قازاقستاندا ازىق-تۇلىك باعاسى ءوسىپ بارادى. بۇل ەلدەگى ەكونوميكالىق جاعدايدىڭ شىنايى كورسەتكىشى بولىپ وتىر. 2014 جىلعى دەۆالۆاتسيادان كەيىن حالىقتىڭ ايلىق كورسەتكىشى ايتارلىقتاي وسكەن جوق. ال سىرتتان يمپورتتالاتىن سان مىڭداعان تاۋار باعاسى بىرنەشە ەسە ارتتى. سەبەبى سىرتقى ساۋدا دوللارمەن جاسالاتىندىقتان، ونىڭ باعاسى ءوستى. 

اعىمداعى جىلدىڭ قاڭتار-ءساۋىر ايلارىندا قازاقستاندا 6,5 مىڭ توننا وڭدەلگەن شاي مەن كوفە وندىرىلگەن، بۇل وتكەن جىلمەن سالىستىرعاندا 20,5% ارتىق. ءونىمنىڭ كوپ وندىرىلۋىنە قاراماستان ولاردىڭ باعاسى دا ەسەلەپ ارتقان.

شاي ىشپەسە باسى اۋىراتىن قازاق ءۇشىن شايدىڭ باعاسى ءوستى. بىردەن 12.4%-عا. شايدىڭ ورتاشا قۇنى 2021 جىلى مامىردا شايدىڭ ورتاشا بولشەك ساۋدا باعاسى  كەلىسىنە 3,6 مىڭ تەڭگەنى قۇرادى. ەلىمىزدىڭ ءىرى قالالارىنىڭ ىشىندە ءبىر كەلى شاي قاراعاندىدا ەڭ قىمبات بولىپ شىقتى، ورتاشا باعاسى 4 مىڭ تەڭگە. سونداي-اق شايدىڭ جوعارى باعالارى ەلوردادا كەلىسىنە 3,9 مىڭ تەڭگە جانە الماتىدا  كەلىسىنە 3,8 مىڭ تەڭگەگە تىركەلدى. ەڭ ارزان باعاعا شاي ىشكىڭىز كەلسە تالدىقورعانعا بارۋىڭىزعا تۋرا كەلەدى، وندا شايدىڭ باعاسى كەلىسىنە 3,3 مىڭ تەڭگەنى قۇرايدى.

ءساۋىر ايىنىڭ سوڭىندا قازاقستاندا ورتاشا ەسەپپەن شاي باعاسىنىڭ 12,4% قىمباتتاعانى بايقالدى. شاي باعاسى قازاقستان رەسپۋبليكاسىنىڭ 17 ايماعىنىڭ جەتەۋىندە ورتاشا دەڭگەيدەن جوعارى بولعان. مىسالى باتىس قازاقستان وبلىسىندا شاي بىردەن 25,3% -عا، پاۆلوداردا - 21,4% -عا، شىمكەنتتە - 19,3% -عا كوتەرىلىپ كەتكەن.

"قىمبات شايدى قويىپ، ارزان كوفە ىشەيىن" دەگەن ويىڭىز بولسا، وندا جوسپارىڭىز ىسكە اسپايدى. سەبەبى كوفە باعاسى دا قىمباتتاپ كەتكەن. قازاقستان رەسپۋبليكاسىندا ورتاشا ەسەپپەن كوفە جىلىنا 5,3% قىمباتتاعان. كوفە باعاسىنىڭ شارىقتاۋى قىزىلوردا وبلىسىندا بايقالادى، سىر وڭىرىندەگى كوفە قۇنى بىردەن 16,5%-عا قىمباتتاعان.

مىنا ەnergyprom.kz سايتىنان الىنعان سۋرەتتە كوفە مەن شايدىڭ باعاسىنىڭ قالاي وسكەنىن كورە الاسىز. 

قازاقستانداعى شاي مەن كوفەنىڭ قىمباتتاۋىنا پاندەميا دا ءوز اسەرىن تيگىزگەن. الەمدىك نارىقتا تاۋار باعاسىنىڭ قىمباتتاۋى بايقالادى. كارانتيندىك شەكتەۋلەرگە بايلانىستى شاي مەن كوفە ءوندىرۋشى ەلدەردە كوفە مەن شاي ءوسىرۋ كولەمى ازايعان. ال تاسىمالداۋ قۇنى قىمباتتاعان. بۇل الەمدىك نارىقتاعى تاۋار باعاسىنىڭ قىمباتتاۋىنا اكەلۋدە.

قازاقستاندا سوڭعى ءبىر اي ىشىندە جانارماي باعاسىنىڭ قارقىندى ءوسۋى بايقالادى. تاسىمالداۋ قۇنى ارتقان سايىن تاۋار باعاسىنىڭ دا ارتاتىنى تۇسىنىكتى. دەمەك الداعى ۋاقىتتا شاي مەن كوفە تاعى دا شارىقتاسا تاڭدانباڭىز.

Abai.kz