ەلوردادا تاۋەلسىزدىكتىڭ 30 جىلدىعى قارساڭىندا اسكەري-تاريحي مۋزەي جانىنداعى الاڭدا مەملەكەت قايراتكەرى جۇمابەك تاشەنوۆكە ەسكەرتكىش اشىلدى.

"بۇگىن كورنەكتى مەملەكەت قايراتكەرى، ەلىمىزدىڭ گۇلدەنۋىنە ۇلكەن ۇلەس قوسقان جۇمابەك تاشەنوۆكە ەسكەرتكىش اشىپ وتىرمىز. وسىعان دەيىن نۇر-سۇلتاندا ۇلى تۇلعامىزعا كوشە اتى بەرىلگەن بولسا، جۋىردا مەكتەپكە ەسىمى قويىلدى. ەندى مىنە كەزەك ەسكەرتكىشكە كەلىپ وتىر. اعامىزدىڭ ءمۇسىنى كوميسسيا مۇشەلەرىنىڭ، زيالى قاۋىم وكىلدەرىنىڭ، ۇرپاقتارىنىڭ كەلىسىمىمەن قۇيىلدى. ءدال سونداي-اق ەسكەرتكىشتىڭ تۇرعان ورنى دا مۇددەلى تاراپتاردىڭ كەلىسىمىمەن تاڭدالدى. بۇگىنگى ەلوردا وتانىمىزدىڭ تەك ساياسي عانا ەمەس مادەني جانە رۋحاني ورداسى. بۇگىنگە دەيىن نۇر-سۇلتاندا ەلىمىزدىڭ تانىمال تۇلعالارىنا ارنالعان بىرقاتار ەسكەرتكىش اشىلدى. تاۋەلسىزدىگىمىزدىڭ 30 جىلدىعى قارساڭىندا پاندەمياعا قاراماستان ەلىمىزدىڭ رۋحانياتىن كوتەرەتىن باستامالار ارى قاراي دا جالعاسا بەرەدى", - دەدى نۇر-سۇلتان قالاسى اكىمىنىڭ ورىنباسارى اسحات ورالوۆ.

تاشەنوۆتىڭ ۇرپاقتارى دا ءسوز سويلەدى. "جۇرت مەنەن اكەڭنىڭ اتىن نەلىكتەن ناسيحاتتامايسىڭ، ەلگە سىڭىرگەن ەڭبەگىن نە ءۇشىن ايتپايسىڭ دەپ سۇراپ جاتادى. ال مەنىڭ ويىمشا ەلگە سىيلى ازاماتتىڭ ەڭبەگىن حالقى ءوزى باعالاۋى ءتيىس. بۇگىنگى اشىلىپ وتىرعان ەسكەرتكىش حالىقتىڭ اكەمە دەگەن سىي-قۇرمەتى دەپ بىلەمىن", - دەدى سايان جۇمابەكۇلى.

جۇمابەك تاشەنوۆ ەسكەرتكىشىنىڭ ساۋلەتشىسى – ق.قورعانوۆ، ءمۇسىنشى – ە.ەرجانوۆ. ءمۇسىن قولادان، تۇعىرى گرانيتتەن قۇيىلعان، ەسكەرتكىشتىڭ جالپى بيىكتىگى 8,2 مەتر.

Abai.kz