بۇگىن پارلامەنت ءماجىلىسىنىڭ جالپى وتىرىسىندا دەپۋتات عالىمجان ەلەۋوۆ دارىلىك قامتاماسىز ەتۋگە قاتىستى ماسەلە كوتەرىپ، دەنساۋلىق ساقتاۋ مينيسترىنە دەپۋتاتتىق ساۋال جولدادى.

دەپۋتاتتىڭ ايتۋىنشا، اۋىر دياگنوزدارى بار ادامدارعا اسا ماڭىزدى پرەپاراتتار ۋاقىتىندا جەتكىزىلمەۋدە. بۇگىندە ءساۋىر ايىنىڭ ورتاسى بولعانىمەن، وكىنىشكە وراي، تىزىمدەگى 70-كە جۋىق پرەپارات ءالى كۇنگە دەيىن ساتىپ الىنباعان.

سونىمەن بىرگە وسى 70 پرەپاراتتان باسقا، ساتىپ الىندى دەپ كورسەتىلگەن 45 پرەپاراتتىڭ العاشقى جەتكىزىلۋ مەرزىمى ءساۋىر ايىنان باستالادى، ال كەيبىرەۋلەر ءتىپتى 2021 جىلدىڭ قازان ايىنان باستاپ جەتكىزىلمەك.

وسى رەتتە، عالىمجان ەلەۋوۆ 2021 جىلعا ارنالعان بىرىڭعاي ديستريبيۋتوردان ساتىپ الىناتىن دارىلىك زاتتاردىڭ، مەديتسينالىق بۇيىمداردىڭ ءتىزىمى دەنساۋلىق ساقتاۋ مينيسترلىگىنىڭ بۇيرىعىمەن 2020 جىلدىڭ 28 شىلدەسىندە بەكىتىلگەنىن اتاپ ءوتتى.

ياعني،  2021 جىلدىڭ باستالۋىنا دەيىن حالىقتى تەگىن دارىلىك قۇرالدارمەن قامتاماسىز ەتۋ بويىنشا مىندەت الدىن الا بەلگىلەندى.

بۇگىنگى كۇنى ونكولوگيالىق اۋرۋحانالاردىڭ ەسەبىندە 180 مىڭنان استام ازامات تىركەلگەن. وكىنىشكە وراي، جىل سايىن ەلىمىزدە ولاردىڭ قاتارى 30 مىڭ ادامعا كوبەيۋدە. بۇل ناۋقاستارعا ارنالعان دارىلەردىڭ ءتىپتى 10 كۇنگە كەشىگىپ جەتكىزىلۋى اۋىر جاعدايعا الىپ كەلۋى مۇمكىن.

- وسىعان قاراماستان مەنىڭ رەسمي ساۋالدارىما سك-فارماتسيا اقپاراتى بويىنشا ونكولوگيالىق ناۋقاستار ءۇشىن L-اسپاراگينازا، ۆينبلاستين، دەنوزۋماب، مەتوترەكسات، تسيكلوفوسفاميد سەكىلدى ىسىككە قارسى پرەپاراتتار ساتىپ الىنباعان, - دەدى دەپۋتات.

ع.ەلەۋوۆتىڭ ايتۋىنشا، تۋبەركۋلەزگە شالدىققان ناۋقاستاردىڭ دا جاعدايى اۋىر، سەبەبى يزونيازيد، پروتيوناميد، ريفامپيتسين ۋاقىتىندا اكەلىنبەگەن.

وسى رەتتە، قازاقستاندا تىنىس الۋ ورگاندارىنىڭ اۋرۋلارىنان قايتىس بولعان ادامداردىڭ سانى وتە كوپ ەكەنىن العا تارتقان دەپۋتات برونح دەمىكپەسىنە جانە وكپەنىڭ سوزىلمالى وبسترۋكتيۆتى اۋرۋىنا شالدىققان ناۋقاستار دارىلەرمەن تولىق ەمەس كولەمدە قامتاماسىز ەتىلگەن – ۆيلانتەرول، فلۋتيكازونا فۋروات، سۋرفاكتانت، تەوفيللين ساتىپ الىنباعانىنا نازار اۋداردى.

سونداي-اق، 1 جانە 2 ءتيپتى قانت ديابەتىمەن اۋىراتىن ادامدار ينسۋلين گلۋليزينمەن قامتاماسىز ەتىلمەگەن.

- كەيبىر نەيرولەپتيكتەر مەن ەپيلەپسياعا قارسى قۇرالدار ساتىپ الىنبادى. ءجيى كەزدە ولار قازاقستاننىڭ ءدارىحانالارىندا ساتىلمايدى، حالىق امالىن تاۋىپ، ولاردى كورشىلەس رەسپۋبليكالاردان تانىستار ارقىلى زاڭسىز الدىرۋعا ءماجبۇر، - دەدى ع. ەلەۋوۆ.

سونىمەن قاتار، دەپۋتات ۇلتتىق ەكپەلەر كۇنتىزبەسىنە سايكەس 2, 3, 4, 18 ايداعى بالالارعا جانە 6 جاستاعى بالالارعا قويىلاتىن ديفتەرياعا، كوكجوتەلگە، سىرەسپەگە، پوليوميەليتكە قارسى ەكپەنى ساتىپ الۋ بويىنشا وتكىزىلمەگەن كونكۋرس ەرەكشە الاڭداۋشىلىقتى تۋدىراتىنىن جەتكىزدى.

جوعارىدا باياندالعاننىڭ نەگىزىندە دەنساۋلىق ساقتاۋ مينيسترلىگىنەن تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جانە مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا دارىلىك پرەپاراتتاردىڭ تولىق كولەمدە ساتىپ الىنۋىن قامتاماسىز ەتۋدى، ءدارى-دارمەكتەردى ۋاقىتىندا ەمەس جانە تولىق ەمەس كولەمدە جەتكىزۋ ماسەلەسىن، ءبىرىنشى جەتكىزۋدىڭ كەش مەرزىمىن شەشۋ تۋرالى ۋاكىلەتتى ورگان قانداي شارالاردى قابىلدايتىنىن ءتۇسىندىرۋدى جانە باسقارۋشىلىق شەشىمدەردىڭ قابىلدانۋىن ۇزارتىپ جاتقان تۇلعالاردىڭ جاۋاپكەرشىلىگى تۋرالى اقپارات بەرۋدى تالاپ ەتتى.

Abai.kz