ءماجىلىس ەلدەگى جاعدايدى تۇراقتاندىرۋعا باعىتتالعان زاڭ جوبالارىن جەدەل قارايتىن بولادى. بۇل تۋرالى بۇگىن پالاتا توراعاسى نۇرلان نىعماتۋلين جالپى وتىرىستا ايتتى. 

ءماجىلىس سپيكەرى اتاپ وتكەندەي، كەشە عانا  ءماجىلىستىڭ ونلاين وتىرىسىنا قاتىسقان مەملەكەت باسشىسى قاسىم-جومارت كەمەلۇلى توقاەۆ قازاقستانىمىزدىڭ الدىندا تۇرعان نەگىزگى ماقسات-مىندەتتەردى    بەلگىلەپ  بەردى.

سونىمەن قاتار، پرەزيدەنتتىڭ تاپسىرماسى  بويىنشا ەلىمىزدە بۇرىن بولماعان  جاڭا «قازاقستان حالقىنا» قوعامدىق  قورى قۇرىلاتىنىن ايتقان پالاتا سپيكەرى ول قور تىكەلەي الەۋمەتتىك سالاداعى ماڭىزدى ماسەلەلەردى   شەشۋمەن اينالىسادى.   سونىمەن بىرگە،  ەكى ايدىڭ ىشىندە  حالىقتىڭ تۇرمىسىن جاقسارتۋ باعدارلاماسى  قابىلداناتىن بولادى.

- مەملەكەت باسشىسىنىڭ الەۋمەتتىك-ەكونوميكالىق، ساياسي رەفورمالارىن جۇزەگە اسىرۋ ءۇشىن پارلامەنتكە، سونىڭ ىشىندە، ماجىلىسكە ۇلكەن   جاۋاپكەرشىلىك     جۇكتەلىپ  وتىر.  سوندىقتان، ءبىزدىڭ دەپۋتاتتىق كورپۋس بارلىق باستامالاردى جەدەل، ءتيىستى زاڭدارمەن  قامتاماسىز ەتۋ جۇمىسىنا  كىرىستى.  بۇل جولدا جەكە تۇلعالاردىڭ  بانكروتتىعى تۋرالى،  سونىمەن بىرگە، ەلىمىزدىڭ قاۋىپسىزدىگىن قورعاۋعا، كاسىپكەرلىكتى قولداۋعا،  اسىرەسە، اۋىل شارۋاشىلىعىن، شاعىن جانە ورتا بيزنەستى دامىتۋعا، حالىقتىڭ تابىسىن ارتتىرۋعا جانە ءبىلىمدى كۇشەيتۋگە   ەرەكشە نازار   اۋداراتىن بولامىز، - دەدى نۇرلان نىعماتۋلين.

ءماجىلىس توراعاسى دەپۋتاتتار ۇكىمەتپەن بىرلەسىپ، وسى جۇمىستاردى جوعارى دەڭگەيدە جۇزەگە اسىرۋ كەرەكتىگىن باسا اتاپ ءوتتى.

Abai.kz