اقش ۇكىمەتى قازاقستانعا COVID-19 ىندەتىمەن كۇرەسكە قوسىمشا 2,4 ميلليون دوللار بولەدى. بۇل تۋرالى قازاقستانداعى اقش ەلشىلىگى مالىمدەدى.

«بۇگىن اقش ۇكىمەتى اقش حالىقارالىق دامۋ جونىندەگى اگەنتتىگى (USAID) ارقىلى قازاقستانعا Covid-19 ىندەتىنە قارسى كۇرەستە كومەك كورسەتۋ ماقساتىمەن 2,4 ميلليون اقش دوللارىن ءبولۋ تۋرالى جاريالادى. اتالعان كومەك ناقتى دەرەكتەر نەگىزىندە ۆاكتسينالاردى ەنگىزۋ بويىنشا شەشىمدەر قابىلداۋعا، ۆاكتسينالار تۋرالى جالعان اقپاراتقا دەن قويۋ بويىنشا جەرگىلىكتى الەۋەتتى دامىتۋعا، COVID-19 ناقتىلاۋدى جۇزەگە اسىرۋ ءۇشىن زەرتحانالىق جۇيەلەردى جەتىلدىرۋگە، سونداي-اق، قازاقستاننىڭ ۆاكتسينالاردى پايدالانۋعا دايىندىعىن ارتتىرۋعا جانە ولاردى جەتكىزۋ پروتسەدۋرالارىن جەتىلدىرۋگە ىقپال ەتەتىن بولادى»,- دەلىنگەن حابارلامادا.

بۇل كومەك پاندەميا باستالعاننان بەرى Covid-19 ىندەتىنە قارسى كۇرەس باعدارلاماسى شەڭبەرىندە قازاقستانعا جىبەرىلگەن 6,8 ميلليون اقش دوللارىنان استام مولشەردەگى قارجىلاندىرۋدى تولىقتىراتىن بولادى. بۇگىنگى تاڭدا USAID 5000 استام مەديتسينا قىزمەتكەرىنە COVID-19 ىندەتىنە بايلانىستى تاقىرىپتار بويىنشا، سونىڭ ىشىندە اۋرۋدىڭ الدىن-الۋ جانە باقىلاۋ، سونىمەن قاتار بيولوگيالىق قاۋىپسىزدىكتى قامتاماسىز ەتۋ پرينتسيپتەرى بويىنشا وقىتۋدى ۇيىمداستىردى. ءوز قىزمەتىندە USAID حالىقتىڭ حاباردارلىعىن ارتتىرۋ جانە جالعان اقپاراتپەن كۇرەسۋ ءۇشىن بەلسەندى توپتاردى جۇمىلدىرۋ ارقىلى 8,2 ميلليوننان استام ادامدى قامتىدى.

وسىنداي كۇش-جىگەر جۇمساۋدىڭ نەگىزىندە اقش ءومىردى قۇتقارۋ بويىنشا ونداعان جىلدار بويعى ەڭبەك جانە دەنساۋلىق ساقتاۋ سالاسىنداعى جاھاندىق داعدارىستاردى ەڭسەرۋدەگى جەتەكشى ءرولى جاتىر. سوڭعى 60 جىل بارىسىندا USAID ميلليونداعان ادامنىڭ ءومىرىن ەبولا، ايتۆ/جيتس، تۋبەركۋلەز، بەزگەك جانە قازىر COVID-19 سياقتى اۋرۋلاردان قۇتقارۋعا كومەكتەستى.

اۋرۋلار شەكارانى ەڭسەرمەيدى. اقش قازاقستانمەن بىرلەسە وتىرىپ COVID-19 پاندەمياسىن توقتاتۋ، ونىڭ جويقىن الەۋمەتتىك جانە ەكونوميكالىق سالدارىن جەڭىلدەتۋ جانە بولاشاقتا اۋرۋدىڭ ورشۋىنە قارسى تۇرۋدا ودان دا بەتەر دايىن الەم قۇرۋ ءۇشىن ىنتىماقتاسۋعا مىندەتتەنەدى.

بيىل اقش وكىلدىگى قازاقستان ۇكىمەتىمەن ىنتىماقتاستىقتىڭ 30 جىلدىعىن اتاپ وتۋدە. ەكى ونجىلدىقتان استام ۋاقىت بارىسىندا اقش قازاقستانعا 2 ميلليارد دوللار، سونىڭ ىشىندە تۋبەركۋلەز بەن ايتۆ/جيتس الدىن الۋ جانە ەمدەۋ سياقتى سالالارداعى دەنساۋلىق ساقتاۋ باعدارلامالارىن قولداۋعا 92,8 ميلليون دوللاردان استام قاراجات ءبولدى.

Abai.kz