قازاقستان قوعامىندا ۆاكتسيناتسياعا قارسى پىكىرلەر مەن ويلار ايتىلۋدا. باسىم كوپشىلىك ءدىني جورالعىلارعا سايكەس ۆاكتسيناتسيا جۇمىستارىنا تىيىم سالىنعان دەيدى. الاياد بۇل اقپاراتتىڭ مۇلدە شىندىققا جاناسپايتىنىن ءتۇرلى ءدىن وكىلدەرى مەن باسشىلىقتارى قاداپ ايتۋدا.

ۆاكتسيناتسيا-بۇل كوروناۆيرۋستىق پاندەميامەن كۇرەستەگى باستى قارۋ جانە COVID-19-دان قورعانۋدىڭ بىردەن-ءبىر ءتيىمدى ءادىسى. بۇل بۇكىل الەم عالىمدارىنىڭ كوپتەگەن زەرتتەۋلەرىمەن دالەلدەندى. دەگەنمەن، «ءدىن ۆاكتسيناتسياعا رۇقسات ەتپەيدى» دەگەندەر دە بار. ءدىن وكىلدەرى مۇنداي مالىمدەمەنى اداسۋ جانە جاڭساق پىكىر دەپ اتاۋدا.

نۇر-سۇلتان مەن اقمولا وبلىسىنىڭ باس ءراۆۆينى شمۋەل كارناۋحتىڭ ايتۋىنشا، تاۋرات جازباسىندا دارىگەرلەردىڭ ۇسىنىستارىن ورىنداۋ قاجەت دەلىنگەن. “تاۋراتتا ۆاكتسيناتسياعا ەشقانداي شەكتەۋلەر جوق. كەرىسىنشە، جازبادا دارىگەرلەردىڭ نۇسقاۋلارىن ورىنداڭىز دەيدى. وكىنىشكە وراي، ۆاكتسيناتسيانىڭ زياندى ەكەنىنە تالاساتىندار بار، بىراق ولار ءتىپتى مەديتسينانى تۇسىنبەۋى مۇمكىن. ەگەر ادام ولاردى تىڭداي وتىرىپ، ۆاكتسينا ەگىلمەسە جانە وسى اۋرۋدان قايتىس بولسا، وندا ەكپە الماۋعا شاقىراتىن ادامدارعا جاۋاپكەرشىلىك جۇكتەلەدى “، - دەدى شمۋل كارناۋح.

استانانىڭ دىندەردى زەرتتەۋ ورتالىعىنىڭ تەولوگى مارات سماعۇلوۆ ەلدەگى جانە الەمدەگى قازىرگى ەپيدەميولوگيالىق جاعدايعا بايلانىستى ازاماتتار ساقتىق شارالارى مەن الدىن الۋ شارالارىن ساقتاۋى ءتيىس ەكەنىن اتاپ ءوتتى. «ءبىزدىڭ ۋاقىتتا، پاندەميا كەزىندە، اۋرۋدان قورعانۋ، ياعني ۆاكتسيناتسيالاۋ وتە ماڭىزدى. ءمۇفتيات جۇمىسشىلارى دا، دارىگەرلەر دە ۆاكتسيناتسيا قاجەت ەكەنىن ايتادى. يسلامدا كوپتەگەن وبا نەمەسە جۇقپالى اۋرۋ پايدا بولسا، مۇسىلماندى ودان قورعاۋ كەرەك، قازىرگى تىلمەن ايتساق ۆاكتسيناتسيالاۋ كەرەك دەگەن كوپتەگەن حاديستەر بار”، - دەدى ول. بۇرىنعى ءومىر ىرعاعىنا ورالۋدىڭ بىردەن-ءبىر دۇرىس جولى - حالىقتى جاپپاي ەگۋ ارقىلى ۇجىمدىق يممۋنيتەتتى قالىپتاستىرۋ. ول ءۇشىن ازاماتتاردىڭ 60% CVI-گە قارسى ۆاكتسينانى الۋى ءتيىس. الايدا «ءدىن رۇقسات ەتپەيدى» دەگەن جالعان سىلتاۋدى العا تارتىپ، ۆاكتسينا الۋدان قاشاتىن جانە وزگەلەردى دە الماۋعا ۇگىتتەيتىن جانداردىڭ سانى كوپ بولىپ تۇر.

ەلىمىزدىڭ بارلىق ءدىن وكىلدەرى ونىڭ قاتە ەكەنىن ەسكەرتىپ، ءتىپتى قاسيەتتى كىتاپتاردا ادامعا بەرىلگەنى جانىنىڭ امانات ەكەنىن ايتىپ، ونى قورعاۋ جانە ساقتاۋ مىندەت ەكەنىن ەسكەرتىپ جاتىر. ۆاكتسينا الماۋعا ءدىن ارقىلى ۇگىتتەيتىندەردىڭ كەي بولىگى راديكالدىق كوزقاراستى ۇستاناتىن جاندار بولىپ وتىر. ولاردىڭ باستى ماقساتى قوعامدى دۇرلىكتىرۋ مەن ەلدەگى پاندەميالىق جاعدايدىڭ ارى جالعاسۋىن قالاۋ جانە سول ارقىلى وزدەرىنىڭ ۇگىت ناسيحاتىن جۇرگىزىپ، مەملەكەتتىك قۇرىلىمدارعا قارسى نارازى پىكىر يەلەرىن ارتتىرۋ، لاڭكەستىك كوزقاراستاردى دامىتۋ. دەگەنمەن مەملەكەت ونداي جوسپارلارمەن جۇيەلى كۇرەسىپ كەلەدى. ول ۇلتتىق قاۋىپسىزدىك دەڭگەيىنەن باستالىپ، يدەولوگيالىق جانە ءدىني ناسيحات دەڭگەيىندە دە كورىنىس تابۋدا. ءدىن ۆاكتسينا الۋدى قولدايدى جانە ونى ازاماتتاردىڭ يگىلىگى ءۇشىن دەپ سانايتىنىن ۇمىتپاۋ جانە ناسيحاتتاۋ ماڭىزدى بولىپ وتىر. سوندىقتان ءدىن وكىلدەرى ءدىني جورالعىلاردى، ياعني ناماز وقۋ، بىرلەسە ءدىني مەرەكەلەردى اتاپ ورىنداۋ (پاندەميالىق جاعدايدى ەسكەرە وتىرىپ) بارىسىندا دا بۇل تۋرالى ناسيحات ايتۋدى باستادى.

Abai.kz