"بىزدە جۋرناليستەر مەن باق قۋدالاۋعا ۇشىرامايدى دەپ ويلايمىن" دەدى شەتتەن قارجىلاندىرىلاتىن اقپارات قۇرالدارى تۋرالى سۇراقتارعا جاۋاپ بەرگەن مينيستر.
كورشى رەسەيدەگىدەي جەكەلەگەن اقپارات قۇرالدارى "شەتەل اگەنتى" رەتىندە تانىلماي ما دەگەن سۇراققا مينيستر ء"بىزدىڭ جولىمىز بولەك" دەدى.
ء"بىزدىڭ جولىمىز – اقپارات قۇرالدارىن ءتيىمدى دامىتۋ، باسەكەگە قابىلەتتى ەتۋ جانە ولارعا وقىرمان سۇرانىسىن ارتتىرۋ" دەدى ول.
وماروۆ سونىمەن بىرگە وتاندىق باق كونتەنتىنە قاراي وتىرىپ، ەلدە ء"باسپاسوز ەركىندىگى بار" دەپ تۇجىرىم جاساۋعا بولاتىنىن ايتتى.
وسى اپتا ورتاسىندا حالىققا جولداۋىندا پرەزيدەنت قاسىم-جومارت توقاەۆ "مەملەكەت، قوعام مۇددەسى مەن مەديا سالاسىنداعى دامۋ تەندەنتسيالاردى ەسكەرە وتىرىپ" باق تۋرالى زاڭدى قايتا قاراۋ قاجەتتىگىن ايتقان. ونىڭ ايتۋىنشا، باق وتە وزەكتى ماسەلەلەردى قوزعاۋى ءتيىس، بىراق "ساياسي كلانداردىڭ جاسىرىن كۇرەسىنە قاتىسىپ، جاسىرىن قالاماقى نەمەسە تاپسىرىس ءۇشىن" ەمەس، ماسەلەگە "وتە ۇلكەن ازاماتتىق جاۋاپكەرشىلىكپەن" قاراۋى ءتيىس. بىراق ول كىمدەردى مەڭزەگەنىن ايتپادى. كەيبىر ساراپشىلار توقاەۆ مالىمدەمەسىنەن كەيىن مەملەكەت مەديا كەڭىستىگىنە باقىلاۋدى كۇشەيتەدى دەپ بولجاعان.
پرەمەر-مينيستر ءاليحان سمايىلوۆ جۇما كۇنى اقپارات مينيسترلىگىنە باق تۋرالى زاڭناماعا ەنەتىن وزگەرىستەردى جۋرناليستەر جانە ساراپشىلارمەن تالقىلاۋدى تاپسىرعان.
تاۋەلسىز ءباسپاسوز قورعاۋ ۇيىمدارىنىڭ ايتۋىنشا، قازاقستاندا جۋرناليستەر ءجيى قىسىمعا ۇشىراپ، كاسىبي قىزمەتىن اتقارۋ كەزىندە كەدەرگىگە تاپ بولادى. قاڭتار وقيعاسى كەزىندە ەلدە بىرقاتار جاڭالىقتار سايتى اشىلماي قالدى. جۋرناليستەر كاسىبي قىزمەتىن اتقارۋ كەزىندە ۇستالىپ، كەيبىرىنىڭ ۇستىنەن ءىس قوزعالىپ، تەرگەلدى.
“شەكاراسىز تىلشىلەر" ۇيىمىنىڭ دۇنيەجۇزىلىك ءسوز بوستاندىعى رەيتينگىندە قازاقستان 180 ەلدىڭ اراسىندا 155-ورىندا تۇر جانە ء"سوز بوستاندىعى احۋالى قيىن" ەلدەر قاتارىندا.
Abai.kz
