بۇگىن ەكس-پرەزيدەنت نۇرسۇلتان نازارباەۆتىڭ كەنجە قىزى ءاليا نازارباەۆا ەلدەگى جاعدايلارعا قاتىستى Facebook-تەگى پاراقشاسىندا شاعىن جازبا جاريالادى. ول ءوز جازباسىندا ءوزى جانە اكەسى ن.نازارباەۆقا مورالدىق قولداۋ بىلدىرگەن ازاماتتارعا العىسىن ايتىپ، «قاڭتار وقيعاسى» كەزىندە قازا تاپقانداردىڭ وتباسىلارىنا كوڭىل ايتتى.

ءاليا نازارباەۆا نە دەدى؟

«قۇرمەتتى دوستار! ءبىزدىڭ ەلىمىزدە بولىپ جاتقان ترەگەديالىق جاعدايلار جۇرەگىمدى اۋىرتادى. قازا تاپقاندار مەن قۇربان بولعاندار ءۇشىن قانشالىقتى قايعىراتىنىمدى سوزبەن جەتكىزۋ مۇمكىن ەمەس. قازا تاپقانداردىڭ وتباسىلارىنا شىن جۇرەكتەن كوڭىل ايتامىن.

وسى ءبىر اۋىر ساباق ءبارىمىز ءۇشىن تاريحىمىزداعى سوڭعى وقيعا بولسىن. بەيبىت كۇندە ادامدار ولگەنى دۇرىس ەمەس.

سىزدەرگە قولداۋ بىلدىرگەندەرىڭىز ءۇشىن العىس ايتامىن. جانە ءدال قازىرگىدەي ساتتە مەنىڭ اكەمە ءبىلدىرىپ جاتقان مورالدىق قولداۋلارىڭىزعا راحمەتىمدى ايتقىم كەلەدى. ول قازىر ەلىمىزدىڭ ءار ايماعىنان كوپتەگەن حاتتار الىپ وتىر. قازاقستانعا بەيبىتشىلىك پەن گۇلدەنۋ، قازاقستاندىقتارعا دەنساۋلىق پەن اماندىق تىلەيمىن»، - دەپ جازدى ءاليا نازارباەۆا.

نۇرسۇلتان نازارباەۆ قايدا ءجۇر؟

ال ەكس-پرەزيدەنت نۇرسۇلتان نازارباەۆتىڭ ءوزى «قاڭتار وقيعاسىنا» جانە ەلىشىلىك ساياسي وقيعالارعا، ۇقك باسشىسىنىڭ جانە ونىمەن بىرگە بىرنەشە ادامنىڭ تۇتقىندالۋىنا، ۇكىمەتتەگى اۋىس-تۇيىستەر مەن پرەزيدەنت توقاەۆتىڭ مالىمدەمەلەرىنە قاتىستى جاريا تۇردە پىكىر بىلدىرگەن جوق.

ەڭ سوڭعى رەت 28 جەلتوقسان كۇنى پەتەربوردا وتكەن تمد مەملەكەتتەرىنىڭ بەسرەسمي كەزدەسۋىندە كورىندى. سودان بەرى باسپاسوزگە شىققان جوق.

تەك 5 قاڭتار كۇنى پرەزيدەنت توقاەۆ قاۋىپسىزدىك كەڭەسىن ءوزى تىزگىندەيتىنىن مالىمدەدى. ال ەكس-پرەزيدەنت نۇرسۇلتان نازارباەۆ بۇل مالىمدەمەگە قاتىستى دا ءۇنسىز قالدى. تەك ونىڭ ءباسپاسوز قىزمەتكەرى ايدوس ۇكىباي: «كەيىنگى ۋاقىتتا باق پەن الەۋمەتتىك جەلىلەردە قازاقستاننىڭ تۇڭعىش پرەزيدەنتىنە قاتىستى كوپتەگەن جالعان قاۋەسەتتەر مەن ارانداتۋشىلىق جازبالار تارالۋدا. قازىرگى جاعدايدا مۇنداي ارەكەتتى ساياسي جاعدايدى تۇراقسىزداندىرۋ جانە مەملەكەتتىڭ كونستيتۋتسيالىق نەگىزدەرىن بۇزۋ ارەكەتى رەتىندە قاراستىرامىز. بۇرىن مالىمدەگەنىمدەي، ەلباسى وسى كۇندەردە نۇر-سۇلتان قالاسىندا بولىپ، مەملەكەت باسشىسىنا قولداۋ كورسەتۋدە. الايدا، جاعداي وتە قيىن بولدى، سوندىقتان ەلباسىنىڭ ءوزى قاۋىپسىزدىك كەڭەسىنىڭ توراعاسى لاۋازىمىن پرەزيدەنتكە بەرۋ تۋرالى شەشىم قابىلدادى. ويتكەنى ول ەلدە بولىپ جاتقان تارتىپسىزدىكتەر مەن تەررورلىق ىستەر مەملەكەت باسشىلىعىنان جەدەل، قاتاڭ جانە ىمىراسىز جاۋاپ تالاپ ەتەتىنىن جاقسى ءبىلدى»، - دەپ تۇسىنىكتەمە بەرگەن.

نۇرسۇلتان نازارباەۆتىڭ بۇل ۇنسىزدىگى شىن مانىندە ەل ىشىندە ءتۇرلى قاۋەسەتتەردىڭ پايدا بولۋىنا سەبەپ بولدى. الىپ-قاشپا اڭگىمەلەردە ونىڭ قىتايدا جۇرگەنى تۋرالى نەمەسە دەنساۋلىعى ناشارلاپ، ەم قابىلداپ جاتقانى ت.ب. بولجامدار ايتىلدى.

وسىدان كەيىن قىتاي سىرتقى ىستەر مينيسترلىگى رەسمي مالىمدەمە جاساپ، نازارباەۆتىڭ قىتايدا جۇرگەنى تۋرالى اقپاراتتى تەرىستەدى.

«بۇل جالعان اقپارات. ءبىز قازاقستاننىڭ بۇرىنعى پرەزيدەنتىنىڭ ءباسپاسوز قىزمەتىنىڭ نازارباەۆتىڭ قازىر ەل استاناسى نۇر-سۇلتاندا ەكەنى تۋرالى مالىمدەمەگە نازار اۋدارامىز»، - دەپ حابارلادى قحر سىرتقى ىستەر مينيسترلىگى.

8 قاڭتار كۇنى ەكس-پرەزيدەنت نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي «تۆيتتەردە» جازبا جاريالاپ: «ەلباسى قازىر قازاقستان، نۇر-سۇلتان قالاسىندا. جالعان جانە بۇرمالانعان اقپاراتتاردى تاراتپاۋلارىڭىزدى سۇرايمىز. ەلباسى قازاقستان پرەزيدەنتى قاسىم-جومارت توقاەۆپەن تىكەلەي تەلەفون ارقىلى بايلانىسىپ، كونسۋلتاتيۆتىك كەزدەسۋلەر وتكىزىپ جاتىر»، - دەپ مالىمدەگەن.

ارتىنشا، سول كۇنى تاعى ءبىر جازبا جاريالاپ: «نۇرسۇلتان نازارباەۆ سونداي-اق، قازاقستانمەن سەرىكتەس بىرنەشە مەملەكەتتىڭ باسشىلارىمەن دە تەلەفون ارقىلى سويلەسۋدە. ەلباسى مەملەكەتىمىزدىڭ اماندىعى ءۇشىن بارشاڭىزدى قازاقستان پرەزيدەنتىنىڭ ماڭايىنا توپتاسۋعا شاقىرادى»، - دەپ جازدى.

داريعا نازارباەۆا قايدا ءجۇر؟

ال ەكس-پرەزيدەنت نۇرسۇلتان نازارباەۆتىڭ ۇلكەن قىزى ءارى ءماجىلىس دەپۋتاتى داريعا نازارباەۆا 11 قاڭتار كۇنگى ءماجىلىستىڭ جالپى وتىرىسىنا قاتىسپاعان. ءماجىلىستىڭ ءباسپاسوز قىزمەتى داريعا نۇرسۇلتانقىزىنىڭ دەنساۋلىعىنا بايلانىستى جۇمىسقا كەلمەگەنىن مالىمدەگەن.

Orda.kz سايتى داريعا نازارباەۆانىڭ كومەكشىسى جاننا ەرمەكوۆامەن سويلەسكەن ەكەن.  ەرمەكوۆا نازارباەۆانىڭ الماتىداعى ۇيىندە ەكەنىن، كوروناۆيرۋسپەن اۋىرىپ قالعانىن جەتكىزگەن.

بولات نازارباەۆ قايدا ءجۇر؟

سونىمەن قاتار، كەشە قىرعىزستاندىق 24.kg سايتى نۇرسۇلتان نازارباەۆتىڭ ءىنىسى بولات نازارباەۆتىڭ بىشكەك ارقىلى دۋبايعا ۇشىپ كەتكەنىن حابارلادى.

«بولات نازارباەۆ 6 قاڭتار كۇنى قىرعىزستان تەرريتورياسىنا كىردى. الايدا، سول كۇنى-اق، «ماناس» اۋەجايىنان بىشكەك-دۋباي باعىتى بويىنشا ۇشىپ كەتتى»، - دەپ جازدى.

Abai.kz