2021 جىلى ق.توقاەۆ ءۇشىنشى جىل ساياسي داستۇرگە سايكەس ەل پرەزيدەنتى رەتىندە حالىققا جولداۋىن ارناپ، الەۋمەتتىك-ەكونوميكالىق دامۋدىڭ پروبلەمالارى مەن دامۋ جولدارىنا توقتالدى. سونداي-اق، جولداۋدا ءبىلىم بەرۋ ساپاسىن ارتتىرۋ جانە كاسىبيلەندىرۋ مىندەتى باسىمدىق ەتىپ الىندى.
ءبىلىم ساپاسىنىڭ تومەندىگى مەملەكەتتىڭ رۋحاني جانە ۇلتتىق قاۋىپسىزدىگىنە قاۋىپ توندىرەتىنى راس. جولداۋدا قازىرگى ءبىلىم بەرۋدەگى باستى ترەند ينكليۋزيۆتى بىلىمگە نازار اۋدارىلدى، ويتكەنى ول ءبىلىم بەرۋدىڭ ۇلتتىق تۇجىرىمداماسىن مودەلدەۋگە ارنالادى. قازاقستاندا ءبىلىم قۇندىلىعى مەن وعان دەگەن ۇمتىلىس ارقاشان باسقا سالالاردان قالماي كەلە جاتىر. سوڭعى جىلدارداعى كاسىبي ءبىلىم بەرۋ جانە عىلىم سالالارىنداعى پروبلەمالار زياتكەرلىك باعىتتى قايتا قاراۋ كەرەكتىگىن كورسەتەدى. سوندىقتان تۇلعالىق دامۋ مەن قالىپتاسۋ، كاسىبي دەڭگەيدى نىعايتۋ، العان ءبىلىمدى پايدالانۋعا عانا ەمەس، ولاردى تاراتۋعا دا ىقپال ەتەتىن بىلىمگە ازاماتتار بىردەي قول جەتكىزۋ كەرەك ەكەنى ايتىلدى. جولداۋدا ايتىلعانداي، پەداگوگتاردىڭ جوعارعى ميسسياسى – اعارتۋشىلىق.

بۇل ميسسيا قازاقستاندىق مادەني قۇندىلىقتار جۇيەسىن قالىپتاستىراتىن ءبىلىم بەرۋ جانە تاربيەمەن بايلانىستى، ال ولاردىڭ يەرارحياسىندا ءبىلىمنىڭ قۇندىلىعى باسىم بولماق. ن.ل. سەيتاحمەتوۆانىڭ ويىنشا، ءبىلىم تەك ماماندى عانا ەمەس، ادام مەن جەكە تۇلعانى قالىپتاستىرۋى كەرەك. ساپالى ءبىلىم مەكتەپتەن باستالادى. اسىرەسە، اۋىلدىق جەرلەردە مەكتەپتەر سانىن ۇلعايتۋ، ولاردى سالۋ – ءبىلىم بەرۋ پروبلەمالارىن شەشۋدىڭ جولى. وتكەن جىلدار ىشىندە عالىمدار مەن پەداگوگتار ايتارلىقتاي قولداۋعا يە بولىپ، ءتۇرلى گرانتتار مەن ستيپەنديالار ءبولىندى. بىراق گۋمانيتارلىق عىلىمنى باسەكەلىك قابىلەتىن كۇشەيتۋ ءۇشىن مەملەكەتتىڭ قولداۋىن ارتتىرا بەرۋ قاجەت. ساپا، كاسىبيلىك، عىلىم مەن ءبىلىمنىڭ ينتەگراتسياسى، ءبىلىم بەرۋ رەسۋرستارىنا تەڭ قولجەتىمدىلىگى، پەداگوگتەر مەن عالىمداردىڭ كادر دايىنداۋداعى جاۋاپكەرشىلىگى – وسىنىڭ بارلىعى ينكليۋزيۆتى ءبىلىمنىڭ قۇرامداس بولىگى بولىپ سانالادى.

قر پرەزيدەنتى جولداۋداعى سوزىندە: «ورتا ءبىلىم بەرۋ جۇيەسىندەگى وتكىر پروبلەمانىڭ ءبىرى – مەكتەپتەردەگى ورىن تاپشىلىعى. 225 مىڭ وقۋشىعا ورىن جەتىسپەيدى. شۇعىل شارا قابىلداماساق، 2025 جىلعا قاراي ورىن تاپشىلىعى 1 ميلليونعا جەتەدى. مەن 2025 جىلعا دەيىن كەمىندە 800 مەكتەپ سالۋ تۋرالى تاپسىرما بەرگەن بولاتىنمىن. بۇگىن ونىڭ سانىن ءبىر مىڭعا جەتكىزۋدى مىندەتتەيمىن» دەپ ناقتى تاپسىرما بەردى. ارينە بۇل ەلىمىزدەگى ەڭ ۇلكەن كورسەتكىش. بىراق ەلىمىزدە بىرنەشە اۋىسىمدى مەكتەپتەردىڭ ماسەلەسى مەن ماتەريالدىق-تەحنيكالىق بازاسى ءالى شەشىمىن تاپقان جوق. دەگەنمەن بيىلعى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋ پرەزيدەنتتىڭ الدىڭعى رەفورمالاردى ارى قاراي جالعاستىرۋ، جەتىلدىرۋ جانە پروبلەمالاردى شەشۋ باعىتىنا ارنالاتىنىنا سەنەمىن.

مادينا ءاشىم، رەسپۋبليكالىق دەبات ويىندارىنىڭ بىرنەشە مارتە جەڭىمپازى

Abai.kz