اعىمداعى جىلدىڭ 17-24 قاراشاسى ارالىعىندا وزبەكستاننىڭ وڭتۇستىگىندەگى، اۋعانستانمەن شەكارالاس تەرمەز اۋداندىق پوليگونىندا قازاق-وزبەك بىرلەسكەن وقۋ-جاتتىعۋى وتەدى.

بىرلەسكەن مانەۆرلەردىڭ ماقساتى – بىرلەسكەن مىندەتتەردى شەشۋ بارىسىندا باۋىرلاس ەكى مەملەكەتتىڭ قارۋلى كۇشتەرىنىڭ ۇيلەسىمدىلىگى مەن ءوزارا ءىس-قيمىل دەڭگەيىن ارتتىرۋ.

وقۋ-جاتتىعۋعا قازاقستان تاراپىنان 100-دەن استام اسكەري قىزمەتشى قاتىسادى، كوپفۋنكتسيونالدى سۋ-30سم جويعىشتارى، س-295 اسكەري-كولىك ۇشاقتارى، تاكتيكالىق ۇشقىشسىز ۇشۋ اپپاراتتارى دا جاتتىعۋدان كورىنبەك.

قازاقستاندىق بولىمشەلەردىڭ جاۋىنگەرلىك دايارلىعىنىڭ مىندەتتەرىنە ىزدەستىرۋ-بارلاۋ جۇمىستارىن جۇرگىزۋ، قارسىلاستىڭ الدىڭعى قاتارلى جاساقتارىن جويۋ، شابۋىلعا تويتارىس بەرۋ جانە زاڭسىز قارۋلى قۇرالىمداردى جويۋ، جارالىلار مەن جارامسىزداردى ەۆاكۋاتسيالاۋ كەزىندەگى جاۋىنگەرلىك قاراۋىل بولىمشەلەرىنىڭ ءىس-قيمىلدارىن جاتتىقتىرۋ كىرەدى.

Abai.kz