ساياساتتانۋشى سامات نۇرتازا ەلىمىزدەگى ساياسي رەفورمالارعا قاتىستى پىكىر ءبىلدىردى. ونىڭ ويىنشا، باستى وزگەرىس – تۇڭعىش پرەزيدەنتتىڭ ستاتۋسىنىڭ وزگەرۋى.  

"ساياسي رەفورمالارعا كەلەتىن بولساق، كونستيتۋتسيالىق كوميسسيانىڭ ەنگىزگەن وزگەرىستەرى بويىنشا، بارلىق سالادا جاڭالىقتار كۇتىلىپ وتىر. پارتيالارعا تالاپتار تومەندەتىلەدى، ءولىم جازاسى بولمايدى. ەڭ باستىسى تۇڭعىش پرەزيدەنتتىڭ ستاتۋسى وزگەرەدى. ياعني ول تەك قانا تۇڭعىش پرەزيدەنت بولىپ قالادى دا، قالعان بارلىق ەرەكشەلىكتەرى، قوسىمشا يگىلىكتەرى جويىلادى. «تۋعان-تۋىسقاندارى اكىمشىلىك-قىلمىستىق كودەكسپەن قۋدالانبايدى، نە ىستەسە دە ولاردى سوتتاۋعا بولمايدى» دەگەن نارسەلەردىڭ بارلىعى جويىلادى دا، تەك قانا سيمۆول رەتىندە، مەملەكەتتىڭ نەگىزىن قالاعان ادام رەتىندە قالادى", – دەدى ول.

سونداي-اق سامات نۇرتازا قازاقستاندا نۇرسۇلتان نازارباەۆتىڭ ستاتۋسىنا قاتىستى ساياسي رەفورمانىڭ كەيبىر تۇستارىمەن كەلىسپەيتىن اشۋلى توپ بارىن دا اتاپ ءوتتى.

"ارينە، «1991 جىلعا دەيىن قازاقتاردا مەملەكەت بولدى عوي، نەگە ول كىسىنى ءبىرىنشى ادام دەپ ايتاسىڭدار» دەگەن اشۋلى توپ بار ءبىزدىڭ قوعامدا، ونى جاسىرۋعا بولمايدى. بىراق بۇل جەردە ايتا كەتەتىن نارسە، ءبىز رەسەي يمپەرياسىنا بودان بولعانعا دەيىن بىزدە حاندىقتار، سۇلتاندىقتار بولدى، بىراق رەسپۋبليكا بولعان جوق. مەنىڭ ويىمشا، بۇل جەردە رەسپۋبليكانىڭ نەگىزىن قالاعان دەسە، دۇرىسىراق بولار ەدى. ال كەڭەس وداعىنىڭ قۇرامىندا رەسپۋبليكا بولدىق، بىراق ول ەگەمەندى بولعان جوق. بۇگىنگى رەسەيدەگى شەشەنستان، تاتارستان، ياكۋتيا سياقتى بولدىق. سوندىقتان مۇنىڭ ارا جىگىن اجىراتا ءبىلۋ كەرەك دەپ ويلايمىن", – دەدى ساياساتتانۋشى.

Abai.kz