ەسكى قازاقستان كەزىندە دە، جاڭا قازاقستان كەزىندە دە پارلامەنتتەن، ناقتى ايتقاندا سەناتتان ۇزاماعان ماۋلەن اشىمباەۆ كەشەلى-بەرى ءتىل جاناشىرلارىنىڭ تالقىسىنا ءتۇسىپتى.

الەۋمەتتىك جەلىدە ءوز پاراقشاسى بار سەنات توراعاسى ءبىرازدان بەرى جاڭا باستامانى قولعا الىپتى. «Taldau Talks» دەگەن تالقىلاۋ ۇيىمداستىرىپ، وعان ءوزىنىڭ ساياسي لاۋازىمى مەن بەدەلىنىڭ ارقاسىندا مينيسترلەردى، پرەمەر-ءمينيستردىڭ ورىنباسارى، ۇلتتىق بانك توراعاسى سياقتى تۇلعالاردى شاقىرىپ، اڭگىمەگە تارتىپتى. جۋرناليست جالعاس ەرتايدىڭ جازۋىنشا اتالعان جوبانىڭ وسى ۋاقىتقا دەيىن مەملەكەتتىڭ ماڭىزدى تاقىرىپتارىن تالقىلاعان 2-3 ساعاتقا سوزىلعان 6 شىعارىلىمى جارىق كورىپتى. وكىنىشتىسى بىردە-بىرەۋىندە ءبىر اۋىز ءسوز مەملەكەتتىك تىلدە ايتىلماپتى.

جۋرناليست: «ماۋلەن اشىمباەۆتىڭ پودكاستى ورىسشا جۇرگىزۋى - ساياسي تاڭداۋ. بۇل - قازاق ءتىلىنىڭ مارتەبەسى تەك قاعاز جۇزىندە ەكەنىنىڭ ايقىن كورىنىسى»، - دەپ كۇيىنىپتى.

سەنات توراعاسى ماۋلەن اشىمباەۆتىڭ ءتىل جاناشىرلارىنىڭ تالقىسىنا ءتۇسۋى تەگىننەن تەگىن ەمەس. ەڭ اۋەلى فاميلياسىنا بايلانىستى بولسا كەرەك. ماۋلەن قازاقتىڭ ايگىلى ادەبيەتشىسى، سىنشىسى ساعات اشىمباەۆتىڭ تۇياعى. قوعامدا كەڭەس زامانىندا تانىلعان ادەبيەتشىلەردىڭ ۇرپاقتارىنىڭ انا ءتىلىن بىلمەي وسكەنى جايىنداعى سىن ءجيى ايتىلادى. سەنات توراعاسى ولاردىڭ قاتارىندا ەمەس، انا ءتىلىن جاقسى بىلەدى. «ماسكەۋگە وقۋعا بارىپ انا ءتىلىمدى ۇمىتىپ قالدىم» دەگەن تيمۋر سۇلەيمەنوۆتىڭ مەملەكەتتىك ءتىلدى قايتادان ۇيرەنىپ، ەل الدىندا سويلەپ جۇرگەنى بەلگىلى. سەنات توراعاسى ۇلتتىق بانك توراعاسىمەن قازاقشا سۇحبات قۇرسا ەل الدىندا دا، ساياسي ۇپايدا دا ۇتپاسا ۇتىلماس ەدى.

ەڭ باستىسى پارلامەنتتىڭ جوعارى پالاتاسى سەنات حالىققا ۋاكىلدىك ەتەدى. باسقا مينيستىرلىكتەرگە ۇقسامايدى. حالىق دەگەندە ەلىمىزدەگى باستى ەلەكترود قازاق حالقى باستى ورىندا تۇراتىنى بەلگىلى. وزگە ۇلتتاردا مەملەكەتتىك ءتىلدى قۇرمەتتەيدى. ۇيرەنىپ تە ءجۇر. ەندەشە سەنات توراعاسىنىڭ كەلەلى ماسەلەلەردى ارىپتەستەرىمەن ورىسشا تالقىلاۋى اقىلعا سيمايدى. ءسىز قالاي ويلايسىز وقىرمان؟

Abai.kz