ءماجىلىس توراعاسى نۇرلان نىعماتۋلين فرانتسۋز رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ديدە كانەسسپەن قازاقستان مەن فرانتسيا اراسىنداعى ىنتىماقتاستىقتىڭ باسىم باعىتتارىن تالقىلادى.

كەزدەسۋدە فرانتسيا ەلىمىزدىڭ ەۋروپالىق وداقتاعى ستراتەگيالىق ارىپتەسى ەكەنىن ايتقان ءماجىلىس سپيكەرى قازاقستان باسشىلىعىنىڭ ەكىجاقتى ساياسي بايلانىستاردى نىعايتۋعا، سونداي-اق ەكى ەل اراسىنداعى ساۋدا-ەكونوميكالىق ءوزارا ءىس-قيمىلدى كەڭەيتۋگە ەرەكشە نازار اۋداراتىنىن اتاپ ءوتتى.

نۇرلان نىعماتۋلين مەملەكەت باسشىسىنىڭ باستاماسىمەن ەلىمىزدە ءوتىپ جاتقان ساياسي جۇيەنى رەفورمالاۋ، ەكونوميكانى جاڭعىرتۋ، ازاماتتىق قوعامدى دامىتۋ ۇردىستەرىنە نازار اۋداردى.

سونىمەن قاتار، تاراپتار ەكىجاقتى ىنتىماقتاستىقتى تەرەڭدەتۋدىڭ باسىم باعىتتارى تۋرالى ايتا كەلە، كولىك جانە ەنەرگەتيكا، دەنساۋلىق ساقتاۋ جانە ءبىلىم بەرۋ سالالارىن اتاپ ءوتتى.

فرانتسيا ەلشىسى ديدە كانەسس تۇراقتى دامۋ جانە «جاسىل» ەكونوميكاعا كوشۋ سالاسىندا قوس مەملەكەت اراسىنداعى قارىم-قاتىناستاردى دامىتۋ باسىمدىققا يە ەكەنىن ايتتى. بۇدان باسقا، قازاقستان مەن فرانتسيانىڭ اۋىل شارۋاشىلىعىنداعى ءوزارا ءىس-قيمىلدىڭ الەۋەتى زور ەكەنىنە توقتالدى.

نۇرلان نىعماتۋليننىڭ ايتۋىنشا، بەيىندى كوميتەتتەر مەن ىنتىماقتاستىق جونىندەگى توپتار اراسىنداعى تۇراقتى كەزدەسۋلەر تاجىريبەسىن قايتا باستاۋ زاڭنامالىق قىزمەتتى، ونىڭ ىشىندە ونەركاسىپتى ەكولوگيالىق ترانسفورماتسيالاۋ، تسيفرلاندىرۋ جانە ت. ب. ماسەلەلەر بويىنشا تاجىريبە الماسۋعا ىقپال ەتەتىن بولادى.

Abai.kz