اقتاۋداعى سوتتىڭ 16-ساۋىردە وتكەن 15-ءشى وتىرىسى، حالىقارالىق «جاڭاوزەن-2011» كوميتەتى مۇشەلەرىنىڭ اقپاراتىنا سايكەس، سوتتالۋشى روزا تولەتاەۆانى سۇراۋدان باستالعان.

ادۆوكات جۋاسپاەۆا: ءسىزدىڭ تۋعان كۇنىڭىز جونىندەگى سۇراققا جاۋاپ بەرگەن كەزدە ءۇش رەت قاتەلەسۋىڭىز نەگە بايلانىستى؟

روزا: بىرىنشىدەن، وتكەن جىلدىڭ قازان ايىندا اۆارياعا تۇسۋىممەن. ەكىنشىدەن، ارينە، جاڭاوزەن وقيعاسىمەن. بۇرىن مەن ەشقاشان وققا ۇشىپ قازا بولعان ادامداردى، سوعىس ارەكەتتەرىن كورگەن ەمەسپىن. وسىنىڭ بارىنەن كەيىن مەنىڭ جادىم ناشارلاپ كەتتى، كەرەك دەسەڭىز، ءتىپتى الاڭداعى ساحنانىڭ كورىنىسىن ۇمىتىپ قالىپپىن. مەنى جاۋاپتاۋ كەزىندە وسىنى ايتقانىمدا تەرگەۋشىلەر ماعان سەنبەدى. جاۋاپتاۋ ۇستىندەگى جاعدايلار جونىندە دە وزىمە-ءوزىم ەسەپ بەرە المادىم.

ادۆوكات: جاۋاپ الۋ كەزىندە سىزگە زاڭسىز ادىستەر قولدانىلدى ما؟

اقتاۋداعى سوتتىڭ 16-ساۋىردە وتكەن 15-ءشى وتىرىسى، حالىقارالىق «جاڭاوزەن-2011» كوميتەتى مۇشەلەرىنىڭ اقپاراتىنا سايكەس، سوتتالۋشى روزا تولەتاەۆانى سۇراۋدان باستالعان.

ادۆوكات جۋاسپاەۆا: ءسىزدىڭ تۋعان كۇنىڭىز جونىندەگى سۇراققا جاۋاپ بەرگەن كەزدە ءۇش رەت قاتەلەسۋىڭىز نەگە بايلانىستى؟

روزا: بىرىنشىدەن، وتكەن جىلدىڭ قازان ايىندا اۆارياعا تۇسۋىممەن. ەكىنشىدەن، ارينە، جاڭاوزەن وقيعاسىمەن. بۇرىن مەن ەشقاشان وققا ۇشىپ قازا بولعان ادامداردى، سوعىس ارەكەتتەرىن كورگەن ەمەسپىن. وسىنىڭ بارىنەن كەيىن مەنىڭ جادىم ناشارلاپ كەتتى، كەرەك دەسەڭىز، ءتىپتى الاڭداعى ساحنانىڭ كورىنىسىن ۇمىتىپ قالىپپىن. مەنى جاۋاپتاۋ كەزىندە وسىنى ايتقانىمدا تەرگەۋشىلەر ماعان سەنبەدى. جاۋاپتاۋ ۇستىندەگى جاعدايلار جونىندە دە وزىمە-ءوزىم ەسەپ بەرە المادىم.

ادۆوكات: جاۋاپ الۋ كەزىندە سىزگە زاڭسىز ادىستەر قولدانىلدى ما؟

روزا: پوليتسياعا مەن ءوزىم باردىم، ودان سوڭ مەنى 2-ءشى ىقشاماۋدانداعى ۇقك-گە الىپ باردى. وندا بىرنەشە ادام بولدى، ال ەرجان ەسىمدى قىزمەتكەر ماعان: «سەندەر بىتتىڭدەر!» - دەدى. مەنىڭ 14 جاسار قىزىم بار ەكەنىن بىلەمىز دەپ قورقىتتى. جاۋاپ الىپ جاتقان كەزدە جەلكە جاعىمداعى ادام اۆتوماتىمەن ارقامدى نۇقىپ تۇردى. بىرەۋى: «قۇلات ونى»، - دەدى. ماعان: «كيىز ۇيلەر مەن «اليانس-بانكتى» ورتەگەن سەنسىڭ، ويتكەنى سەن ودان نەسيە العانسىڭ»، - دەدى. ماعان ادۆوكات بەرمەي قويدى. زالدا مەنىڭ تۋىستارىم مەن تانىستارىم وتىر، سوندىقتان ولاردىڭ ماعان نە ىستەگەنىنىنىڭ ءبارىن ايتا المايمىن، ارلانامىن. بەتىنىڭ تىرتىعى بار رۋسلان دەگەن جىگىت مەنى قورلادى. ول مەنىڭ باسىما پوليەتيلەن پاكەت كيگىزدى، مەن ەسىمنەن تانىپ قالدىم. ءبىر ءتۇپ شاشىمدى جۇلىپ الدى. جاۋاپتاۋ كەزىندە بىرەۋى: «ەگەر ساعان قازاقستان ۇناماسا، تۇركىمەنستانىڭا قايت!» (مەن سوندا تۋىپ-وسكەم) - دەپ ايقايلادى. ياعني، مەنى الالادى.

ادۆوكات: ءسىزدىڭ دەنساۋلىعىڭىز ناشارلادى ما؟

روزا: مەنى تۇتقىنداپ، ازاپتاعاننان سوڭ ءدام سەزۋ قابىلەتىمنەن ايىرىلدىم، ودان سوڭ تابەتىمدى جوعالتتىم. وسىلاي ەكى اپتادان استام جالعاستى. ۇيقىم قاشىپ، ۇنەمى جۇرەگىم اينىدى. مەن ءتىپتى وزىمە قول جۇمساعىم دا كەلدى، بىراق ءوزىمدى تەجەدىم. جاعىم قارىسىپ قالىپ، ونى كۇشپەن اجىراتۋعا تۋرا كەلدى. سونداي-اق، مەنىڭ اسقازانىم مەن بۇيرەگىمنىڭ سوزىلمالى سىرقاتتارى، ماستوپاتيام بار.

ادۆوكات: سىزگە دارىگەرلىك تەكسەرۋ مەن ەمدەلۋ قاجەت پە؟

روزا: قاجەت.

ادۆوكات: مەنىڭ قورعاۋىمداعى ادامنىڭ دەنساۋلىعى جونىندە سوت-پسيحياتريالىق ساراپتاما جانە جۇلىنعان شاشىنا وراي سوت-كريميناليستىك ساراپتاما جۇرگىزۋدى تالاپ ەتەم.

ادۆوكاتتار مەن سوتتالۋشىلار بۇل ەكى تالاپتى دا قولداعان، ال پروكۋرورلار بىرىنشىسىنە قارسى بولىپ، ەكىنشىسى بويىنشا تەرگەۋ كەزىندەگى زاڭ بۇزۋشىلىقتار تۋرالى سۋديا قابىلداعان قاۋلى شەڭبەرىندە تەكسەرىس جاساۋدى ۇسىنعان. سۋديا ارالباي ناعاشىباەۆ سوت-پسيحياتريالىق ساراپتاما تۋرالى ماسەلەنى اشىق قالدىرىپ، ازاپتاۋ جونىندەگى ماتەريالدى جاڭاوزەن پروكۋراتۋراسىنا جولدايتىنىن ايتقان.

بۇدان سوڭ روزا 16-جەلتوقسان الدىنداعى جانە ناقتى قاسىرەت كۇنى بولعان وقيعالار جونىندە بايانداي كەلە، ءوزىنىڭ ەشكىمگە دە توناۋ، ورتەۋ، ۇرىپ-سوعۋ، زاڭ مەن ءتارتىپ بۇزۋ جونىندە ەشقانداي نۇسقاۋ بەرمەگەندىگىن مالىمدەگەن.

ادۆوكات: نازارباەۆتىڭ «مۇنايشىلاردىكى دۇرىس» دەۋىنە وراي ءوزىڭىزدىڭ تەوريالىق تۇرعىدا جۇمىسقا قايتا ورنالاسۋعا مۇمكىندىگىڭىز بار ەكەنىن بىلەسىز بە؟

روزا: پرەزيدەنتتىڭ ءسوزى تۋرالى بىلەم، بىراق ول بۇرىنىراق ايتىلعاندا، جاعداي مۇلدە باسقاشا بولار ەدى.

ادۆوكات: ايىپتاۋلاردىڭ اراسىنان ناقتى نەنى مويىندايسىز، قانداي كىناڭىزدى؟

روزا: تارتىپسىزدىكتەردى ۇيىمداستىردى دەگەندى مويىندامايمىن. ال قاتىسۋىمدى تەك الاڭدا بولعاندىعىم ماعىناسىندا مويىندايمىن، بىراق بارلىق جەردە بولعان جوقپىن، دەنساۋلىعىم كوتەرمەيدى. بەلسەندى تۇردە باعىنباۋعا شاقىرعان جوقپىن، تەك ءوز پىكىرىمدى ايتتىم. ال ەگەر ماعان بولا الدەبىر قولايسىز جاعداي تۋعان بولسا، وكىنىشىمدى بىلدىرەم.

ادۆوكات جامەنوۆ (سوتتالۋشى مۇراتباي جۇماعاليەۆتىڭ 16-جەلتوقساندا قولىن كوتەرىپ: «ادىلەت قايدا؟ زاڭ قايدا؟» - دەگەن سوزدەرىن ەسكە ءتۇسىرىپ): وسى سوزدەر تارتىپسىزدىككە شاقىرۋ بولدى دەپ ايتا الاسىز با؟

روزا: بۇل سوزدەردى مەنىڭ ءوزىمنىڭ دە پىكىرىم دەپ ەسەپتەيمىن.

وسىعان وراي ەسكەرتە كەتەتىن فاكت - م.جۇماعاليەۆ سول كەزدە جاڭاوزەن قالالىق ءماسليحات سايلاۋىنا تىركەلگەن كانديدات بولعان، سوندىقتان ول، تۋىستارىنىڭ ايتۋىنشا، سايلاۋالدى ۇگىت-ناسيحات جۇرگىزگەن، ال قالالىق سايلاۋكوم ونىڭ سايلاۋدان شەتتەتىلگەندىگى تۋرالى ءوز شەشىمىن وعان حابارلاماي، زاڭ بۇزعان.

ادۆوكات باتيەۆا: ءسىز كوزلوۆ پەن اميروۆامەن ينتەرنەت ارقىلى حابارلاستىڭىز با؟

روزا: ءبىر-ەكى رەت حابارلاستىم، بىراق ءۇستىرتىن، ويتكەنى كوزلوۆتى ودان وسى ايماققا ءبىر كەلگەن كەزىندە العان ۆيزيتكاسى ارقىلى عانا بىلەمىن.

سوت وتىرىسىنىڭ ەكىنشى جارتىسى تەرگەۋ كەزىندە ورىن العان ۇرىپ-سوعۋ، قورلاۋ، قورقىتۋلار تۋرالى روزا تولەتاەۆانىڭ مالىمدەمەسىن جاڭاوزەن پروكۋراتۋراسىنا جولداۋ تۋرالى سۋديانىڭ قاۋلىسىن جاريا ەتۋدەن باستالعان. سونداي-اق، سۋديا وعان جاۋاپتىڭ 10 كۇن ىشىندە بەرىلۋىن قاۋلى ەتكەن.

ودان ءارى تولەتاەۆا پروكۋرورلار تاراپىنان سۇرالعان. ولار روزا جىبەرگەن جانە وعان كەلگەن سمس-تەر مەن تىڭدالعان اڭگىمەلەرىنىڭ ماتىندەرىن وقىپ بەرگەن. ءار ايتىلعان نە جازىلعان ءسوزدىڭ ماعىناسىنا شۇقشيا قادالىپ، ءتىپتى، سمس-ءتىڭ «نەگە باسقا ۋاقىتتا ەمەس، ءدال وسى ۋاقىتتا جىبەرىلگەنىدىگىنە» دەيىن سۇراعان. روزا ولاردىڭ كوبىسى قازىر جادىندا جوق ەكەندىگىن، بىراق، قالاي بولعاندا دا، ەشبىر ءسوزىنىڭ زورلىققا، تارتىپسىزدىككە، توناۋعا شاقىرمايتىندىعىن، بالكىم، ەشمانوۆ، ساربوپەەۆ، ايتقۇلوۆتاردىڭ ءىس-ارەكەتتەرىنە وراي كەيبىر سوزدەردىڭ قىزبالىقپەن ايتىلۋى مۇمكىن ەكەندىگىن تۇسىندىرگەن.

پروكۋرور: ءسىز نەگە جسدپ ءۇشىن داۋىس بەرۋ كەرەك دەپ جازدىڭىز؟

روزا: ەسىمدە جوق. جالپى مەن پارتيالاردان تەك «نۇر وتاندى» عانا بىلەمىن.

پروكۋرور: ءسىز ءوزىڭىزدىڭ وتكەلوۆ شابدال تۋرالى - ول جانعىش زاتتى شولمەكتەر دايىندادى دەگەن ءسوزىڭىز جونىندە نە ايتا الاسىز؟

روزا: مەن مۇنى قىسىممەن ايتتىم. مەنى قورقىتتى: «قىزدارىڭدى الىپ كەلىپ، شەشىندەرەمىز دە...» (روزا جىلاپ جىبەرگەن). ولارعا نە ىستەيمىز دەگەندەرىن قايتالاپ ايتۋدىڭ ءوزى ۇيات.

پروكۋرور: بىرەۋلەر سىزگە سمس-تەر، سكايپ ارقىلى حابارلار تاراتۋ جونىندە نۇسقاۋ بەردى مە؟

روزا: جوق، ەشكىم نۇسقاۋ بەرگەن جوق.

پروكۋرور: تاماقتانۋعا اقشانى قايدان الدىڭىز؟

روزا: تۋىستارىم، جاقىندارىم كومەكتەستى. ەگەر قالاساڭىز، پاتەراقى مەن كوممۋنالدىق تولەمدەر تۋرالى ايتىپ بەرەيىن.

پروكۋرور: جوق، ايتپاي-اق قويىڭىز. مۇنايشىلارعا كومەك جيناۋ ءۇشىن اشىلعان ەسەپ-شوتتار جونىندە ايتىپ بەرىڭىز.

روزا: 9-تامىزدا اتاباەۆ اعاي تەلەفون سوعىپ، ەگەر ەسەپ-شوت اشساق، مۇنايشىلاردىڭ وتباسىلارىنا، بالالارىنا كومەك ءۇشىن اقشا جيناۋعا بولادى دەدى. مەن اقىلداستىم دا، اقشانى نۇرساۋلە وتارباەۆانىڭ جيناق كىتاپشاسىنا تۇسىرەتىن بولىپ شەشتىك. ءبىرىنشى رەت وعان 65 مىڭ تەڭگە ءتۇستى، مەن ونى ءبولىپ تاراتۋعا قاتىستىم. ودان سوڭ 420 مىڭ تەڭگە ءتۇستى، بىراق ونى ءبولىپ تاراتۋمەن ناتاليا اجىعاليەۆا اينالىستى.

پروكۋرور: سونداي سمس-تەر مەن حاتتار جازعانىڭىزعا وكىنەسىز بە؟

روزا: وكىنەمىن، بىراق مۇنى مەن ەموتسيا، شارشاۋ، جۇيكە، اشۋ سالدارىنان ىستەدىم.

ادۆوكاتتاردىڭ ءبىرى: سوتتالۋشىنىڭ وكىنىپ-وكىنبەيتىندىگى تۋرالى سۇراق قويۋعا سوتتىڭ تىيىم سالۋىن سۇرايمىن.

سۋديا: سوتتالۋشىنىڭ وزىنە تاعىلعان ايىپتى مويىنداپ-مويىندامايتىندىعى جونىندە عانا سۇراۋ قاجەت.

بۇدان سوڭ سەنساتسيالىق جاعداي ورىن الىپ، ادۆوكات جۋاسپاەۆا ادۆوكات دوسبولوۆقا سەنىمسىزدىك ءبىلدىرۋ ماسەلەسىن كوتەرگەن. مۇنى ول دوسبولوۆتىڭ جۇمىس بەرۋشى (ومن-كمگ) مەن جۇمىستان شىعارىلعان مۇنايشىلار اراسىنداعى ەڭبەك تالاسى كەزىندە ءبىرىنشىسىنىڭ مۇددەسىن قورعاعاندىعىمەن، سونىڭ ىشىندە ومگ-نىڭ بۇرىنعى جۇمىسشىسى قايرات ادىلوۆكە ونىڭ جۇمىستان دۇرىس شىعارىلعاندىعى جونىندە جازباشا جاۋاپ بەرگەندىگىمەن نەگىزدەگەن. جانە ەڭبەك تالاسىنىڭ جاڭاوزەندەگى تارتىپسىزدىكتەرگە الىپ كەلگەن نەگىزگى سەبەپ بولعاندىعىنا نازار اۋدارىپ، قپك، ادۆوكاتتىق قىزمەت تۋرالى زاڭ مەن قاراپايىم لوگيكا بويىنشا دوسبولوۆقا سەنىمسىزدىك ءبىلدىرۋدى تالاپ ەتكەن.

جۋاسپاەۆانىڭ تالاپ-تىلەگىن بارلىق سوتتالۋشىلار قولداپ ء(سوز سۇراعان ءادىلوۆ: «بۇرىن بىزگە قارسى بولعان ادام قازىر قالاي قۇقىقتارىمىزدى قورعايتىنىن تۇسىنبەيمىن؟» - دەگەن), پروكۋرورلار قارسى بولعان. 15 مينۋتتىق ۇزىلىستەن كەيىن كەڭەسۋ بولمەسىنەن قايتىپ ورالعان سۋديا تالاپ-تىلەكتى قاناعاتتاندىرماعانىن جاريالاعان. ءسويتىپ، مەملەكەت تاعايىنداعان ادۆوكات دوسبولوۆ ورنىندا قالعان.

ودان ءارى سوتتالۋشى مۇرات دوسماعامبەتوۆ ءوزىنىڭ بۇلتارتپاۋ شاراسىن وزگەرتۋ تۋرالى تالاپ-تىلەك تۇسىرگەن. سۋديا ونى اشىق قالدىرىپ، شەشىمىن ەرتەڭ ايتاتىن بولىپ ۋادە بەرگەن.

كەلەسى سۇرالعان سوتتالۋشى مۇرات قوسبارماقوۆ اسىقپاي، بايىپپەن، انىق سويلەپ، كەيدە مىسقىلداپ قويىپ، الاڭدا پوليتسەيلەردىڭ بىرىنە «بەس قارۋىن شىعارعانىن» (ياعني، ءتورت ساۋساق اراسىنان باس بارماعىن كورسەتكەنىن), وپىر-توپىردا بىرەۋدىڭ ونى ارقاسىنان ۇرعانىن، جالت بۇرىلىپ كۇرتەشەسىنەن ۇستاعان كەزدە الگى جۇلقىنىپ قالىپ، سىرت قيىمىنىڭ ىشىنەن برونەجيلەت پەن كوبۋراداعى پيستولەت كورىنىپ قالعانىن، بىراق ونىڭ بەتىن بوكەباي ءتارىزدى بىردەمەمەن وراپ العاندىقتان ءجۇزىن كورە الماعانىن، ودان سوڭ اتىس باستالىپ، اينالاسىنداعى ادامدار قۇلاي باستاعانىن بايانداعان. مۇراتتىڭ ايتۋىنشا، ول ءوز كوزىنە ءوزى سەنبەي، جارالىلاردى شەتكە شىعارا باستاعان. ال، 27-جەلتوقسان كۇنى ونى پوليتسياعا الىپ كەلىپ، ديۆانداردا كوپتەگەن «امبالدار» وتىرعان بولمەگە كىرگىزگەن كەزدە قارقىلداي كۇلگەن ولار: «ا، بىزگە بارماعىن كورسەتكەن كەلدى!» - دەپ، «قۋانىپ كەتكەن». سول جەردە ۇرىپ-سوعۋ باستالعان، قوسبارماقوۆتىڭ ايتۋىنشا، اسىرەسە قازاقتار تىرىسىپ باققان («قىزىعى، سلاۆياندار تيگەن جوق، ءوز قازاق باۋىرلارىم جارىسىپ سابادى مەنى!»).

ودان سوڭ قىىب باستىعىنىڭ ورىنباسارىنا الىپ بارعان. «كىر، قوناق بولاسىڭ»، - دەپ قارسى العان پوليتسەي مۇراتتى قولىنىڭ قىرىمەن تاماقتان ۇرعان. يۆس-تە ۇرىپ-سوعۋ جالعاسقان. ونىڭ «دۋبينكانى قۇشاقتاپ جۇرەتىن» باستىعى «دۋبينكانى ءتيىستى جەرىڭنىڭ بارىنە تىعام» دەپ ۋادە بەرگەن. تەرگەۋشىلەر قوسبارماقوۆقا قپك-ءنىڭ 100-بابىن (كۋاعا قاۋىپسىزدىك شارالارىن قامتاماسىز ەتۋ تۋرالى) قولدانۋعا ۋادە بەرىپ، الدەبىر ادامعا كورسەتۋلەر جاساۋدى ۇسىنعان، بىراق ول كەلىسپەگەن. بۇدان سوڭ تاعى دا ۇرىپ-سوققان. «بوكسشىنىڭ گرۋشاسىنا» اينالعان ونى اركىم ءوتىپ بارا جاتىپ ۇرىپ ءوتۋدى «ءوز مىندەتى ساناعان». ۇرىپ-سوعۋشىلار قاتارىندا ۇقك قىزمەتكەرلەرى دە بولعان. سودان ءبىر كوزى گۇپ بولىپ ءىسىپ، «حامەلەوننىڭ كوزىنە» ۇقساپ كەتكەن. ەكى قۇلاعى دا ناشار ەستي باستاعان. شابىنا قاتتى تەپكەنى سونداي، كۇنى بۇگىنگە دەيىن جۇرگەن كەزدە اۋىرادى ەكەن. وعان ادۆوكات بەرمەگەن، دارىگەر شاقىرماعان. جالعىز «ءدارىسى» - ءوزىنىڭ ءزارى بولعان. «وسىنىڭ ءبارى مەنىڭ تەك بارماعىمدى كورسەتكەنىم ءۇشىن عانا بولعانىنا سەنۋدىڭ ءوزى قىيىن» دەگەن. ال، ءوزىن ۇرىپ-سوققاندار اراسىنان مۇرات ەكەۋىن عانا - ءابدىراسۋل وتەشەۆ پەن رۋسلان دەگەندى ەسىنە تۇسىرگەن.

1987 جىلى تۋعان، اتا-اناسى قايتىس بولعان، باعۋىندا ەكى ءىنىسى مەن كىشكەنتاي بالاسى بار سوتتالۋشى باۋىرجان نەپەس قاسىرەت كۇنى مەن ونىڭ قارساڭى تۋرالى اڭگىمەلەي كەلە، ول دا، قوسبارماقوۆ ءتارىزدى، ءوزىنىڭ ەرەۋىلشىلەر قاتارىندا بولعانىن، الايدا جاپپاي تارتىپسىزدىكتەردى ۇيىمداستىرماعانىن، ورتەۋ مەن توناۋعا قاتىسپاعانىن مالىمدەگەن. ال، پروكۋرورلار بىرنەشە رەت كورسەتكەن بەينەجازبادا ونىڭ الاڭدا پوليتسەيلەردى بۇزىپ-جارىپ، ساحنادا بىردەڭە قيراتقاندىعىن دالەلدەيتىن ەشتەڭە بولماعان. جانە ادۆوكات تولەۋقۇلوۆ بەينەجازباداعى جاۋاپتاۋ حاتتاماسىندا تەك «تانىستىم» دەگەن قول تۇرعانىن، ال جاۋاپتاۋدىڭ وزىنە ادۆوكات قاتىسپاعانىن ايتقان، باۋىرجان مۇنى راستاعان.

مالىمەت ءۇشىن وسى سوتتاعى ايىپتاۋشىلار مەن قورعاۋشىلاردىڭ اتى-جوندەرىن جانە كىمنىڭ قايدان ەكەندىگىن كورسەتە كەتەيىك:

سۋديا ارالباي ناعاشىباەۆ -اقتاۋ قالالىق سوتىنىڭ توراعاسى.

پروكۋرورلار: دۇزەلباەۆ - وقو، اليەۆ - قىزىلوردا، سىدىقوۆ - الماتى وبلىسى، ابىلاكىم -  اقتوبە، ءابۋباكىروۆ - ماڭعىستاۋ، اقباەۆ - استانا (باس پروكۋراتۋرانىڭ 10-شى دەپارتامەنتىنىڭ اعا پروكۋرورى).

ادۆوكاتتار: باتيەۆا - اقمولا وبلىسى، جۋاسپاەۆا - شقو، سارسەمبينا - شقو، جامەنوۆ - ماڭعىستاۋ، تاسقىنباەۆ - ماڭعىستاۋ، الىبيەۆ - اتىراۋ، تولەۋقۇلوۆ - ماڭعىستاۋ، بيسەكەشەۆ - ماڭعىستاۋ، دوسبولوۆ - اكمولا وبلىسى، سانسىزبايۇلى - ماڭعىستاۋ، كوشكەنوۆ - ماڭعىستاۋ، قوزىباعاروۆ - ماڭعىستاۋ.

جاسارال قۋانىشالين،

حالىقارالىق «جاڭاوزەن-2011» كوميتەتىنىڭ

اقپاراتتىق توپ جەتەكشىسى.

الماتى قالاسى،

2012 جىلدىڭ 16-ءساۋىرى.

«اباي-اقپارات»