جەكەمە حات كەلىپتى. پوست قىلىپ شىعارىڭىزشى دەگەن وتىنىشپەن. وقىپ وتىرىپ ويلانىپ قالدىم. شىنىمەن دە، دەموكراتيالى قوعام قۇرۋىمىزعا بيلىك، جەمقورلىق، اقىر اياعى كرەمل كىنالى ەكەن. ال سول دەموكراتيالى ەلدەر سياقتى ماڭايىمىزدى تازا ۇستاساق كىم كەدەرگى؟ حوش، حات سويلەسىن.

جاستار، ۇلدار، جاسوسپىرىمدەر (ىشىندە مۇمكىن قىزدار دا بار بولار، مۇمكىن بۇنى ىستەگەن جاستار ەمەس ەركەكتەر دە بولۋى مۇمكىن) سەندەر ەلدەرىڭە جاقسى وزگەرىس، جاڭا دەموكراتيالى قوعام قۇرىپ بەرە المادىڭدار-مىنا جۇيەنى جەڭە الماي ايتقانىنا كوندىڭدەر، جاقسى ءومىردى اكەلەرىڭە، انالارىڭا، حالقىڭا جاساي المادىڭدار، ءجارايدى وعان دا ءبارىمىز كىنالىمىز، بارىنە كوندىگىپ ءجۇرمىز. ەڭ قۇرعاندا تازا ءجۇرۋ، تۇرىپ جاتقان جەرىڭدەگى اۋلاڭدى بۇلدىرمەي شاشپاي، قيراتپاي، تۇرىپ جاتقان ۇيىڭدەگى ليفت، باسپالداقتاردى بۇلدىرمەي تەمەكى تارتىپ بوتەلكە قالدىعى ت.ب.قوقىم-قوقىستاردى تاستاپ لاستاماي ءجۇرۋدى ۇيرەنىپ بويلارىڭا دارىتساڭدار ەتتى .وسى كىشكەنتاي ءىستى ىستەۋ قولدارىڭنان كەلەتىن شىعار-اقىرى ەلدى جاڭا دەموكراتيالى ەلگە اينالدىرا الۋعا كۇشىمىز كەلمەي بىرەۋدەن قورقىپ وتىرادى ەكەنسىڭدە.
بۇ نەنى ايتىپ وتىر ءوزى دەپ وتىرعاندارعا تۇسىنىكتى قىلىپ جازايىن. قازاقتىڭ باسىندا نە بار كرەديت بار جانە بولعاندا دا 2-3تەن ەكەنىن ءبارىمىز بىلەمىز.سول كرەديتتى تولەۋ ءۇشىن جاقىن عوي دەپ كوپ ادامدا ۇيلەرىنىڭ ماڭايىنداعى كسك ت.ب. جەرلەرگە سىپىرۋشى، ەدەن جۋشى بوپ جۇمىسقا تۇراتىنى كوپ. سول كرەديتتەر ءۇشىن 12قاباتتى جاڭادان سالىنعان ميكرواۋدان تك(جك دەپ اتاپ كەتكەن) ەدەن جۋشى بوپ تۇردىم.12قاباتتى ءۇيدىڭ 3-ءۋىن ءبىر ادامعا بەكىتىپ تازالاۋعا بەرەدى ەكەن. ءبىر ايەل 72قاباتتى+باسپالداقتار جاعىن + 2 ءليفتىنى جۋ وڭاي شارۋا ەمەس.

Cول بەكىتىلىپ بەرىلگەن 3 ءۇيدىڭ بىرەۋىن ءبىر كۇندە جۋىپ شىعۋىڭ كەرەك. 2 پودەزدى ،12+12=24 قاباتتى جۋىپ شاڭدارىن ءسۇرتىپ شىعۋىڭ كەرەك. جالاقىسى 80 مىڭ تەڭگە. تاڭعى 8-دەن كەشكى بەسكە دەيىن گرافيگى. بۇگىن 24قاباتتى جۋعان ايەل ەرتەڭىنە قولىن كوتەرىپ تۇرا الا ما جوق پا-ونىمەن ەشكىمنىڭ ءىسى جوق. ايقايلاپ وتىرعان باستىقتار، جۋسا دا جۋمادى دەي بەرەتىن تۇرعىندار. 5 كۇن بۇرىن 24 ەتاجدىڭ تاپ-تازا قىلىپ جۋىپ كەتكەن باسپالداق جاقتى(لەستنيتسا جاعى بولەك)كورگەندە وكىرىپ تۇرىپ جىلاپ وتىرىپ قالدىم. 5 كۇن بۇرىن قينالىپ تۇرىپ تازالاپ جۋعان باسپالداقتار تەمەكى، كولا، ىشىمدىك بوتەلكەلەرى، بوتەلكە سىنىقتارى،ءتىپتى بوتەلكەگە ءسيىپ قۇيىپ قويعان، ودان قالسا ۇلكەن دارەتكە وتىرىپ بەتىن چيپسىدىڭ قاعازىمەن جاۋىپ قويعان.
بۇنداي سۇمدىق ناستىق، وڭباعاندىق ، تارتىپسىزدىك ەش ەلدە جوق-اۋ. وسىنىڭ ءبارى 12-ءشى قاباتتان1-ءشى قاباتقا دەيىن ىستەلگەن، بىلعانىش. بىرەۋلەر جۋاتىن ايەلدەرگە وڭاي بولماسىن دەپ ادەيى ىستەپ كەتكەن دەپ ويلاعىڭ كەپ-اق تۇرادى. دالانى جيناپ جۇرگەن كىلەڭ قازاق كىسىلەر، الپىسقا تاياپ قالعان قارتتاۋ ادامدار ولار دا تاڭعى 5-تەن تۇسكى 4-كە شەيىن دالانى جيناپ بىتە الماي جۇرگەندەرى. كۇندەگىسى وسى قوقىستى توننالاپ ەسىكتىڭ الدىنا ءۇيىپ كەتەدى، قولدارىمەن اپارىپ قوقىس تاستاۋعا ەرىنەتىندەرى ۇيىنەن شىعىپ تاستاي سالادى. كونبىس، مومىن قازاق شالدار ۇندەمەي ءسوز دە ايتپاي جيناپ ارباعا سالىپ قوقىسقا اپارىپ توگىپ جاتقاندارى.

دالانى دا شاشادى، ءۇيدىڭ باسپالداقتارىن دا شاشادى. دالانى جيناپ جۇرگەن اكەسىندەي قازاق قارتتى دا ايامايدى، ءۇيدىڭ باسپالداعىن ، ءليفتىسىن، ەتاجىن جۋىپ جۇرگەن اناسىنداي قازاق ايەلدەرىن دە ايامايدى-تاۋلىكتەپ شاشۋدى، قوقىس تاستاۋدى عانا بىلەتىن ۇرپاق، جاستار، ۇلدار، بالالار ءوسىپ شىققان ەكەن.

اسكەرگە جىبەرگەن بالانى سۋيتسيد دەپ ولتىرە سالىپ، ءوزى اۋىردى، مىنەزى وزگەردى دەپ-وتىرىكتى سۋداي ساپىرىپ قازاق بالالارىن قىرىپ جوق قىپ جاتقان اسكەرى بار-نە دەگەن 'كەمەڭگەر"ەدىك...

بارلىق جاعىنان الىپ قاراساڭ دا الىمجەتتىك، شاشۋ، ءبۇلدىرۋ، توناۋ.
ال ەلىڭدى كىم كوركەيتەدى؟
كوركەيتەدى دەگەن "الگىلەر" مە ،مىنبەدە ەجەلەپ قازاقشا سويلەي الماي تۇرعان؟

ورىس پەن قىتاي بار بايلىعىڭدى تالاپ اپ جاتقاندا ،ەلدەگىلەردىڭ بىلەتىنى تەك شاشۋ، توبەلەسۋ، ءولتىرۋ عانا ەكەن ىستەپ جاتقان تىرلىكتەرى.
ايتقىم كەلگەنى جان-جاعىمىزدى كۇتەيىك، ىشكى مادەنيەتىمىزدى تۇزەيىك، سىرتقى مادەنيەتتى تۇزەيىك، جۇرگەن جەرىڭدى شاشىپ بىلعاي بەرمەي ءبىر مەزگىل جيناپ جۇرگەن ايەلدەر مەن كوشەنى ەسىگىڭنىڭ الدىن سىپىرىپ بەرىپ جۇرگەن قارتتاردىڭ ەڭبەگىن باعالايىق. شاشپايىق. اكەڭدەي، اناڭداي ادامدار جيناپ ءجۇر عوي-ءبىر مەزگىل ويلانىپ قويىڭىزدار تۇراتىن جەرلەرىڭدى لاستاي بەرمەي .

ءجاي سوزبەن ايتقان شىنايى بولماي قالعان سياقتى، نەگىزى شاشىلعان جەرلەردى كوزبەن كورگەندە عانا مىنانى ىستەگەن ادام با الدە...، دەر ەدىڭىزدەر...

اقىرى دۇرىس دەموكراتيالى قوعام جاساپ، وزگەرىس جاساي المادىق، ەڭ قۇرعاندا تۇرعان جەرىڭدى لاستاماۋدى ۇيرەنىڭىزدەر، جاستار، بالالار،ۇلدار، ەرلەر!

وڭعار مىرزا، اتى-ءجونىمدى جازباي-اق قويىڭىزشى. وسى جۇمىس ىستەپ اقشا تاۋىپ وتىرعان جۇمىسىمنان ايىرىلىپ قالارمىن.

وڭعار قابدەن

Abai.kz