قازاقستان رەسپۋبليكاسى پارلامەنتى ءماجىلىسىنىڭ دەپۋتاتى،
«Nur Otan» پارتياسىنىڭ فراكتسيا مۇشەسى ە. سايروۆتىڭ قازاقستان رەسپۋبليكاسى پرەمەر-ءمينيستردىڭ ورىنباسارى ر. سكليارعا دەپۋتاتتىق ساۋالىن جولدادى. دەپۋتات ءوز ساۋالىندا كومىر تاپشىلىعى ماسەلەسىن كوتەرگەن. 

پرەزيدەنت قاسىم – جومارت كەمەلۇلى توقاەۆ «پاندەميا كەزىندەگى باستى مىندەت-حالىقتىڭ الەۋمەتتىك دەڭگەيىن ۇستاپ تۇرۋ» دەپ اتاپ ءوتتى.
ءبىزدىڭ دەپۋتاتتىق ساۋالىمىز ەلىمىزدىڭ بىرقاتار وڭىرلەرىنەن كەلىپ تۇسكەن وتىنىشتەرگە بايلانىستى تۋىندادى، ول ايماقتاردا تۇرمىستىق كومىردىڭ جەتىسپەۋشىلىگىنەن شيەلەنىستى جاعداي قالىپتاسقان.

ەلىمىزدە كومىردىڭ جۇيەلى جەتىسپەۋشىلىگى ءۇشىن وبەكتيۆتى العىشارتتار بولماسا دا، ەل ازاماتتارىنىڭ مورالدىق-پسيحولوگيالىق جاعدايىنا تەرىس اسەر ەتەتىن دۇرلىكپە ءجۇرىپ جاتىر.
وسىنداي جاعداي كومىر ءوندىرۋ بويىنشا الەمنىڭ 10-ەلىنىڭ قاتارىنا ەنەتىن مەملەكەتتە بولىپ وتىر!

بۇگىنگى كۇنى حالىققا كومىر ساتۋ تىزبەگىندە شامامەن 10 - عا تارتا بۋىن قالىپتاسقان، سونىڭ نەگىزگىلەرى: بۇل كومىر ءوندىرۋ رازرەزى، تەمىر جولمەن جونەلتۋگە ارنالعان تيەۋ پۋنكتتەرى، تەمىر جول ارقىلى تاسىمالداۋ، تەمىرجول تۇيىقتارىندا قابىلداۋ تەرمينالدارى، كومىردى تۇتىنۋشىلارعا جەتكىزەتىن تاراتۋ پۋنكتتەرى. وسى كەزەڭدەردىڭ بارلىعىندا اركىم ءوز پايداسىن قىمقىرۋعا تىرىسادى، وسىعان بايلانىستى باعا قىمباتتاي بەرەدى.

ياعني، كومىر باعاسىن دەلدالدىق قۇرىلىمدار نۇسقاپ وتىر.
كومىردى بيرجالىق ساۋدالاۋدىڭ ەرەجەلەرى دەلدال - كاسىپورىندارعا كومىردى ۇلكەن كولەمدە ساتىپ الۋعا جانە ونى بىردەن رازرەزدەن ەكى - ءۇش ەسە قىمبات باعامەن ساتۋعا مۇمكىندىك بەرەدى دەپ ايتۋعا نەگىز بار.
ساتۋ نۇكتەلەرىندەگى كومىردىڭ جەتىسپەۋشىلىگى كومىردى جەتكىزەتىن ۆاگونداردىڭ تاپشىلىعىنا بايلانىستى. سوندىقتان، كومىر رازرەزدەن ساتۋ نۇكتەسىنە 6 كۇندە ەمەس، 16 كۇندە جەتكىزىلەدى!

بۇگىندە رازرەزدەن تونناسى شامامەن 7800 تەڭگەدەن ساتىلىپ جاتقان كومىر الماتى، اقمولا، قىزىلوردا، قوستاناي، شىعىس قازاقستان، سولتۇستىك قازاقستان وبلىستارىنداعى ساۋدا نۇكتەلەرىندە تونناسى 25-30 مىڭ تەڭگەدەن ساتىلۋدا! وسىلايشا، تۇپكى تۇتىنۋشى ءۇشىن باعا باستاپقىدان ءۇش-ءتورت ەسە وسەدى.

بۇل اۋىلداعى اعايىننىڭ قالتاسى مۇلدەم كوتەرمەيتىن باعا!
وسى قىپ-قىزىل باعاعا كومىردىڭ ءوزى تاپشى! قاقاعان قىستا ازاماتتار اقشاسىن تولەپ قويىپ، كومىردى توسۋعا ءماجبۇر!

«Nur Otan» پارتياسى فراكتسيا مۇشەلەرى ازاماتتار ءۇشىن تۇرمىستىق كومىر قولجەتىمدى جانە ءادىل باعامەن ساتىلۋى ءتيىس دەپ سانايمىز.
حالىققا تۇرمىستىق كومىر جەتكىزۋدىڭ وتكىر الەۋمەتتىك ماڭىزدىلىعىن ەسكەرە وتىرىپ، كەلەسى قادامدار قاجەت:
1. اۋىلدىق ەلدى مەكەندەردىڭ تۇرعىندارىنىڭ تۇرمىستىق تۇتىنۋى ءۇشىن كومىردىڭ نورماتيۆتىك قورىن قالىپتاستىرۋدى جەدەل قامتاماسىز ەتۋ.
2. كومىردى ساتۋ ورىندارىنا تاسىمالداۋ ءۇشىن قاجەتتى ۆاگون سانىن بولۋگە باسىمدىق بەرۋ.
3. كومىر باعاسىن قالىپتاستىرۋدىڭ اشىقتىعىن جانە كومىردى كوتەرمە ساتىپ الۋشىلار اراسىنداعى بارىنشا باسەكەلەستىكتى قامتاماسىز ەتۋ.
4. نارىق سۋبەكتىلەرىنىڭ اراسىنداعى باسەكەلەستىككە قارسى كەلىسىمدەردى بولدىرماۋ، تۇرمىستىق كومىر تۇتىنۋشىلارىنىڭ تۇپكىلىكتى باعاسىن قالىپتاستىرۋعا دەلدالدىق بايلانىستاردىڭ اسەرىن بولدىرماۋ بويىنشا جۇمىستاردى جۇرگىزۋ.

دەپۋتاتتىق ساۋالعا «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا سايكەس جاۋاپ بەرۋىڭىزدى سۇرايمىز.

Abai.kz