىنعان ءۇيدى ارزانعا بەرمەيدى.

«ءۇيدىڭ باعاسىن ەشكىم ارزانداتا المايدى، تەك مەملەكەت پاتەرلەردى كوپتەپ سالىپ، ءۇي ساتۋشى كومپانيالارعا باسەكەلەس بولا السا عانا باعا ازداپ ءتۇسۋى مۇمكىن» دەيدى مامان. ال ساپاسى بيزنەس كلاستاعىداي بولماسا دا ۇكىمەت جىلدا ميلليونداعان شارشى مەتر پاتەر سالادى. قاڭتاردان بەرى مەملەكەتتىك باعدارلامامەن 23,663 باسپانا بەرىلگەن. جىل سوڭىنا دەيىن ۇكىمەتتەگىلەر 17 ميلليون شارشى مەتر ءۇيدى پايدالانۋعا بەرەمىز دەپ وتىر.

«اعىمداعى قاڭتار-ناۋرىزدا 2,9 ملن شارشى مەتر تۇرعىن ءۇي پايدالانۋعا بەرىلدى. بۇل وتكەن جىلدىڭ كەزەڭىنەن 8,6 پايىزعا جوعارى. پاۆلودار وبلىسىنان باسقا بارلىق وڭىرلەر وڭ ءوسىم كورسەتتى. تۇرعىن ءۇيدى ەڭ كوپ 5,9 ەسە پايدالانۋعا بەرۋ شىمكەنت قالاسىندا بايقالدى»، – دەيدى ۇلتتىق ەكونوميكا ءمينيسترى اسەت ەرعاليەۆ.

ال، ۇلتتىق ستاتيستيكا بيۋروسىنداعىلار ناۋرىزدا 52,673 ءۇيدى ساتىپ الۋ-ساتۋ كەلىسىمشارتى جاسالعانىن، بۇل وتكەن جىلمەن سالىستىرعاندا 2,4 ەسەگە كوپ ەكەنىن جاريالادى. ياعني، ۇيگە دەگەن سۇرانىس اي سايىن ءوسىپ كەلەدى.
وتكەن ايدا باسپانا ساتىپ العان 52 مىڭنان استام قازاقستاندىقتىڭ 40 مىڭى كوپقاباتتى ۇيدەن پاتەر الىپتى. ەڭ كوبى ماڭعىستاۋ وبلىسىنىڭ تۇرعىندارى: ءبىر ايدىڭ ىشىندە 9852 ادام باسپانا ساتىپ العان. ال، سولتۇستىك قازاقستان وبلىسىندا كەرىسىنشە، ءۇي العاندار از: 687 ادام.

«جىل سوڭىنا دەيىن 17 ميلليون شارشى مەتر ءۇيدى پايدالانۋعا بەرەمىز» دەگەن شەنەۋنىكتەر بۇگىن ۇكىمەت وتىرىسىندا نارىقتا ءۇيدىڭ باعاسى نەلىكتەن قىمباتتاعانىن، تاعى قالاي قۇبىلۋى مۇمكىن ەكەنىن ايتپادى.

Abai.kz