قازىرگى تسيفرلى زاماندا ءتۇرلى بايلانىس قۇرالدارىنىڭ پايدا بولۋى ءداستۇرلى حات جازۋدى ىعىستىرىپ ءتىپتى ۇمىتتىرىپ بارا جاتقانداي. كوپشىلىگىمىز تەلەفون باردا قولعا قالام الىپ، قاعاز بەتىنە ءتۇسىرىپ اۋرە بولۋدىڭ قاجەتى قانشا دەيمىز. دەگەنمەن دە تەلەفونداعى جازعان حاتتار ەستە ۇزاق تۇرمايدى، تەحنيكانىڭ اتى تەحنيكا، ءجيى اۋىستىرامىز، حابارلامالار ءوشىپ كەتەدى نەمەسە بىرەۋدەن كەلگەن حاتتى سول كۇيى ەكىنشى بىرەۋگە جىبەرىپ جاتامىز. ال، قاعاز حاتتىڭ قۇدىرەتى دە سوندا، جىلدار وتسە دە، كەلگەن حاتتاردى قايتا قاراپ، كوپ ەستەلىكتەردى ەسكە ءتۇسىرىپ، شابىتتاندىرىپ، سول كەزدەگى ەموتسيانى ساقتاپ قالادى.

بيىل قازاقتىڭ كورنەكتى قايراتكەرى عابيت مۇسىرەپوۆتىڭ تۋعانىنا 120 جىل تولۋىنا وراي قازاقستان رەسپۋبليكاسى ورتالىق مەملەكەتتىك ءارحيۆىنىڭ جەكە تەكتىك قورىندا ساقتالعان ع. مۇسىرەپوۆتىڭ قۇجاتتارىنىڭ اراسىنان ايگىلى جازۋشى ءسابيت مۇقانوۆتىڭ «ءبىر ءوتىنىش، مۇنى وزىڭنەن باسقاعا سيرەك كورسەت» دەپ جازعانى كوزگە ءتۇستى. ەكەۋدىڭ دوستىقتارىنان سىر شەرتەتىن بۇل حاتتى نازارلارىڭىزعا ۇسىنۋدى ءجون كورىپ وتىرمىز.

حاتتىڭ وتە باعالى قازىنا ەكەنىنە، وزەگىنە قۇنارىن ەنگىزگەن، جادىراتقان تۇستارى، مىزعىماس ماحاببات، قۇپيا مالىمەت پەن سىرلاردىڭ كۋاسى ەكەنىنە تاعى دا كوز جەتكىزە تۇسەتىنىمىز انىق.

از كۇن ايرىلعانداعى ەسكەرتكىش

عابيت!

سەن بىلمەيتىن ىشىمدە سىرىم بارما؟
سەن سەزبەيتىن قايعى مەن مۇڭىم بارما؟
تاپ سەنەن جاسىراتىن، كولتەلەيتىن،
نە وتىرىك، بولماسا شىنىم بارما؟
ساعان ءمالىم مەن جۇرگەن جاس بالامىن،
بولماشى ىسكە شاتتانىپ قۋانامىن،
كوزىمنەن جاسىم اعىپ جىلاپ تۇرىپ،
مينۋتتا قايتا كۇلىپ ۋانامىن!

ءبىر ۋاقىت الاسۇرعان دۋانامىن،
ءبىر ۋاقىت باتىر بولىپ تۋا الامىن.
ءبىر ۋاقىت جەلدى ءمىنىپ ەسىپ، كەشىپ،-
جىن، شايتان، الباستىنى قۋالادىم

ءبىر ۋاقىت الدە قانداي ەستى جاعىن،
ءبىر ۋاقىت پەرى سوققان جانداي بارمىن،
ءبىر ۋاقىت شىدەر ۇزەر تەنتەك بولىپ،
ءبىر ۋاقىت جۋاس مومىن بولا قالدىم.

بۇل سىرىمنىڭ ءبارى دە ساعان ءمالىم،
ون ساۋساقتاي بىلەسىڭ مۇنىڭ ءبارىن،
اسىرەسە قازىرگى ساعاتىمدا-
كوزىم بولساڭ، جۇرەگىم جانعان جالىن

سەندە، مەندە ۇمىتپاي ەسكەرەرمىز،
قىزىق، قايعى بارىندە تەكسەرەرمىز،
كورىسپەي ساعىنىسقان ۋاقىتتار،
جازىلعان ەسكەرتكىشتى سەپ كورەرمىز.

شىن دوستىق ەش ۋاقىتتا ۇمىتىلماس،
قايناعان شىن ماحاببات سۋىتىلماس،
الدە قانداي كورە الماس زامان بولسا،
وسىنى وقىپ جىلادا، ماۋقىڭدى باس.

جانىڭا جانىن بالايتىن باۋىرىڭ: ءسابيت
18/XII.1923 جىل

قر وما 1864 قور، 1 ءتىز.، 706- ءىس، 2 پ.

داۋت كۋلاي
قازاقستان رەسپۋبليكاسى مادەنيەت جانە سپورت مينيسترلىگىنىڭ
ارحيۆ ىستەرى جانە قۇجاتتامانى باسقارۋ كوميتەتىنىڭ
«ورتالىق مەملەكەتتىك ارحيۆ» رمم
جەكە تەكتىك ارحيۆتەرمەن جانە
تاريحي-قۇجاتتىق توپتامالارمەن
جۇمىس جاساۋ ءبولىمىنىڭ
جوعارى دەڭگەيدەگى ءارحيۆيسى

Abai.kz