بۇگىن ساياسي قۋعىن-سۇرگىن قۇرباندارىن ەسكە الۋ كۇنىندە قازاقستان رەسپۋبليكاسىنىڭ مەملەكەتتىك حاتشىسى، ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ توراعاسى قىرىمبەك كوشەرباەۆ مەملەكەتتىك كوميسسيا مۇشەلەرىمەن بىرگە «وتان ساتقىندارى ايەلدەرىنىڭ اقمولا لاگەرى» (الجير) مۇراجاي-مەموريالدىق كەشەنىنىڭ ەسكە الۋ قابىرعاسىنا گۇل شوقتارىن قويدى.

راسىمگە قاتىسۋشىلار ساياسي قۋعىن-سۇرگىن جانە اشارشىلىق قۇرباندارىن «ءبىر مينۋت ۇنسىزدىكپەن» ەسكە الدى.

سونداي-اق ساياسي قۋعىن-سۇرگىن جانە اشارشىلىق قۇرباندارىن «ءبىر مينۋت ۇنسىزدىكپەن» قر پرەمەر-ءمينيسترىنىڭ ورىنباسارى ەرالى توعجانوۆ، قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك، اقمولا وبلىسىنىڭ اكىمى ەرمەك مارجىقپاەۆ ەسكە الدى.

مۇراجاي-مەموريالدىق كەشەندى ارالاۋ بارىسىندا ق.كوشەرباەۆ مۇراجايدىڭ عىلىمي-ىزدەستىرۋ جانە ەكسپەديتسيالىق جۇمىسىنا ەرەكشە نازار اۋدارىپ، ايگىلى الجير لاگەرىنىڭ تۇتقىندارىن اقتاۋ مەملەكەتتىك كوميسسيانىڭ رەسپۋبليكا اۋماعىنداعى لاگەرلەردە بولعان جازىقسىز قۋعىن-سۇرگىنگە ۇشىراعانداردى، سونداي-اق ولاردىڭ وتباسى مۇشەلەرىن اقتاۋمەن اينالىساتىن جۇمىس توپتارىنىڭ مىندەتىنە كىرەتىنىن اتاپ ءوتتى.

مەملەكەتتىك حاتشى اتاپ وتكەندەي، مەملەكەت باسشىسى ق.ك.توقاەۆتىڭ باستاماسىمەن قۇرىلعان مەملەكەتتىك كوميسسيانىڭ قىزمەتى تاريحتى زەردەلەۋ مەن ارحيۆتىك زەرتتەۋلەر جۇرگىزۋ جونىندەگى كەشەندى جۇمىستىڭ نەگىزىندە جۇزەگە اسىرىلادى.

مەملەكەتتىك كوميسسيانىڭ قىزمەتىن ۇيىمداستىرۋ شەڭبەرىندە جوبالىق وفيس، ەكى كىشى كوميسسيا، 11 جۇمىس توبى جانە 17 وڭىرلىك كوميسسيا قۇرىلىپ، جۇمىس ىستەپ جاتىر.

جۇمىس توپتارى مەن وڭىرلىك كوميسسيالاردىڭ عالىمدارى جانە ساراپشىلارى جابىق ارحيۆ ماتەريالدارىنا رۇقسات الىپ، بەلسەندى زەرتتەۋ جۇمىسىنا كىرىستى.

ونىڭ تيىمدىلىگىن قامتاماسىز ەتۋ ءۇشىن بازالىق ءادىسناما بەكىتىلدى، جۇمىس توپتارىنىڭ تاقىرىپتىق جوسپارلارى قالىپتاستىرىلدى، جەرگىلىكتى جەرلەردە ارحيۆ قۇجاتتارىن ىزدەۋ جانە زەردەلەۋ ماسەلەلەرى بويىنشا كەزدەسۋ وتكىزىلەدى.

قورىتىندىلاي كەلە مەملەكەتتىك حاتشى مەملەكەتتىك كوميسسيانىڭ قىزمەتى، ەڭ الدىمەن، جازىقسىز زارداپ شەككەن ساياسي قۋعىن-سۇرگىن جانە اشارشىلىق قۇرباندارىن ماڭگى ەستە قالدىرۋ جانە تاريحي ادىلەتتىلىكتى قالپىنا كەلتىرۋ جونىندەگى ۇلكەن تاريحي ميسسيا جانە الدىڭعى جانە بولاشاق ۇرپاقتار الدىنداعى جاۋاپكەرشىلىك ەكەنىن تاعى دا ەسكە سالدى.

Abai.kz