ءانشى بەلسەندىنى "ار-نامىسقا ءتيىپ، قورلادى" دەپ ايىپتاپ وتىر. ال بەلسەندى "565 ملن تەڭگەنىڭ ەسەبىن سۇراعانىم ءۇشىن ءىستى بولدىم، ءانشىنىڭ ارى تازا بولسا، سوتتاسقانشا حالىق الدىندا ەسەپ بەرسىن" دەيدى.

اتالعان ءىس بويىنشا العاشقى سوت تىڭداۋى 15 شىلدەدە باستالادى.

ارۋجان دۇيسەباەۆانىڭ سوزىنە قاراعاندا، شاعىمعا ناۋرىز بەن ءساۋىر ايلارىندا Youtube ارناسىندا شىققان ەكى ۆيدەو تۇرتكى بولعان. وندا "شىمكەنتتە ناۋرىز تويىنا ءبولىندى دەلىنگەن 565 ميلليون تەڭگەنىڭ داۋى" جونىندە ايتىلادى.

شاعىم بەرۋشى ۆيدەوداعى ءتورت سويلەم (اتاپ ايتقاندا، "مەملەكەت تاراپىنان بولىنگەن 565 ملن تەڭگەنى جوق قىلدى", "جەمقورلىققا بارۋ حالىققا جاساعان وپاسىزدىق", "جەمقور" ت.ب ) مايعازيەۆتى اۋىر قىلمىس جاسادى دەپ ايىپتاپ، "نامىسىنا تيەدى" دەپ سانايدى. شاعىم بەرۋشى سوتتان دۇيسەباەۆانى جوعارىدا كورسەتىلگەن باپ بويىنشا قىلمىستىق جاۋاپكەرشىلىككە تارتىپ، ەكى ۆيدەونى ءوشىرۋدى جانە الەۋمەتتىك جەلى ارقىلى كەشىرىم سۇراۋدى مىندەتتەۋىن سۇراعان.

14 شىلدە كۇنگى ءباسپاسوز جيىنىندا ارۋجان دۇيسەباەۆا وزىنە تاعىلعان ايىپتارمەن كەلىسپەيتىنىن جەتكىزدى.

– ەگەر مايعازيەۆتىڭ شىنىمەن ارى تازا بولسا، جەمقورلىققا قاتىسىم جوق دەسە، نەگە حالىقتىڭ الدىنا شىعىپ، ءوزىنىڭ ۇستانىمىن ايتپايدى؟ مىنا قارجى مىناعان كەتتى، مىناعان جۇمسالدى دەپ نەگە تۇسىندىرمەيدى. ول نەگە egov سايتىنداعى قۇجاتتاردى جوققا شىعارادى؟ جۋرناليستەر، زەرتتەۋشىلەر بارلىعى ناقتى فاكتىمەن كورسەتتى ەمەس پە، – دەدى ول.

ساكەن مايعازيەۆتىڭ ادۆوكاتى ايجان نۇرلىقۇلوۆا 14 شىلدەدە ازاتتىق تىلشىسىنە "قازىر كوممەنتاري بەرە المايمىن. ءىستىڭ ءمان جايى سوت بارىسىندا انىقتالادى" دەپ قىسقا قايىردى. ال مايعازيەۆتىڭ ءوزىنىڭ قازاقستاندا ەمەستىگى حابارلاندى.

وسىعان دەيىن "شىمكەنتتە ناۋرىز مەرەكەسىن تويلاۋعا بيۋدجەتتەن 565 ملن تەڭگە بولىنگەنى" جايلى اقپارات تاراپ، قوعامدا داۋ تۋعىزعان. شىمكەنت قالاسىنىڭ اكىمدىگى اقپاراتتى جوققا شىعاردى. بۇعان دەيىن ازاتتىق تىلشىسىنە بەرگەن سۇحباتىندا قالالىق مادەنيەت ءۇيىنىڭ جەتەكشىسى ساكەن مايعازيەۆ "ناۋرىز شارالارىنا ارى كەتكەندە 180 ميلليون تەڭگەنىڭ ارى جاق، بەرى جاعىنداعى اقشا جۇمسالدى. 565 ميلليون تەڭگە ەمەس" دەپ مالىمدەگەن. ول "تەكسەرۋ جۇمىستارى جۇرگىزىلىپ، ولقىلىق تابىلمادى" دەپ ايتقان.

دەگەنمەن مەملەكەتتىك ساتىپ الۋ سايتى دەرەگىنە قاراعاندا، ناۋرىز مەرەكەسىنە وراي دەگەن اتاۋى بار كەلىسىم-شارت سومالارى 180 ملن تەڭگەدەن اناعۇرلىم كوپ.

Abai.kz