وۆانەس گريگوريان. بۇل ەسىمدى بەرتىنگە دەيىن مەن دە ەستىمەگەن ەدىم. العاش ەستىرتكەن لەنا بولدى. ءوزى اقىن، ءوزى اۋدارماشى - ەلەنا شۋۆاەۆا-پەتروسيان. ونىڭ ماسكەۋدەگى كراۋن پلازا قوناق ءۇيىنىڭ ات شاپتىرىم فويەسىندە وقىعان «ارمەنيا» ولەڭى جاستار فورۋمىنا بارعان ءبىزدى راسىندا دا ءتانتى ەتتى. ءتانتى ەتكەنى ەمەي نەمەنە، ارميان باۋىرلاردىڭ دەكلاماتسياسىنان كەيىن گريگورياننىڭ ولەڭى باسىلعان پاراقتارعا سونداعى ءۇش-ءتورت قازاق تالاسقانداي بولىپ قالدىق... قاراپ وتىرسام، سودان بەرى دە ءبىر جىلعا جۋىق ۋاقىت ءوتىپ كەتىپتى. قۇدايعا شۇكىر، وۆانەس اقىن «تابىستىرعان» ەرەۆانداعى قىز-جىگىتتەرمەن سودان بەرى ارالاس-قۇرالاس بولىپ كەتتىك. ارينە، عالامتور دەگەن قۇدىرەتتىڭ ارقاسىندا...   نەگە ەكەنىن قايدام، ايتەۋ ءوزىم وۆانەس گريگورياندى بۇگىنگى ارميان پوەزياسىنىڭ پاتريارحى كورەم. بىلتىر شايىر اعامىز قاتتى اۋىرعاندا، وعان بۇكىل ارمەنيا بوپ كومەكتەسىپ جاتقانىن ايتىپ ەدى اسميك پەن لەنالار. ازاماتتىعى ولەڭىنەن كورىنىپ تۇراتىن اقىنعا تىلەكشى رەتىندە مەن دە وسى ولەڭدەردى الاش بالاسىنا جەتكىزۋگە اسىقتىم. قارا ولەڭ بولماسا دا، ءبىز قاۋزاي الماعان ءبىراز دۇنيەنىمەن وسى كىسىنىڭ شىعارماشىلىعىنان تاپقانىما بەك قۋانىشتىمىن!

 

وۆانەس گريگوريان

كۇن رايىنا شولۋ

كوكتەمدە اعاشتار گۇلدەيدى،

كوكتەمدە ءبىز پرەزيدەنتتى سايلاپ، ۇمىتتەنە

جازعا سالىم ءبىر وزگەرىس كۇتەمىز.

 

وۆانەس گريگوريان. بۇل ەسىمدى بەرتىنگە دەيىن مەن دە ەستىمەگەن ەدىم. العاش ەستىرتكەن لەنا بولدى. ءوزى اقىن، ءوزى اۋدارماشى - ەلەنا شۋۆاەۆا-پەتروسيان. ونىڭ ماسكەۋدەگى كراۋن پلازا قوناق ءۇيىنىڭ ات شاپتىرىم فويەسىندە وقىعان «ارمەنيا» ولەڭى جاستار فورۋمىنا بارعان ءبىزدى راسىندا دا ءتانتى ەتتى. ءتانتى ەتكەنى ەمەي نەمەنە، ارميان باۋىرلاردىڭ دەكلاماتسياسىنان كەيىن گريگورياننىڭ ولەڭى باسىلعان پاراقتارعا سونداعى ءۇش-ءتورت قازاق تالاسقانداي بولىپ قالدىق... قاراپ وتىرسام، سودان بەرى دە ءبىر جىلعا جۋىق ۋاقىت ءوتىپ كەتىپتى. قۇدايعا شۇكىر، وۆانەس اقىن «تابىستىرعان» ەرەۆانداعى قىز-جىگىتتەرمەن سودان بەرى ارالاس-قۇرالاس بولىپ كەتتىك. ارينە، عالامتور دەگەن قۇدىرەتتىڭ ارقاسىندا...   نەگە ەكەنىن قايدام، ايتەۋ ءوزىم وۆانەس گريگورياندى بۇگىنگى ارميان پوەزياسىنىڭ پاتريارحى كورەم. بىلتىر شايىر اعامىز قاتتى اۋىرعاندا، وعان بۇكىل ارمەنيا بوپ كومەكتەسىپ جاتقانىن ايتىپ ەدى اسميك پەن لەنالار. ازاماتتىعى ولەڭىنەن كورىنىپ تۇراتىن اقىنعا تىلەكشى رەتىندە مەن دە وسى ولەڭدەردى الاش بالاسىنا جەتكىزۋگە اسىقتىم. قارا ولەڭ بولماسا دا، ءبىز قاۋزاي الماعان ءبىراز دۇنيەنىمەن وسى كىسىنىڭ شىعارماشىلىعىنان تاپقانىما بەك قۋانىشتىمىن!

 

وۆانەس گريگوريان

كۇن رايىنا شولۋ

كوكتەمدە اعاشتار گۇلدەيدى،

كوكتەمدە ءبىز پرەزيدەنتتى سايلاپ، ۇمىتتەنە

جازعا سالىم ءبىر وزگەرىس كۇتەمىز.

 

جازدا جەمىس-جيدەك پىسەدى.

جازدا ءبىز پارلامەنتتى سايلاپ، ۇمىتتەنە

قىسقا سالىم ءبىر وزگەرىس كۇتەمىز.

 

قىستا قار جاۋادى.

قىستا ءبارى ولەدى، ءبارى كوز جۇمادى.

ءبىز دە ولەمىز،

انا ومىردە ءبىر وزگەرىس بولاتىنىنا ۇمىتتەنىپ.

 

 

 

پوليتسيا مالىمەتى

 

نازار سالىڭىزدار،

تاعى ءبىر قىزىقتى مالىمەت:

جيىرماسىنشى عاسىر تۇگەسىلەر شاقتا،

ساعات ون تورتتەن ون بەس مينۋت كەتكەندە،

ءوز ەلىنەن شىققان ارميان حالقى

جوعالىپ كەتتى...

ءتۇر-ءتۇسى: ەجەلگى، ابدەن قاجىعان،

تالانتتى، ەڭبەكقور، شىدامدى،

كوزى - مۇڭلى،

جۇرەگى - ءتىلىم-ءتىلىم...

ءوتىنىپ سۇرايمىز، كورىپ قالعان ادام بولسا،

دەرەۋ پارلامەنتكە حابارلاسسىن،

جاڭا سايلاۋدىڭ جاقىنداۋىنا بايلانىستى

وعان بىرنەشە كۇنگە

حالىق كەرەك...

 

 

كوپپارتيالىق جانازا

 

ا پارتياسى حالىقتى جاقسى كورەدى

جانە حالىقتىڭ ءال-اۋقاتىن كوتەرۋ ءۇشىن

جانىن سالىپ كۇرەسەدى.

 

ب پارتياسى حالىقتى وتە جاقسى كورەدى

جانە حالىقتىڭ ءال-اۋقاتىن كوتەرۋ ءۇشىن

ا پارتياسىنا قارسى جانىن سالىپ كۇرەسەدى.

 

ۆ پارتياسى حالىقتى ەرەكشە جاقسى كورەدى

جانە حالىقتىڭ ءال-اۋقاتىن كوتەرۋ ءۇشىن

ا مەن ب پارتياسىنا قارسى جانىن سالىپ كۇرەسەدى.

 

گ پارتياسى حالىقتى بارىنەن ارتىق جاقسى كورەدى

جانە حالىقتىڭ ءال-اۋقاتىن كوتەرۋ ءۇشىن

ا، ب جانە ۆ پارتيالارىنا قارسى جانىن سالىپ  كۇرەسەدى.

 

بارشا پارتيالاردىڭ ىڭكار  ماحابباتىنا يە -

كوزى ماڭگىگە جۇمىلعان

حالىقتىڭ جۇدەۋ ءجۇزى

ءسان-سالتاناتتى گۇل شوقتارىنىڭ اراسىنان

كوزگە ارەڭ شالىنادى...

 

 

كونستيتۋتسيا

 

1.     مەن، ار ازاماتى وۆانەس گريگوريان، كۇننىڭ شىعىستان اتۋى ءۇشىن،   بۇلتتاردىڭ جەل سوققان باعىتقا ۇشۋى ءۇشىن جانە تەرەزەمنىڭ تۇسىنداعى قۇستار ءسوزى مەن مۋزىكاسىن بۇكىلحالىقتىق رەفەرەندۋم بەكىتكەن ءاندى ايتۋ ءۇشىن بيلىكتەگىلەر قولىنان كەلگەننىڭ ءبارىن ىستەدى دەگەن سەنىممەن كۇندە  تاڭەرتەڭ مەملەكەت قايراتكەرلەرىمەن بىرگە

ويانۋعا قاقىلىمىن...

2. مەنىڭ قالانىڭ قاي بۇرىشىنا بارۋعا دا قاقىم بار. ەڭ ابزالى، جاياۋ بارعان. دەسە دە، مەنىڭ «مەرسەدەس»، «BMW»

ءھام باسقا دا دجيپ ءمىنىپ جۇرگەن اعايىندار جايلى

ءوز پىكىرىمدى ويشا اشىق بىلدىرۋگە قاقىم بار.

كەڭىنەن قولدانىلاتىن ءتۇرى، البەتتە، اشىق بوقتاۋ...

3.مەنىڭ مەيرامحانا، بار، كازينولاردىڭ تەرەزەسىنەن ەمىن-ەركىن قاراۋعا،ونىڭ ينتەرەرى مەن اساي-مۇسەيلەرىنە تامسانۋعا، پەردەلەردىڭ اشىق قالعان تۇسىنان ساياسي ءھام

بيزنەس ەليتا وكىلدەرىنىڭ كوڭىل كوتەرىپ جاتقانىن كورۋگە قاقىم بار.

سونداي-اق، ولار كونستيتۋتسيادا كورسەتىلگەن قۇقىقتارىن پايدالانا وتىرىپ، مەنى وققاعارلارى ارقىلى جەلكەمنەن سۇيرەپ، سىرتقا ايداپ شىققاندا، ولاردىڭ ارەكەتىنە ايقايلاۋ ارقىلى ءوز كوزقاراسىمدى بىلدىرۋگە قاقىلىمىن.

ەڭ ابزالى، ارينە، تىنىش قانا كەتىپ قالۋ...

4. مەن مەملەكەتتىڭ مەنى قارتايۋ قۇقىمەن  تولىق  قامتاماسىز ەتەتىنىنە سەنىمدىمىن،

سوڭعى كۇندەرىمدى قارتتار ءۇيىنىڭ بىرىندە وتكىزەتىنىمە دە كۇمان جوق

جانە مەنىڭ بۇدان باسقا:

قارتتار ءۇيى اۋلاسىنىڭ ءبىر شەتىندە

كومىلۋگە دە تولىق قۇقىم بار.

ال مەن ءۇشىن ەڭ باستىسى -

ءومىر مەن ءولىمدى تاڭداۋ قۇقىن پايدالانار

ءسات تۋعاندا

مەن، ارينە، ءولىمدى تاڭدايمىن.

كەڭىنەن قولدانىلاتىن ءتۇرى، البەتتە،

يت ءولىم...

 

 

وسىلاي بولعان

 

سوندا ءتاڭىر سەنىڭ جەرىڭە -

ءبىر شەتىنەن ەكىنشى شەتىنە

بەرەكە

دەپ جازباق بولدى، بىراق، وكىنىشكە وراي،

بۇل ۇزاق ءسوز سەنىڭ ەلىڭنىڭ اۋقىمىنا سىيمادى...

سودان ءتاڭىر سەنىڭ جەرىڭە

تىنىشتىق

دەپ جازباقشى ەدى،

الايدا، بۇل ءسوز دە تىم ۇزاق بولىپ شىقتى.

ۇزاقتىعى سونشا،

ءتىپتى جارتىسى دا سىيمادى بۇل جەرگە...

تاڭىردە نە قالدى سوندا؟

قالعانى - قىسقا عانا مۇڭ ەدى،

قالعانى - قىسقا عانا شەر ەدى،

قالعانى - قىسقا عانا زار ەدى.

ويتكەنى وسى ءبىر جەرگە

تەك وسى سوزدەر عانا سىياتىن...

 

 

مۇرا

 

امال قايسى، بۇل كۇندى دە كوز كوردى،

شالاجانسار پلانەتامىزدا

ءبارى دە تاۋسىلۋدا:  وزەندەر مەن كولدەر تارتىلىپ، مۇحيت بىتكەن تەڭىزگە، ال تەڭىزدەرباتپاققا اينالۋدا،

ورماندار شىرپى سياقتى لاپ ەتىپ جانىپ،  كۇل بوپ جاتىر،

ول از دەسەڭىز، بىرەۋلەر ەندى

مۇناي مەن گاز دا تاۋسىلۋعا جاقىن دەيدى...

امال قايسى، ەش مۇرا قالمادى مەن كەيىنگى ۇرپاققا تاستار -

ساتىپ، يا بولماسا بانككە سالىپ قويىپ،

ۇستەمە پايىزبەن الاڭسىز ءومىر سۇرە بەرەتىن دىم جوق قوي، دىم جوق.

از دا بولسا قۇنى بار

قالعان جالعىز نارسە بولسا،

ول - كوتەرەم ات سياقتى

كۇننەن-كۇنگە ءجۇرىسى باياۋلاعان

ءبىزدىڭ قاباعى قاتۋلى جەر-انامىز،

ەرتە مە، كەش پە، ونىڭ دا ءجۇرىسى توقتار،

سول ساتتە مەن ونى قۋانا-قۋانا

جىلجىمايتىن مۇلىك رەتىندە

مۇراعا سەندەرگە قالدىرام.

 

 

ارمەنيا

 

مەنىڭ ەلىم بۇل. ول -

الىسقا جول تارتقاندا ەش قيىندىقسىز وزىممەن

بىرگە الىپ كەتە الاتىنداي سونشالىقتى كىشكەنتاي.

جاڭا تۋعان شاقالاق سىندى كىشكەنتاي.

شۇيكەدەي عانا كەمپىر سياقتى ول ءبىر ۋىس.

دۇنيەجۇزىلىك كارتادا

ءبىر ءتۇيىر جاس سياقتى جىلتىرايدى

مەنىڭ سەۆانىم.

مەنىڭ ەلىم بۇل. ونىڭ كىشكەنتايلىعى سونداي،

جوعالتىپ الماس ءۇشىن مەن ونى

جۇرەگىمە جاسىرىپ قويدىم.

 

 

اۋدارعان - داۋرەن بەرىكقاجىۇلى

«Abai.kz»