سارسەنبى, 25 مامىر 2022
بيلىك 1553 0 پىكىر 12 قاڭتار, 2022 ساعات 18:47

قاسىم-جومارت توقاەۆ جەدەل شتابتىڭ وتىرىسىن وتكىزدى

مەملەكەت باسشىسىنىڭ توراعالىعىمەن جەدەل شتاب وتىرىسى ءوتتى. وندا ۇكىمەتتىك كوميسسيانىڭ توراعاسى، پرەمەر-ءمينيستردىڭ ءبىرىنشى ورىنباسارى رومان سكليار، الماتى قالاسىنىڭ اكىمى باقىتجان ساعىنتاەۆ، ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆ جانە ىشكى ىستەر، قورعانىس، توتەنشە جاعدايلار مينيسترلەرى بايانداما جاسادى.

پرەزيدەنتكە الماتى قالاسىنا قوسىمشا كۇشتەر، سونىڭ ىشىندە ۇقشۇ بىتىمگەرلىك كونتينگەنتىنىڭ كۇشتەرىن جۇمىلدىرۋعا قاتىستى بەرگەن تاپسىرماسىنىڭ ناتيجەسىندە قالا لاڭكەستەردەن تولىق تازارتىلعانى تۋرالى باياندالدى.

قازىرگى ۋاقىتتا قالا تىرشىلىگىن قامتاماسىز ەتەتىن بارلىق سالانىڭ جۇمىسىن قالپىنا كەلتىرۋ بەلسەندى ءجۇرىپ جاتىر.

قالا اكىمى باقىتجان ساعىنتاەۆتىڭ حابارلاۋىنشا، قالانى جىلۋ، ەلەكتر قۋاتى، سۋ جانە گازبەن قامتاماسىز ەتەتىن بارلىق نىسان قالىپتى جۇمىس ىستەپ جاتىر. ساۋدا ورتالىقتارى، قوعامدىق تاماقتانۋ ورىندارى، بازارلار، جانارماي بەكەتتەرى جانە ونەركاسىپ ورىندارى جۇمىستارىن جانداندىرۋدا، قوعامدىق كولىك ىسكە قوسىلعان.

قاسىم-جومارت توقاەۆقا زارداپ شەككەن اكىمشىلىك عيماراتىندا 14 قالالىق باسقارما بولعانى، قازىرگى ۋاقىتتا ولاردىڭ رەزەرۆتىك عيماراتتارعا، سونداي-اق اكىمشىلىككە قاراستى ۇيىمدارعا ورنالاستىرىلعانى جونىندە اقپارات بەرىلدى.

بۇدان بولەك تارتىپسىزدىك كەزىندە كەلتىرىلگەن شىعىن كولەمىن انىقتاۋ جۇمىستارى جۇرگىزىلۋدە. مەملەكەت باسشىسى ەلىمىزدىڭ ءىرى قالاسىنا جاسالعان تەرروريستىك شابۋىل سالدارىن ءوز كوزىمەن كورۋ ءۇشىن الماتىعا ارنايى كەلگەنىن ايتتى.

پرەزيدەنت ۇكىمەتتىك كوميسسياعا الماتى قالاسىنىڭ اكىمدىگىمەن بىرلەسە وتىرىپ، ينفراقۇرىلىم نىساندارىن، ونىڭ ىشىندە مەملەكەتتىك، قۇقىق قورعاۋ جانە ارناۋلى قۇرىلىمداردىڭ عيماراتتارىن، بەينەباقىلاۋ جۇيەسىن قىسقا مەرزىم ىشىندە قالپىنا كەلتىرۋدى تاپسىردى.

سونىمەن قاتار زارداپ شەككەن كاسىپكەرلەرگە قولداۋ كورسەتىلەدى.

وزدەرىڭىزگە ءمالىم، الماتى – مەنىڭ تۋعان قالام. وسىندا دۇنيەگە كەلدىم، وقىدىم. الدىمىزدا قىسقا مەرزىم ىشىندە قالانى قالپىنا كەلتىرۋ مىندەتى تۇر. بۇل – مەنىڭ پرەزيدەنت رەتىندە جانە ەلىمىزدىڭ ازاماتى رەتىندە پارىزىم. قالانىڭ قالپىنا كەلەتىنىنە ەش كۇمان جوق. ۇكىمەتتىڭ الدىندا قالانىڭ كەلبەتىن بۇرىنعىدان دا جاقسارتۋ مىندەتى تۇر. بۇل وتە ۇلكەن جۇمىس, – دەدى قاسىم-جومارت توقاەۆ.

مەملەكەت باسشىسى الدا ۇقشۇ بىرلەسكەن بىتىمگەرلىك كونتينگەنتىنىڭ بولىمشەلەرىن قايتارۋ جۇمىستارى جۇرگىزىلەتىنىن ايتتى.

– ەرتەڭ ۇقشۇ بىرلەسكەن بىتىمگەرلىك كونتينگەنتىن ەلدەن شىعارۋ جۇمىستارى باستالادى. مەن ءتيىستى مەملەكەتتەردىڭ باسشىلارىمەن سويلەستىم. وسى ءساتتى پايدالانىپ، وسى بىرنەشە كۇندە جۇرگىزگەن اۋقىمدى جۇمىستارى ءۇشىن كونتينگەنتتىڭ باسشىلىعىنا العىس ايتامىن. ۇقشۇ بىتىمگەرلىك كونتينگەنتىنىڭ قازاقستانعا، سونىڭ ىشىندە الماتىعا كەلگەنى جالپى ەلىمىزدەگى جاعدايدى تۇراقتاندىرۋدا ۇلكەن ءرول اتقاردى. بۇل ارەكەتتەردىڭ لاڭكەستەر مەن سودىرلاردىڭ اگرەسسياسىن قايتارۋدا ۇلكەن پسيحولوگيالىق ماڭىزى بولعانى ءسوزسىز. ميسسيا وتە ءساتتى ءوتتى. مەنىڭ ارىپتەستەرىمە ۇيىمعا مۇشە ەلدەردىڭ باسشىلارىنا ۇلكەن العىس بىلدىرەمىن، – دەدى پرەزيدەنت.

جەدەل شتاب وتىرىسىنىڭ قورىتىندىسى بويىنشا ۇكىمەتتىك كوميسسيا مەن جەرگىلىكتى اكىمدىكتەر بىرلەسىپ قىسقا مەرزىم ىشىندە بارلىق ايماقتاعى نىسانداردى قالپىنا كەلتىرۋگە، كولىكتەردىڭ ۇزدىكسىز جۇمىسىن رەتتەۋگە، ازىق-تۇلىكپەن قامتاماسىز ەتۋگە، سونداي-اق شاعىن جانە ورتا بيزنەس نىساندارىنىڭ جۇمىسىن جانداندىرۋعا كۇش سالۋ تاپسىرىلدى.

Abai.kz

0 پىكىر