رەسەي پروپاگانديستەرءى قازاقستاننان كاپيتالىن جىلىستاتۋعا قارسى بولعان دەپۋتاتقا سەس كورسەتە باستادى

ءماجىلىس كوميتەتى وتىرىسىندا ەسۋ دەپ اتالىپ جۇرگەن بىرىڭعاي ەسەپكە الۋ جۇيەسىن شىن مانىندە رەسەيگە زاڭسىز كاپيتال شىعارۋ دەپ ايىپتاعان دەپۋتات باقىتجان بازاربەككە رەسەي پروپاگانديستەرى جابىلا باستادى.

پروپاگانديست رۋسلان وستاشكو بۇل تۋرالى: «قازاقستاندا تاعى دا «تاۋەلسىزدىك ويىنى» باستالدى. بۇل جولى رەسەيدەن كەلىپ جاتقان ەدينايا سيستەما ۋچەتا (ەسۋ) توڭىرەگىندە. رەسەيدە تسۋپيس باياعىدان بەرى بۇكىل نارىقتى باقىلاپ وتىر. ەندى كەزەك قازاقستانعا كەلدى. وسى تۇستا ءماجىلىس دەپۋتاتى باقىتجان بازاربەك اياق استىنان بۇل «قاۋىپ»، «شەتەلدىك بەنەفيتسيارلار» دەگەن سەكىلدى دابىرا سوزدەردى ايتىپ شىقتى. شىن مانىندە - جاي عانا ءوز ۇلەسىن الا الماعان ادامنىڭ رەاكتسياسى»، - دەپ ءوز تەلەگرامىندا تيىسە جازدى.

سۋرەت: وستاشكو تەلەگرام ارناسىنىڭ سكرينى.

پروپاگانديستتىڭ ايتۋىنشا، قازاقستان ءوز ارمياسىن سۆو-نى قولداۋعا جىبەرمەگەندىكتەن، رەسەيلىك ينفراقۇرىلىمدىق جوبالارعا كىرىپ، وسىلايشا قارجىلاي قولداۋى ءتيىس.

«ەگەر استانادا بىرەۋلەر شىنىمەن قازاقستاننىڭ ەگەمەندىگىنە سەنىپ وتىرسا, وندا ونى ناقتى قارجى اعىندارىن باقىلاپ وتىرعاندارعا ءتۇسىندىرىپ كورسىن. كۇلكىلى بولماڭىزدار».

رەسەيلىكتەردىڭ جابىلا ۇرە باستاۋىنىڭ سەبەبى، باقىتجان بازاربەكتىڭ بىزدە ەنگىزىلىپ جاتقان ەسۋ جۇيەسى جيناعان كوميسسيالىق قارجىنىڭ 80 پايىزى رەسەيگە اۋدارىلاتىنىن اشكەرەلەۋى ەدى.

«جالپى، پرەزيدەنتتىڭ جانە ۇكىمەتتىڭ بىرنەشە رەت بەرىلگەن تاپسىرمالارىنا قاراماستان نەگىزگى ماقساتى جىل سايىن تەك كوميسسيالاردان عانا 3,9 تريلليون تەڭگە تابىس تاباتىن مونوپوليالىق قۇرىلىم قۇرۋ كوزدەءلىپ وتىر. جارايدى، باستاپقىدا ەسۋ-دى مەملەكەتتىك كاسىپورىن رەتىندە قۇرۋ جوسپارلانعان ەدى. بىراق سىزدەردىڭ كوپشىلىگىڭىز وتە ماڭىزدى جايتتى بىلمەيسىزدەر. قازىر ەسۋ ءىس جۇزىندە شيرما رەتىندە عانا قالىپ وتىر. ونىڭ بۇكىل فۋنكتسيالارى رەسەيلىك NomaPay كومپانياسىنا بەرىلگەن. ەندى رەسەيلىك NomaPay كومپانياسى جىل سايىن وسى 3,9 تريلليون تەڭگەنى تاباتىن بولادى. 3,9 تريلليوننىڭ 20%-ى عانا ەسۋ-دا قالادى، قالعان 80%-ى رەسەيگە كەتەدى. بۇل - ناقتى كاپيتالدىڭ سىرتقا شىعارىلۋى. رەسەي ەشتەڭە ىستەپ جاتقان جوق، رەسەيلىك كومپانيالار ەشقانداي جۇمىس اتقارىپ وتىرعان جوق. ولار تەك NomaPay پلاتفورماسىن قۇرعان، بولدى. بارلىق اقشا ءدال وسى پلاتفورما ارقىلى جۇزدەگەن ميللياردتار كولەمىندە سىرتقا شىعارىلاتىن بولادى», - دەپ مالىمدەگەن دەپۋتات بازاربەك.

سۋرەت: ب.بازاربەك جازباسىنىڭ سكرينى.

ونىڭ سوزىنشە، مەملەكەت باسشىسى قۇمار ويىن بيزنەسىن اقشا ەلدە قالاتىنداي ەتىپ رەتتەۋ بويىنشا تاپسىرما بەرگەن. بىراق شەنەۋىكتەر مۇلدە باسقا نارسەنى كوزدەپ، كۇدىكتى سحەمالاردى تىپقالاۋدا.

«ال سىزدەر قانداي پلاتفورما قۇردىڭىزدار؟ نەلىكتەن NomaPay تۋرالى ايتپايسىزدار؟ نەلىكتەن ونى جاسىرىپ وتىرسىزدار؟ بىزدە NomaPay بويىنشا بارلىق مالىمەتتەر بار. NomaPay مەن ەسۋ اراسىندا جاسالعان كەلىسىم ناقتى كورسەتىپ تۇر: NomaPay ونلاين-كازينو مەن جالپى ويىن بيزنەسىن تەحنيكالىق قىزمەت كورسەتۋدەن تۇسەتىن تابىستىڭ 80%-ىن الادى. سىزدەر بۇنى ايتپايسىزدار، تەك ەسۋ تۋرالى عانا ايتاسىزدار. بۇل دەپۋتاتتىق كورپۋستى اداستىرۋعا اكەلەدى. سوندىقتان مەن بۇل تۇزەتۋگە تۇبەگەيلى قارسىمىن. بۇل سوزدەرىمدى ستەنوگرامما ءۇشىن ايتىپ وتىرمىن. نەگە؟ ويتكەنى بۇل كاپيتالدى سىرتقا شىعارۋ، بۇل شەتەلدىك قاتىسۋشىلاردىڭ مۇددەسىن لوببيلەۋ، بۇل پاتريوتتىققا جاتپايتىن ارەكەت. ارينە، مەنىڭ داۋىسىم ەشتەڭەنى شەشپەيدى. بىراق تاريح ءۇشىن ءبىر كۇنى بۇنىڭ دا بەتءى اشىلادى، ءبىر كۇنى قوعام بۇنى بىلەدى، ءبىر كۇنى بۇل ارەكەتكە قۇقىقتىق جانە ساياسي باعا بەرىلەدى», - دەدى، باقىتجان بازاربەك.

ەندى دەپۋتات باقىتجان بازاربەككە قارسى رەسەيدىڭ الپاۋىت كۇشتەرى ءوز ءلوببيىن ىسكە قوسپاق. پروپاگانديستەر ونىڭ العاشقى لەگى عانا. سەبەبى كرەملدەگى كۇشتەر سوعىسقا قارجى جەتپەي جاتقاندىقتان، قازاقستاننان مۇمكىندىگىنشە كاپيتال سورۋعا نيەتتى ەكەنى تۇسىنىكتى.

Abai.kz