بيىل قازاق جاستارىنىڭ قىلىشىنان قان تامعان كەڭەستەر وداعىنا قارسى شىعىپ، ءوز تالابىن قويعان ايگىلى جەلتوقسان كوتەرىلىسىنە 35 جىل تولادى. اتالعان كوتەرىلىستىڭ ماڭىزى تۋرالى مەملەكەت باسشىسى قاسىم-جومارت توقاەۆ تا قاڭتار ايىندا “ەگەمەن قازاقستان” گازەتىندە جاريالاعان “تاۋەلسىزدىك بارىنەن قىمبات” اتتى ماقالاسىندا ايتىپ وتكەن بولاتىن.

پرەزيدەنتتىڭ اتالعان ماقالاسىندا ەل تاۋەلسىزدىگىنىڭ اقتاڭداق بەتتەرى مەن ونىڭ ماڭىزى جايلى جان-جاقتى جازىلعان.

ماسەلەن، پرەزيدەنت ءوز ماقالاسىندا ەل تاۋەلسىزدىگىنىڭ 30 جىلدىعىن نەگىزگى ءۇش ون جىلدىققا ءبولىپ قاراستىرادى. ءبىرىنشى ونجىلدىق – جاڭا قالىپتاسقان قازاقستاننىڭ ىرگەتاسىن قالاۋ كەزەڭى دەۋگە بولادى. بۇل كەزەڭدە مەملەكەتتىڭ بيلىك جۇيەسى قالىپتاسىپ، نىشاندارى ايقىندالدى.

ەكىنشى ون جىلدىقتى قازاق ەلىنىڭ كەرەگەسىن كەڭەيتۋ كەزەڭى دەپ بولگەن. ياعني، بۇل كەزەڭدە قازاقستاننىڭ ەكونوميكالىق الەۋەتى ارتقان. قۇرلىقتاعى بارلىق شەكارا ايقىندالىپ، زاڭ جۇزىندە بەكىتىلدى.

ءۇشىنشى ونجىلدىقتا شەكارا ماسەلەسى تولىعىمەن شەشىلىپ، دامىعان وتىز ەلدىڭ قاتارىنا قوسىلاۋعا ۇمتىلدىق.

ال، قاستەرلى تاۋەلسىزدىكتىڭ ءتورتىنشى ون جىلدىعىنا قادام باسقاندا، وتكەنىمىزدى تۇگەندەپ، وشكەنىمىزدى جاعۋعا تالپىنۋ زاڭدىلىق. بۇل تۇرعىدا كەشە كىم بولدىق، بۇگىن قايدا بارامىز، ەرتەڭ كىم بولامىز دەگەن ساۋالدارعا جاۋاپ بەرۋ اسا ماڭىزدى.

ەندەشە، بۇل ساتىدا ەل تاۋەلسىزدىگى تاريحىندا ايرىقشا ورنى بار جەلتوقسان كوتەرىلىسىنە توقتالماي كەتۋگە بولمايدى. بۇل تۋرالى مەملەكەت باسشىسى قاسىم-جومارت توقاەۆ اتالعان كوتەرىلىستىڭ ماڭىزى جايلى ايتا كەلىپ، جەلتوقسان كوتەرىلىسىنىڭ ازاماتتىق ەرلىگى لايىقتى باعاسىن الىپ، جوسپارلى تۇردە ناسيحاتتالۋى قاجەت ەكەنىن باسا ايتتى.

-“بيىل ايگىلى جەلتوقسان وقيعاسىنا 35 جىل تولادى. 1986 جىلى ورىمدەي ۇل-قىزدارىمىز كەڭەس وداعىنىڭ قاھارىنان قايمىقپاي، ۇلت نامىسى ءۇشىن الاڭعا شىقتى. وسى كۇننەن سوڭ تۋرا بەس جىل وتكەندە تاۋەلسىزدىگىمىزدى جاريالاۋىمىزدىڭ سيمۆولدىق ءمانى زور. بۇل ورايدا، ازاتتىقتىڭ العاشقى قارلىعاشتارى – جەلتوقسان قاھارماندارىنىڭ ازاماتتىق ەرلىگى لايىقتى باعاسىن الىپ، جوسپارلى تۇردە ناسيحاتتالۋى كەرەك”،- دەدى مەملەكەت باسشىسى “تاۋەلسىزدىك بارىنەن قىمبات” اتتى ماقالاسىندا.

وسىعان وراي ەلىمىزدە ماڭىزدى، اۋقىمدى ىستەر اتقارىلىپ جاتقانىن ايتا كەتۋ كەرەك.

ماسەلەن، جۋىردا الماتى قالاسىندا جەلتوقسان كوتەرىلىسىنىڭ 35 جىلدىعىنا وراي، “جەلتوقسان 86” اتتى ساياباق اشىلاتىنى تۋرالى اقپارات شىقتى.

ناقتىراق ايتساق، الماتى قالاسىنىڭ اكىمدىگى قالالىق ماسليحاتپەن بىرىگە وتىرىپ، تۇركىسىب اۋدانىندا ورالاسقان “جاس قانات” ىقشام اۋدانىنداعى اتى جوق ساياباقتى “جەلتوقسان 86” دەپ اتاۋ ماسەلەسىن قاراستىرىپ جاتىر. بۇل جونىندە قالالىق اكىمشىلىك پەن قالالىق ءماسليحاتتىڭ بىرلەسكەن قاۋلىسى اشىق نقپ-دا جاريالاندى.

قاۋلىعا سايكەس، قازاقستان رەسپۋبليكاسىنىڭ 1993 جىلعى 8 جەلتوقسانداعى "قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى" زاڭىنىڭ 13-بابىنا cايكەس، الماتى قالاسى تۇرعىندارىنىڭ پىكىرىن ەسكەرە وتىرىپ، الماتى قالاسى اكىمدىگى جانىنداعى ونوماستيكا كوميسسياسىنىڭ 2021 جىلعى 22 اقپانداعى جانە قازاقستان رەسپۋبليكاسىنىڭ ۇكىمەتى جانىنداعى رەسپۋبليكالىق ونوماستيكا كوميسسياسىنىڭ 2021 جىلعى 7 ساۋىردەگى قورىتىندىلارىنىڭ نەگىزىندە، الماتى قالاسىنىڭ اكىمدىگى قاۋلى ەتەدى جانە ءVىى سايلانىمنىڭ الماتى قالاسىنىڭ ءماسليحاتى شەشىم قابىلدادى:

1. الماتى قالاسى تۇركسىب اۋدانى "جاس قانات" شاعىن اۋدانىنداعى اتاۋى جوق ساياباققا "جەلتوقسان-86" ساياباعى اتاۋى بەرىلسىن.

2. الماتى قالاسى تۇركسىب اۋدانىنىڭ اكىمى، "الماتى قالاسى ستراتەگيا جانە بيۋدجەت باسقارماسى", "الماتى قالاسى قالالىق موبيلدىلىك باسقارماسى", "الماتى قالاسى قالالىق جوسپارلاۋ جانە ۋربانيستيكا باسقارماسى", "الماتى قالاسى جاسىل ەكونوميكا باسقارماسى" كوممۋنالدىق مەملەكەتتىك مەكەمەلەرى وسى بىرلەسكەن قاۋلى مەن شەشىمدى ىسكە اسىرۋ جونىندە قاجەتتى شارالاردى قابىلداسىن.

3. الماتى قالاسى ءماسليحاتىنىڭ اپپاراتى وسى بىرلەسكەن قاۋلى مەن شەشىمدى ادىلەت ورگاندارىندا مەملەكەتتىك تىركەۋدى، ونى كەيىننەن رەسمي مەرزىمدى باسپا باسىلىمدارىندا، سونداي-اق قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ ەتالوندىق باقىلاۋ بانكىندە جانە رەسمي ينتەرنەت-رەسۋرسىندا جاريالاۋدى قامتاماسىز ەتسىن.

4. وسى اكىمدىكتىڭ قاۋلىسى مەن ءماسليحات شەشىمىنىڭ ورىندالۋىن باقىلاۋ الماتى قالاسى ءماسليحاتى الەۋمەتتىك-مادەني دامۋ، جاستار جانە قوعامدىق كوممۋنيكاتسيالار جونىندەگى تۇراقتى كوميسسياسىنىڭ توراعاسى ا. جۇدەباەۆقا جانە الماتى قالاسى اكىمىنىڭ ورىنباسارى ە. باباقۇماروۆقا جۇكتەلسىن (كەلىسىم بويىنشا).

5. وسى بىرلەسكەن الماتى قالاسى اكىمدىگىنىڭ قاۋلىسى مەن الماتى قالاسى ءماسليحاتىنىڭ شەشىمى العاش رەسمي جاريالانعاننان كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.

سونىمەن قاتار، پرەزيدەنت ماقالاسىندا جىل سوڭىنا دەيىن ەل تاريحىنداعى ماڭىزدى وقيعالاردى اتاپ ءوتۋ كەرەكتىگىنە توقتالعان بولاتىن. دەمەك، وسى جىل ىشىندە جەلتوقسان كوتەرىلىسىنە قاتىسقان ازاماتتارعا قۇقىقتىق مارتەبە بەرۋ، سوىنمەن قاتار ولاردىڭ ەڭبەكتەرى لايىقتى تۇردە باعالانىپ، ناسيحاتتالۋى قاجەت-اق...

Abai.kz