قر پرەمەر-ءمينيسترى ءاليحان سمايىلوۆ ۇكىمەت وتىرىسىن وتكىزدى، وتىرىستا كەدەندىك اكىمشىلەندىرۋدى جەتىلدىرۋ ماسەلەسى قارالدى. قر قارجى ءمينيسترى ەرۇلان جاماۋباەۆ بايانداما جاسادى.

قر ۇكىمەتىنىڭ باسشىسى قىتايمەن اراداعى كەدەندىك ستاتيستيكا دەرەكتەرىنىڭ الشاقتىعى سوڭعى 4 جىلدا 20%-عا قىسقارعانىن اتاپ ءوتتى. بۇگىندە قارجى مينيسترلىگى 5 مىڭنان استام تاۋار پوزيتسياسىنىڭ قۇندىق ينديكاتورلارىن قايتا قارادى.

قر پرەمەر-ءمينيسترى ءا. سمايىلوۆ ۋاكىلەتتى ەكونوميكالىق وپەراتورلاردىڭ قىزمەتىنە قويىلاتىن تالاپتاردى زاڭ جۇزىندە كۇشەيتۋ ماسەلەسىن قاراۋدى تاپسىرادى.

پاندەمياعا بايلانىستى شەكتەۋلەر سالدارىنان قازاقستان-قىتاي شەكاراسىندا كولىكتەر تۇرىپ قالعان.

ۋاقىتشا جابىق تۇرعان وتكىزۋ پۋنكتتەرىنىڭ جۇمىسىن قالپىنا كەلتىرۋ ماقساتىندا قىتاي تاراپىمەن بيىلعى جىلعى 15-اقپاننان باستاپ جۇمىس ىستەپ تۇرعان «نۇر جولى»، «باقتى» جانە «دوستىق» وتكىزۋ پۋنكتتەرىنەن بولەك، «مايقاپشاعاي» وتكىزۋ پۋنكتىنىڭ جۇمىسىن قالپىنا كەلتىرۋ تۋرالى كەلىسىمگە قول جەتكىزىلدى.

بۇگىندە ەلىمىزدە كەدەندىك اكىمشىلەندىرۋدى تسيفرلاندىرۋ بويىنشا اۋقىمدى جۇمىس جۇرگىزىلۋدە. قابىلدانىپ جاتقان شارالار كەدەندىك اكىمشىلەندىرۋ پروتسەسىن وڭتايلاندىرۋعا، كەدەندىك راسىمدەر كەزىندە بيزنەستى جۇرگىزۋدى جەڭىلدەتۋگە مۇمكىندىك بەرەدى. سونىمەن قاتار بيۋدجەتكە كەدەندىك تولەمدەر مەن سالىقتاردىڭ تولىق تولەنۋىن قامتاماسىز ەتەدى.

ءا. سمايىلوۆ «استانا-1» جانە «بىرىڭعاي تەرەزە» اقپاراتتىق جۇيەلەرىنىڭ ساپالى جۇمىس ىستەۋىن  قامتاماسىز ەتۋدى تاپسىردى.

بۇگىنگى كۇنى كەدەندىك دەكلاراتسيالاردىڭ 100%-ى قاشىقتان تاپسىرىلادى. 4 ملن استام كەدەندىك دەكلاراتسيا شىعارىلدى، ونىڭ 82%-ى 1 مينۋت ىشىندە اۆتوماتتى تۇردە وتكىزىلگەن. قازىرگى تاڭدا 5 مىڭعا جۋىق پايدالانۋشى تىركەلىپ، مەملەكەتتىك ورگاندارمەن 15 ينتەگراتسيا جۇزەگە اسىرىلدى.

Abai.kz