ءماجىلىس توراعاسى نۇرلان نىعماتۋلين رۋمىنيا رەسپۋبليكاسى پارلامەنتى سەناتى توراعاسىنىڭ ورىنباسارى الينا- شتەفانيا گورگيۋ باستاعان دەلەگاتسيا وكىلدەرىمەن كەزدەستى.

نۇرلان نىعماتۋلين رۋمىنيا قازاقستاننىڭ تاۋەلسىزدىگىن مويىنداعان ەۋروپاداعى العاشقى ەلدەردىڭ ءبىرى ەكەنىن جانە ماڭىزدى ساياسي، ەكونوميكالىق سەرىكتەس ەل ەكەنىن اتاپ ءوتتى.

پالاتا سپيكەرىنىڭ ايتۋىنشا، قازاقستان مەن رۋمىنيا اراسىنداعى قارىم-قاتىناستارىنىڭ قالىپتاسۋى مەن دامۋىنداعى شەشۋشى ءرولدى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ اتقارىپ، بۇگىندە پرەزيدەنت قاسىم-جومارت توقاەۆ رۋمىنيامەن ارىپتەستىكتى كەڭەيتۋگە ۇلكەن ءمان بەرەدى.

سونداي-اق، ءماجىلىس توراعاسى الينا گورگيۋدىڭ ەلىمىزگە ساپارى پارلامەنتارالىق ديالوگتى ودان ءارى نىعايتۋعا جانە مەملەكەتتەر اراسىنداعى ەكىجاقتى ىنتىماقتاستىقتى دامىتۋعا قۋاتتى سەرپىن بەرەتىنىن ايتتى.

ءوز كەزەگىندە، رۋمىنيا پارلامەنتى سەناتى توراعاسىنىڭ ورىنباسارى قازاقستان – رۋمىنيا ءۇشىن ماڭىزدى سەرىكتەس ەل ەكەنىن جانە پارلامەنتارالىق بايلانىستى ودان ءارى نىعايتۋعا نيەتتى ەكەنىن جەتكىزدى. سونىمەن قاتار، ساۋدا-ەكونوميكالىق ىنتىماقتاستىق، اۋىل شارۋاشىلىعى، ەكولوگيا، جەڭىل جانە تاماق ونەركاسىبى سالالارىنا قاتىستى باسىم باعىتتارعا نازار اۋداردى.

ءماجىلىس توراعاسى قازاقستان مەن رۋمىنيا پارلامەنتشىلەرىنىڭ بىرلەسكەن جۇمىسىن جانداندىرۋ زاڭ شىعارۋ سالاسىنداعى تاجىريبە الماسۋعا، سونداي-اق پارلامەنتارالىق ۇيىمدار اياسىنداعى ءوزارا تىعىز قارىم-قاتىناسقا ىقپال ەتەتىنىنە سەنىم ءبىلدىردى.

Abai.kz