قازاقستان بۇۇ-نىڭ ەلەكتروندىق ۇكىمەتتى دامىتۋ رەيتينگىندە 16-ورىنعا كوتەرىلدى
قازاقستان بۇۇ-نىڭ ەلەكتروندىق ۇكىمەتتى دامىتۋ يندەكسىندە (UN EGDI) 24-ورىننان 16-ورىنعا كوتەرىلىپ، العاش رەت ەڭ جوعارى رەيتينگتىك ساناتقا ەندى. ەكى جىل ىشىندە 8 ساتىعا جوعارىلاۋ بۇۇ بايانداماسىندا كوشباسشى ەلدەر اراسىنداعى ەڭ ەلەۋلى ىلگەرىلەۋدىڭ ءبىرى رەتىندە اتالدى. قازاقستان وسىنداي دەڭگەيگە جەتكەن وڭىردەگى العاشقى ەل بولدى. بۇل ناتيجە مەملەكەت باسشىسىنىڭ قازاقستاندى تولىققاندى تسيفرلىق ەلگە اينالدىرۋ جونىندەگى تاپسىرماسىن ىسكە اسىرۋدىڭ جانە مەملەكەتتىك باسقارۋدى ترانسفورماتسيالاۋدىڭ نەگىزگى قۇرالى رەتىندە جاساندى ينتەللەكتىنى دامىتۋعا باسىمدىق بەرۋدىڭ تىكەلەي ناتيجەسى.
ەڭ جوعارى رەيتينگتىك ساناتقا ەلەكتروندىق ۇكىمەتى بارىنشا دامىعان الەمنىڭ 21 مەملەكەتى كىرەدى. قازىر قازاقستان كورەيا، دانيا، سينگاپۋر، ۇلىبريتانيا، ەستونيا جانە اقش-پەن ءبىر قاتاردا. 2026 جىلى بۇل ساناتقا العاش رەت بار بولعانى ءۇش ەل: قازاقستان، يرلانديا جانە پولشا ەندى.
ەكى جىل ىشىندە قازاقستان 2024 جىلى رەيتينگتە وزىنەن جوعارى تۇرعان شۆەتسيا، گەرمانيا، يرلانديا، جاڭا زەلانديا، اۆستريا جانە جاپونيادان وزىپ كەتتى. ەل يندەكسى الەمدىك ورتاشا كورسەتكىش 0,6675 بولعان جاعدايدا 0,9009-دان 0,9363-كە دەيىن ءوستى.
ەكى جىل ىشىندە تسيفرلىق مەملەكەت قۇرۋدىڭ ۇلگىسى رەتىندە تانىلعان ەستونيامەن اراداعى الشاقتىق ءتورت ەسە قىسقاردى. تمد جانە ورتالىق ازيا ەلدەرى اراسىندا قازاقستان تاعى دا ءبىرىنشى ورىندا. الەمدىك رەيتينگتە وزبەكستان 32-ورىندا، ازەربايجان 38-ورىندا، رەسەي 50-ورىندا تۇر.
ءوسىم نەگىزگى باعىتتاردىڭ بارلىعى بويىنشا قامتاماسىز ەتىلدى. بۇۇ بايلانىس سالاسىنداعى ايتارلىقتاي ىلگەرىلەۋدى اتاپ ءوتتى: ءموبيلدى بايلانىس پەن ينتەرنەتتىڭ قولجەتىمدىلىگى بويىنشا قازاقستان الەمدىك رەيتينگتە 41-ورىننان 13-ورىنعا كوتەرىلىپ، تەلەكوممۋنيكاتسيالىق ينفراقۇرىلىم دەڭگەيى بويىنشا ەستونيامەن تەڭەستى. ازاماتتار تسيفرلىق سەرۆيستەردى بەلسەندى ءارى سەنىمدى پايدالانا باستادى: تسيفرلىق ساۋاتتىلىق كورسەتكىشى شامامەن 1,5 ەسە ءوستى، ال ءبىلىم مەن داعدىلار دەڭگەيى بويىنشا ەل 42-ورىننان شامامەن 28-ورىنعا كوتەرىلدى. تسيفرلىق ۇكىمەتتىڭ قۇقىقتىق بازاسى بۇۇ تاراپىنان ەڭ جوعارى باعاعا يە بولدى.
بۇۇ بايانداماسىندا ورتالىق ازيا 2026 جىلدىڭ باستى تابىس تاريحتارىنىڭ ءبىرى رەتىندە اتالدى. eGov.kz جانە eGov Mobile ەكوجۇيەسى ينتەگراتسيالانعان تسيفرلىق مەملەكەتتىڭ ۇلگىسى رەتىندە، ال alem.ai حالىقارالىق ورتالىعى ءبىلىم بەرۋ، زەرتتەۋ، ستارتاپتار جانە قولدانبالى جاساندى ينتەللەكتىنى دامىتۋ الاڭى رەتىندە اتاپ ءوتىلدى. بۇۇ ساراپشىلارىنىڭ باعالاۋىنشا، قازاقستان قول جەتكىزگەن جوعارى دەڭگەيىنە سۇيەنە وتىرىپ، ءوز پوزيتسياسىن ودان ءارى نىعايتىپ كەلەدى. مۇنداعى جەتىستىك جەكەلەگەن سايتتاردىڭ دامۋىمەن عانا شەكتەلمەيدى، ول مەملەكەتتىك ورگانداردىڭ ءوزارا ءىس-قيمىل پلاتفورمالارىن، تسيفرلىق سايكەستەندىرۋدى، ءموبيلدى سەرۆيستەر مەن حالىققا قىزمەت كورسەتۋ ورتالىقتارىن بىرىكتىرەتىن بىرىڭعاي جۇيەنىڭ قالىپتاسۋىمەن بايلانىستى.
Abai.kz