ەل تاۋەلسىزدىگىنىڭ 30 جىلدىعىن مەرەكەلەۋ قارساڭىندا قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا ءماجىلىس توراعاسى نۇرلان نىعماتۋلين پاۆلودار وبلىسىنىڭ تۇرعىندارىنا مەملەكەتتىك ناگرادالاردى تابىس ەتتى.

نۇرلان نىعماتۋلين پاۆلودار وبلىسى ەگەمەن ەلىمىزدىڭ قالىپتاسۋىنا، ءوسىپ-وركەندەۋىنە، دامۋىنا ەلەۋلى ۇلەس قوسىپ كەلە جاتقان ءىرى ورتالىق جانە يندۋستريالدىق ايماق ەكەنىن اتاپ ءوتتى. بۇگىنگى كۇنى وسى ايماقتا تۇڭعىش پرەزيدەنت – ەلباسى نۇرسۇلتان ءابىشۇلى نازارباەۆتىڭ ستراتەگيالىق يدەيالارى جانە مەملەكەت باسشىسى قاسىم-جومارت كەمەلۇلى توقاەۆتىڭ ماڭىزدى باستامالارى تابىستى جۇزەگە اسىرىلىپ، ولار تەك وبلىستىڭ عانا ەمەس، جالپى ەلىمىزدىڭ ەكونوميكالىق دامۋىنا زور ىقپال ەتىپ كەلەدى دەدى.
سونىمەن قاتار، پالاتا سپيكەرى پاۆلودار وبلىسى - يننوۆاتسيالىق-يندۋستريالىق دامۋ، ءىرى ونەركاسىپ، مۇناي، ەلەكتر ونىمدەرىن ءوندىرۋ سياقتى باسقا دا سالادا جوعارى كورسەتكىشتەرگە يە بولعان، مەملەكەتىمىزدىڭ الەۋمەتتىك، ەكونوميكالىق دامۋىنا ىقپال ەتىپ كەلە جاتقانىن ايماق ەكەنىن ەرەكشە اتاپ ءوتتى.

ەلىمىزدىڭ جانە ءوڭىردىڭ الەۋمەتتىك-ەكونوميكالىق جانە مادەني دامۋىنا قوسقان ەلەۋلى ۇلەسى ءۇشىن پاۆلودارلىقتار جوعارى مەملەكەتتىك ناگرادالارعا يە بولدى.

اتاپ ايتقاندا، II دارەجەلى «بارىس» وردەنى مۇعالىم ناتاليا پوكيدوۆا، «پاراسات» وردەنى ەڭبەك ارداگەرى ءابي سارقىنشاقوۆقا تابىستالدى. «قۇرمەت» وردەنىن كومىر كەنىشىنىڭ ءماشينيسى سەرگەي ششەرباكوۆ، اقىندار عالىمبەك جۇماتوۆ پەن ارمان قاني يەلەنسە، ال III دارەجەلى «ەڭبەك داڭقى» وردەنىن – سىعىمداۋشى ەديك بالتاباەۆ، ەنەرگوبلوك ءماشينيسى اناتولي كامنەۆ، جابدىقتاردى جوندەۋ قىزمەتىنىڭ شەبەرى ۆلاديمير لەۆانين، «اقسۋ» فەرروقورىتپا زاۋىتىنىڭ بالقىتۋشىسى ورال مىرزاتاەۆ يەلەندى.

«ەرەن ەڭبەگى ءۇشىن» مەدالى تاريحشى، ولكەتانۋشى ەرنەست سوكولكينگە، دارىگەرلەر ەلتاي باتحولدينگە جانە زينايدا رازدورسكاياعا، ورمان شەبەرى ۆلاديمير پوكورسكيگە، كاسىپكەر گۇلميرا نۇرحانوۆاعا بەرىلدى. قازاقستان رەسپۋبليكاسىنىڭ «قۇرمەت گراموتاسىمەن» «قازاقستاننىڭ قىزىل جارتى اي قوعامى» وبلىستىق فيليالىنىڭ باسشىسى گۇلنار يساقانوۆا، ا. پ. چەحوۆ اتىنداعى پاۆلودار وبلىستىق دراما تەاترىنىڭ جەتەكشىسى ۆيكتور اۆۆاكۋموۆ ماراپتالدى.

Abai.kz