رەسەي قازىرگى ۋاقىتتا باتىسپەن ۇلكەن قاقتىعىسقا تۇسۋدە. «قىرعي-قاباق سوعىس» كەزەڭى قايتا باستالعانداي. «رەسەي پرەزيدەنتى باتىستىڭ ماقساتى ورىس حالقىن كۇيرەتۋ دەگەنگە سەنەدى، سوندىقتان دا جاقىن ماڭداعى كەز كەلگەن كوتەرىلىس ءپۋتيندى قورقىتادى»، - دەپ جازدى Al Araby. رەسەي مەن ۇقشۇ-نىڭ باسقا دا مۇشەلەرى قازاقستانداعى جاعدايعا بىردەن دەن قويعانى دا سونى اڭعارتادى.

ساياساتتانۋشى مارۆان كابالان رەسەي پرەزيدەنتى ۆلاديمير پۋتينگە قاتىستى ماقالا جازىپ، بىلاي دەيدى.

پۋتين قازاقستاندا اياقاستى بۇرق ەتە قالعان كوتەرىلىستىك سيپاتتاعى تولقۋعا بىردەن نازار اۋداردى. ول قۇددى وزگە ەلدە ەمەس، ءوز ەلىندە نارازىلىق باستالعانداي جىلدام ارەكەتكە كوشتى. قازاقستانداعى ويعا ونى ەسەڭگىرەتىپ تاستادى، سەبەبى ول رەسەي-ۋكراين شەكاراسىنداعى جاعدايعا الاڭداۋلى ەدى. قازىر پۋتين ناتو-عا ۋلتيماتۋم قويىپ، باتىستىق بلوكتىڭ شىعىسقا جىلجۋىنا قارسىلىق ءبىلدىرىپ جاتىر جانە بۇرىنعى پوستكەڭەستىك ەلدەردەگى ىقپالىن ارتتىرۋعا تىرىسۋدا. ال قازاقستاندا كۇتپەگەن جەردەن بولعان تولقۋلار ونىڭ قيىن جاعدايىن ءتىپتى، قيىنداتتى. سوڭعى جيىرما جىل ىشىندە پۋتين رەسەي شەكاراسى ماڭىنداعى حاوستان قورقاتىنى بىلىنۋدە.

پۋتين قازاقستانداعى قايعىلى وقيعالار اياقتالعان سوڭ، ءوزىنىڭ وداقتاستارىن توڭكەرىستەردەن قورعايتىنىن اشىق ايتتى. ونىڭ ۇستىنە پۋتين توڭكەرىستەردىڭ سەبەبى ەكونوميكالىق ماسەلەدە ەمەس، باتىستىڭ قۇيتىرقى ساياساتىندا دەپ سانايدى. رەسەيلىك باسىلىمدار مەن باق وكىلدەرى دە «قازاقستانداعى وقيعالاردى باتىس ۇيىمداستىردى» دەگەن سيپاتتا كورسەتكەنى سودان. رەسەي باسشىسى ۋكراينا، گرۋزيا، قىرعىزستان، ارمەنيا سىندى ەلدەردە بولعان توڭكەرىستەردىڭ ەڭ سوڭعى نۇكتەسى رەسەي بولۋى مۇمكىن دەپ قاۋىپتەنەدى. ول 2011-2012 جىلدارى بولعان رەسەيدەگى تولقۋلاردى ۆاشينگتون تىكەلەي ۇيىمداستىردى دەپ سانايدى.

پۋتين «ورىس الەمى» اتتى جوبانىڭ اياسىندا پوستكەڭەستىك ورىستاردىڭ جاعدايىن جاساۋدى ويلايدى. الايدا باتىستىڭ تۇپكى ماقساتى سول ورىس الەمىن تالقانداۋ دەپ جورامالدايدى، ول ءۇشىن ۋكراينادان باستاپ قازاقستانعا دەيىنگى ارالىقتا بۇلىك سالۋى مۇمكىن دەپ بولجايدى. پۋتين قازاقستانداعى وقيعالاردى باتىستىڭ رەسەيگە كەزەكتى فرونت اشۋى دەپ تە قاراستىرۋى مۇمكىن. پۋتين ءۇشىن قازاقستاننىڭ ۋكراينا سىندى باعىت ۇستاۋى ولىممەن تەڭ.  پۋتين «ورىس الەمى» اتتى جوبانى ءوزى ويلاپ تاپتى، ەندى ءوزى سونىڭ قۇربانى بولۋى مۇمكىن. سەبەبى پوستكەڭەستىك كەڭىستىككە شاشىلعان 20 ملن ورىستىڭ قۇقىعىن قورعاۋ اقىرى ونى تيتىقتاتىپ جىبەرەدى جانە رەسەي بۇل كۇرەستە قازىردىڭ وزىندە جەڭىلە باستادى.

ساياساتتانۋشى مارۆان كابالان وسىنداي وي قورىتىپتى. رەسەي ۇقشۇ اسكەرىن دەرەۋ ارادا كىرگىزۋى الدىن-الا كەلىسىمنىڭ بولعانىن نەمەسە ءپۋتيننىڭ راسىمەن الاڭداۋشىلىعىن بىلدىرسە كەرەك.

Abai.kz