بىزدەگى كوپ اعايىن ساياسي پروتسەستىڭ جاي-جاپسارىن بىلە بەرمەيتىن سياقتى. ءبىر عانا مىسال كەلتىرەيىنشى.

وسى كۇندەرى الەۋمەتتىك جەلىلەردە: «مەن، قازاقستان رەسپۋبليكاسىنىڭ پالەنشە دەگەن ازاماتى، كونستيتۋتسياداعى تىلگە قاتىستى مىنا باپتى الىپ تاستاۋدى تالاپ ەتەمىن»، - دەپ جازىپ، ول پوستتاردى تاراتۋشىلار كوبەيىپ كەتتى.

ءسوز جوق، ازاماتتىق بەلسەندىلىكتى، ونىڭ ىشىندە، تىلىمىزگە دەگەن سىي-قۇرمەتتى تانىتۋدىڭ ەش ابەستىگى جوق. جازا بەرسىن! تالاپ ەتە بەرسىن!

بىراق، مۇنىڭ ءبارى ابايدىڭ «قولىمدى مەزگىلىنەن كەش سەرمەدىمىنە» كەلمەي مە؟

ويتكەنى، كونستيتۋتسياعا وزگەرىستەر ەنگىزۋ جونىندەگى 5 ماۋسىمدا وتكىزىلەتىن رەفەرەندۋمعا ۇسىنىلاتىن باپتاردىڭ ءتىزىمى باياعىدا-اق بەكىتىلىپ قويدى! ول پرەزيدەنتتىڭ ءتيىستى جارلىعى مەن ورتالىق سايلاۋ كوميسسياسىنىڭ شەشىمىندە تايعا تاڭبا باسقانداي جازىلعان.

ءبىر سوزبەن ايتقاندا، بولار ءىس بولدى، بوياۋى ءسىڭدى، 5 ماۋسىمعا دەيىن ول باپتاردى ەشكىم دە وزگەرتە المايدى! قۇقىقتىق تۇرعىدان العاندا، الەۋمەتتىك جەلىلەردەگى بۇل چەللەندج ءبىر ايعا كەشىگىپ قالدى.

ءبىز ىلعي دا كەشىگىپ جۇرەمىز!

2019 پرەزيدەنت سايلاۋىنان كەيىن ءوزىن وپپوزيتسيا سانايتىن كۇشتەر مەن تۇلعالار ءبىر باعدارلاما توڭىرەگىندە بىرىگىپ، بىرەگەي ۇيىم قۇرىپ الۋى كەرەك ەدى. سول كەزدە بيلىكتىڭ ءوزى رەسمي تۇردە مويىنداعان 16,2 پروتسەنت بۇگىندە ەسەلەنەر ەدى دە، بىرىككەن دەموكراتيالىق پارتيا پارلامەنت تورىندە وتىرا الاتىنداي قاۋقارعا جەتەتىن. جانە دە ول بىرەگەي كۇشتى بيلىك امالسىزدان مويىنداۋعا ءماجبۇر بولار ەدى.

ءبىز بولساق، ءۇش جىلعا كەشىكتىك.

ەندى، مىنە، ءبىر-بىرىمەن تالاسىپ، تارماسىپ پارتيالار قۇرىلا باستادى. ءسوز جوق، پارتيالاردىڭ كوپ بولعانى جاقسى.

بىراق، ءبىزدىڭ جاعداي بولەكتەۋ: بيلىك پارتياسى ساياسي مونوپوليانى قولدان بەرگىسى كەلمەيدى، سوندىقتان دا وعان قارسى كۇشتەر بىرىكپەسە، ءبارى دالباسا بوپ شىعادى!

بىزدەگى كەيبىر ساياساتكەرلەردىڭ ميعا سىيمايتىن ءارى قيسىنعا كەلىڭكىرەمەيتىن ورىنسىز امبيتسيالارىن ەسكەرسەك، ءوزىن وپپوزيتسيا سانايتىن ول پارتيالار ەرتەڭگى سايلاۋدا بيلىك پارتياسىمەن ەمەس، ءبىر-بىرىمەن قىرىق پىشاق بولىپ، قىرىلىسىپ، ايتىسىپ، تالاسىپ، ءبىر-ءبىرىن قارالاپ، كۇيەلەپ، جەڭىستى قولدان بەرىپ قويادى. ءسويتىپ، ناتيجەسىندە سايلاۋ زاڭناماسىنداعى پارلامەنتكە ءوتۋ ءۇشىن قاجەت 7 پروتسەنتكە دە جەتە الماي قالۋى ابدەن ىقتيمال (بيلىكتىڭ دە دىتتەگەنى سول بولار).

رەفەرەندۋمعا دا كەشىكتىك.

كونستيتۋتسياعا ەنگىزىلەتىن وزگەرىستەر ۇسىنىلعان كۇنى-اق، ءوزىن دەموكرات سانايتىن بارشا قاۋىم جينالىپ، ءبىر جاعادان باس، ءبىر جەڭنەن قول شىعارىپ، قازىردە الەۋمەتتىك جەلىلەردى كەزىپ جۇرگەن ورىندى ۇسىنىستاردى جيناقتاپ، تالقىلاپ، بەكىتىپ، ورتاق تالابى رەتىندە بيلىككە ۇسىنۋى كەرەك ەدى. «قابىلداماساڭدار، زاڭدى تۇردە نارازىلىق تانىتامىز!»، - دەپ مىنەز كورسەتۋ دە كەرەك ەدى.

تاعى دا ۇيىقتاپ قالدىق.

دالىرەك ايتساق، ءوزىن دەموكرات سانايتىن ساياسي كۇشتەر مەن تۇلعالار ءبىر-ءبىرىن كورە الماي، پەندەشىلىك تانىتىپ، تاعى دا ساياسي پروتسەستىڭ سوڭىندا قالدى!

تاعى دا كەشىكتىك.

پارتيالار دەمەكشى، ولاردىڭ يدەولوگياسى ءارتۇرلى بولادى.

قاراپ وتىرساق، بىرقاتار توپ پەن تانىمال تۇلعالار ورىس ءتىلىنىڭ سويىلىن سوعىپ، سوۆەت زامانىنان قالعان، تاۋەلسىز قازاقستانعا ءۇش قايناسا سورپاسى قوسىلمايتىن قۇندىلىقتاردى قايتا جاڭعىرتقىسى كەلەتىن سىقىلدى. وتارشىلدىقتىڭ ءيىسى بۇرقىراپ وتىرعان ۇرانداردى كوتەرىپ، پارتيالار قۇرعالى جاتىر. مۇنىڭ ءوزى قوعامنىڭ اشۋ-ىزاسىن تۋدىرىپ، ءدۇيىم جۇرتتىڭ شامىنا تيۋدە.

ال ەجەلدەن كەلە جاتقان ۇلتتىق-دەموكراتيالىق كۇشتەر ءالى دە شاشىراڭقى، سول باياعى «جۇلدىز اۋرۋى» مەن كۇنشىلدىك سەكىلدى امبەباپ سىرقات ابدەن دەندەگەن. قيت ەتسە بولدى، ءبىر-ءبىرىن جامانداپ شىعا كەلەدى.

ۇلت پەن دەموكراتيا قۇندىلىقتارىن قولداعان كۇشتەردىڭ بىرىگىپ، ءبىر پارتيا قۇراتىن ۋاقىتى كەلدى ەمەس پە؟ ەلەكتورالدىق تۇرعىدان العاندا، ونداي كۇشكە تەڭ كەلەر باسقا كۇش بولمايدى دا!

الدا سايلاۋلار كەلە جاتىر: ەكى جىلدان سوڭ پرەزيدەنتتى، ودان كەيىن پارلامەنتتى سايلاپ الۋىمىز كەرەك.

تاعى دا كەشىگىپ قالامىز با؟

نەگە ءبىزدىڭ دەموكراتيانىڭ كوشى كەشىگە بەرەدى؟

ءامىرجان قوسان

Abai.kz