نەمەسە وتەگەنوۆا جۇمىسقا قالاي ورنالاسقان؟..

نەمەسە وتەگەنوۆا جۇمىسقا قالاي ورنالاسقان؟..

بۇگىندە ۇلى جىبەك جولىنىڭ بويىندا ورنالاسقان كيەلى قۇلان وڭىرىندە (جامبىل وبلىسىنا قاراستى ت.رىسقۇلوۆ اۋدانى) كادر ماسەلەسىنىڭ قادىرى قاشىپ تۇر. اسىرەسە، جۋرناليستيكا سالاسىندا. كەزىندە وسى جەرگىلىكتى «قۇلان تاڭى» گازەتىنە حالىق «جۋرناليستەر ۇستاحاناسى»  دەپ لايىقتى باعاسىن بەرگەن بولاتىن. ونىسى راس تا ەدى. ويتكەنى، ول كەزدە  قىزمەت ەتكەن جۋرناليستەر قازاقستان جازۋشىلار وداعىنىڭ مۇشەسى، اقىن كارىپجان ءنۇسىپ، بىلىكتى جۋرناليست تۇرسىنحان جامانباەۆ اعالاردىڭ مەكتەبىنەن ءوتتى. بۇگىنگى كۇنى وبلىستىق «اق جول»، «ار-اي» گازەتتەرىندە جەمىستى ەڭبەك ەتىپ جاتقان ارداق ۇسەيىنوۆا، تابيعات ابايلداەۆ، قامار قاراساي سىندى قالامىنىڭ جەلى بار جۋرناليستەر دە وسى كارەكەڭنىڭ مەكتەبىنەن ءتالىم الدى. ال، ەندى شە... قازىرگى اۋداندىق گازەتتىڭ جاي-كۇيى جانىڭدى كۇيزەلتەدى. وعان سەبەپ جوعارىدا ايتقان كادر ماسەلەسى. ءيا، بۇل گازەتتى (قازىر لۋگوۆوي اۋىلىنىڭ اكىمى) مۇرات ارىستانبەكوۆ بىرنەشە جىل ءتاپ-ءتاۋىر باسقاردى. بىراق ونىڭ دا وسال تۇسى وسى كادر ماسەلەسىندە انىق بايقالدى. وسال تۇسى دەپ اسپەتتەمەي-اق اقيقاتىن ايتار بولساق ترايباليزمگە اشىقتان-اشىق جول بەردى. ماسەلەن، جەرلەستەرىن، رۋلاستارىن ايتپاعاندا كەلىنىنە كوررەكتورلىق قىزمەتتى تىزگىندەپ بەردى. كەلىنى دەمەكشى مەرەكە وتەگەنوۆانى قانداي زاڭعا سۇيەنىپ العانىن ارىستانبەكوۆتىڭ ءوزى ءتۇسىندىرىپ بەرمەسە، ءبىز تۇسىنە المادىق. قولىندا بىردە-ءبىر قۇجاتى جوق «كەلىن» (جەكە ءىس پاپكاسىندا ەڭبەك كىتاپشاسىنان باسقا ءبىر دە ءبىر قۇجاتى جوق،  ونىڭ ءوزى كوشىرمەسى) قاينى اعاسىنىڭ قامقورلىعىنىڭ ارقاسىندا «قۇلان تاڭى» گازەتىندە قىزمەت ەتىپ، ايلىعىن شايلىعىنا جاراتىپ كەلەدى.

ارىستانبەكوۆ اكىم بولىپتى دەگەندى ەستىگەن جۇرت باس رەداكتورلىققا بەلگىلى جۋرناليست، اتالمىش گازەتتە جۋرناليستىك قىزمەتتەن باس رەداكتور قىزمەتىنە دەيىن وسكەن تۇرسىنحان جامانباەۆتى كەلەدى دەپ كۇتكەن. الايدا ەكس  اكىم ابدالى نۇراليەۆ بۇل سالادا جۇمىس ىستەگەن بىلاي تۇرسىن، ەسىگىنەن دە سىعالاپ كورمەگەن سەرىك وتەگەنوۆتى رەداكتور ەتىپ تاعايىنداپ، ونسىز دا وڭباي تۇرعان كادر ماسەلەسىن ودان سايىن ۋشىقتىردى. ءوزىن يدەولوگ سانايتىن وتەگەنوۆ كەلگەن بەتتە بۇل سالانى ۇرشىقشا يىرەتىنىن، گازەتكە جاڭا ءبىر لەپ اكەلەتىنىن جەتكىزدى. دەگەنمەن ايتىلعان ءسوز ايتىلعان جەردە قالىپ قويدى. جاڭا باسشىدان جاڭاشا كوزقاراستى كۇتكەن جۋرناليستەر ۇمىتتەرىنىڭ اقتالمايتىنىن ارادا اپتا وتپەي-اق اڭعاردى. كەڭەستىك جۇيەنىڭ تاربيەسىندە وسكەن وتەگەنوۆ جۋرناليستەرىنە شىندىقتىڭ بەتىنە تۋرا قاراي المايتىن جىگەرسىز ەكەنىن بايقاتىپ الدى. ونى بىلاي قويعاندا گازەت مازمۇندىق جاعىنان  توقىراۋعا ۇشىراپ، ستيليستيكالىق، گرامماتيكالىق قاتەلەردەن كوز اشپايتىن بولدى. ال، اۋداندىق ىشكى ساياسات بولىمىنە گازەتتىڭ وسى شالاجانسار كۇيى قولايلى سەكىلدى مە قالاي، ءالى كۇنگە بۇل ماسەلەگە باس اۋىرتقان ەمەس.

«ايى وڭىنان تۋدى» دەگەن وسى شىعار گازەتكە باس رەداكتور بولىپ سەرىك وتەگەنوۆ كەلدى دە وتەگەنوۆا كوررەكتورلىقتان ورىنباسارلىققا بىراق سەكىردى. «باقساق باقا ەكەن» دەمەكشى مەرەكە وتەگەنوۆا حانىم باس رەداكتور سەرىك وتەگەنوۆتىڭ دە «كەلىنى» ەكەن. بۇنىسى قالاي دەپ باس قاتىرىپ جۇرگەندە باسقا دا زاڭسىزدىقتار بۇرق ەتە قالدى. بۇنىسى ءتىپتى سوراقى. گازەت ديزاينەرى راسۋل توگۋشاقوۆ بالا كۇتىمىنە بايلانىستى دەمالىستا وتىرعان پەريزات كابيراەۆانىڭ ورنىندا جۇمىس اتقارعان بولاتىن. ال، مامىردىڭ 23 جۇلدىزىنان بەرى پ.كابيراەۆا ءوز جۇمىس ورنىنا شىقتى. سوعان قاراماستان ر.توگۋشاقوۆ جۇمىستان كەتكەن جوق جانە بۇگىنگى تاڭدا پروگرامميست بولىپ قىزمەت اتقارىپ ءجۇر. وسى جەردە ۇلكەن قاراما-قايشىلىقتىڭ باسى قىلتيادى. سەبەبى، اۋداندىق گازەت ءساۋىر ايىنىڭ 9 جۇلدىزىندا جشس بولىپ قايتا قۇرىلدى. شتاتتىڭ قىسقارۋىنا بايلانىستى ەكى-ءۇش قىزمەتكەردى جۇمىستان بوساتتى.  جاڭا شتات كەستەسى ءالى بەكىتىلگەن جوق. سوعان قاراماستان  راسۋل توگۋشاقوۆقا پروگرامميست شتاتىن اشىپ بەرگەن. ونى بىلاي قويعاندا ەكى قىزمەتكەردى تاعى الىپ وتىر. سوندا شتات كەستەسى بەكىتىلمەي جاتىپ ول قىزمەتكەرلەرگە شتاتتى قايدان الدى دەگەن زاڭدى سۇراق تۋادى. ايتەۋىر، اۋداندىق گازەتتە بىلىق كوپ، بىراق سونى كورەتىن كوز جوق بولعانى وكىنىشتى. ءسىز نە دەيسىز،  قۇرمەتتى وقىرمان.

«Abai.kz»