جۇما, 29 ناۋرىز 2024
بەتبۇرىس 4329 19 پىكىر 6 جەلتوقسان, 2021 ساعات 14:03

سىردىڭ سۋى، ارالدىڭ قۇمى: ميرزيەەۆ قازاقستاندا

وزبەكستان باسشىسى شاۆكات ميرزيەەۆ قازاقستانعا كەلدى. 5-6 قاڭتار ارالىعىندا ەل استاناسىندا وزبەكستان مەن قازاقستان اراسىنداعى كەلىسسوزدەر وتەدى. وزبەك باسشىسىن قاسىم-جومارت كەمەلۇلى توقاەۆ ارنايى شاقىرعان. 

وزبەكستان باسشىسىن پرەزيدەنتتىڭ ءوزى اۋەجايدا كۇتىپ الدى. بۇل جوعارى قۇرمەت پەن كەلىسسوزدەردىڭ ماڭىزدىلىعىن بىلدىرەدى. راسىمەن ەكى ەل تالقىلايتىن تاقىرىپ تا جەتەرلىك.

اۋعانستانداعى جاعداي ەكى ەلدى دە الاڭداتىپ وتىر. وزبەكستان تىكەلەي شەكارالاس بولسا، قازاقستان ءۇشىن ايماقتىڭ تىنىشتىعى ماڭىزدى. سوڭعى ۋاقىتتا اۋعانستاندا جاعداي كۇرت ناشارلاپ، تەررورلىق قاۋىپ ارتتى. تالىبتەر بيلىگى ەلدەگى الەۋمەتتىك جاعدايدى شەشە المايتىنى بەلگىلى بولدى، سالدارىنان بوسقىندار سانى ارتۋدا. ازىرگە ولار پاكىستان مەن يرانعا اعىلۋدا، الايدا ورتالىق ازياعا دا بەت بۇرۋ مۇمكىندىگىن جوققا شىعارۋعا بولمايدى. سوندىقتان بۇل ماسەلە دە باسشىلار اراسىنداعى كەلىسسوزدە ايتىلارى انىق.

تالىبتەرگە قارسى وزگە تەررورلىق ۇيىمداردىڭ شابۋىلى ارتتى. دايش (يگيل) شابۋىلدى ۇدەتە ءتۇستى. دايش قازىر ەلدىڭ 34 ايماعىندا دا بار، سوندىقتان ولار ەندىگى تاڭدا تەك قانا اۋعانستانعا ەمەس، تۇتاس ورتالىق ازياعا قاۋىپتى دەڭگەيگە ءوتتى دەيدى ساراپشىلار. قازاقستان-وزبەكستان ءوزارا بۇل ماسەلەنى دە تالقىلايدى، سەبەبى تاشكەنت ۇقشۇ ۇيىمىندا جوق جانە قاۋىپ ساتىندە مەملەكەتارالىق كەلىسىمدەرگە سۇيەنەدى.

ايماقتىق قاۋىپسىزدىكتەن بولەك ءوزارا ماسەلەلەر دە جەتەرلىك. قازاقستان سىرداريا ماسەلەسىن شەشۋگە مۇددەلى. سىردىڭ سۋى تىكەلەي ماعىناسىندا سيراقتان كەلمەيتىن ساتكە جەتتى. بۇل تۇتاس قىزىلوردا ايماعىن سۋسىز قالدىرماق. سوندىقتان تاشكەنتپەن كەلىسىپ، بۇل ماسەلەنى شەشۋ ماڭىزدى، ال تاشكەنت ءۇشىن رەسەيگە وتەتىن ميگرانتتار ماسەلەسى مەن قازاقستاندا قىزمەت ەتەتىن ەڭبەك ميگرانتتارىن جۇيەلەۋ ماڭىزدى. سوندىقتان كەلىسسوزدەر قىزۋ بولماق دەگەن بولجامدار بار.

ەكى ەل اراسىنداعى تاۋار اينالىمىن ارتتىرۋ دا كۇن تارتىبىندە. كوروناداعدارىستان كەيىن تاۋار اينالىمى ءتۇسىپ كەتتى. كوروناۆيرۋسپەن بىرلەسە كۇرەسۋ دە باستى تاقىرىپتىڭ ءبىرى. ارال ماسەلەسىن رەتتەۋدى دە ايتپاي كەتۋ مۇمكىن ەمەس، سەبەبى قازاقستانعا الەمدىك قاۋىمداستىق جاقسى باعا بەرسە، وزبەكستان ەكولوگيالىق جاعدايدى جاقسارتۋعا العان قارجىنى ءتيىمدى يگەرە الماعان.

نۇر-سۇلتان قالاسىندا وتكەن ەكى ەل اراسىنداعى ەكونوميكالىق فورۋمدا قۇنى ءوزارا 5.9 ملرد دوللار بولاتىن قۇجاتتارعا قول قويىلدى. باستى كەزدەسۋلەر ەندى بولماق.

Abai.kz

 

 

19 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3558