پرەزيدەنت قاسىم-جومارت توقاەۆتىڭ جانىنان ورىن تابىلماعان لاۋازىمدى شەنەۋنىكتەر قازىر قايدا ءجۇر؟ جۋىردا Orda.kz ۇجىمى تەرەڭ قالتالى، دوڭشەكە مىرزالاردىڭ ءبىرسىپاراسىنا ىزدەۋ سالىپتى. ءبىز دە «ەكس» اتانعان ەسكى باسشى كادرلەرىنىڭ قايدا جۇرگەندىگىن Abai.kz وقىرماندارىنا ۇسىنۋدى ءجون سانادىق.

اسقار مامين

اسقار مامين 2019 جىلى اقپاندا قازاقستاننىڭ پرەمەر-ءمينيسترى قىزمەتىنە كەلدى. ءبىر جىلدان كەيىن ەلدى كاروناۆيرۋس پاندەمياسى جايلاپ، جاعداي قيىندادى. 2022 جىلى «قاڭتار وقيعاسىنىڭ» ەكپىنىمەن العاشقى ەكەۋدىڭ ءبرى بولىپ قىزمەتىنەن قۋىلدى. 5 قاڭتاردا ورنىن بوساتتى.

قازىر ول «QazaqGeography» رقب توراعاسى قىزمەتىن اتقارىپ ءجۇر. تابيعات، قوعام جانە مادەنيەتتى زەرتتەيتىن 11 ايماقتىق وكىلدىگى بار قوعامدىق ۇيىمدى باسقارادى. قوعامدىق ۇيىمنىڭ ءباسپاسوز حاتشىلىعى ءماميننىڭ جۇمىس كەستەسى ەركىن، بىراق ول جۇمىسقا كەلىپ-كەتەتىنىن ايتادى. مامين توراعالىق ءۇشىن جالاقى المايدى ەكەن.

باقىتجان ساعىنتاەۆ

بۇرىنعى پرەمەر-مينيستر جانە الماتى اكىمى بولعان باقىتجان ساعىنتاەۆ اسقار ءماميننىڭ جولىن جالعاپ، «قاڭتار وقيعاسىنان» كەيىن قىزمەتىنەن كەتتى. سودان بەرى ول تۋرالى حابار جوق. Instagram پاراقشاسىنا 3 قاڭتاردا سوڭعى رەت جازبا جاريالاعان. 31 قاڭتاردا Facebook جەلىسىندە الماتىلىقتارمەن قوشتاستى.

«بۇگىن مەن ءوز لاۋازىمىمدى جاڭا اكىمگە تاپسىرامىن. وسىدان تۋرا 720 كۇن بۇرىن پرەزيدەنت ماعان الماتى اكىمدىگىن باسقارۋدى سەنىپ تاپسىردى. بۇل ءۇشىن مەملەكەت باسشىسىنا ريزامىن.

مەن سىزدەرمەن ۇنەمى بىرگە بولدىم. قالا ءومىرىن جاقسارتۋعا بار كۇش-جىگەرىمدى ارنادىم... مەنىڭ ءاربىر جۇمىس كۇنىم سىزدەردىڭ كوز الدىلارىڭىزدا ءوتتى. وزدەرىڭىزبەن ءاردايىم كەزدەسىپ، اقىلداسىپ وتىردىق. اپتا سايىن Akimat Live تىكەلەي ەفيرىنە شىقتىم. اتقارىلعان شارالار تۋرالى ۇنەمى حاباردار بولدىڭىزدار. بىرگە اتقارىلعان جۇمىس ءۇشىن الماتىلىقتارعا العىس ايتامىن! قالامىزعا جانە بارشا الماتىلىقتارعا باقىتتى عۇمىر تىلەيمىن! الماتى ماڭگى مەنىڭ جۇرەگىمدە»، - دەپ جازدى ول.

اقپان ايىندا ساعىنتاەۆ جامبىل وبلىسىنىڭ اكىمى بولىپ سايلانۋى مۇمكىن دەگەن سىبىس شىقتى. بىراق تاعايىندالعان جوق. كەيىن ساعىنتاەۆتىڭ رەسەيگە ەلشى بولىپ باراتىنى جايلى دا اقپارات ايتىلعان. بۇل دا ءالى رەسمي راستالعان جوق.

قىرىمبەك كوشەرباەۆ

قىرىمبەك كوشەرباەۆ 1980 جىلداردان باستاپ ءتۇرلى مەملەكەتتىك قىزمەتتەردى اتقارعان، ساياساتتا ۇزاق جۇرگەن ازاماتتىڭ ءبىرى. سوڭعى قىزمەتى – مەملەكەتتىك حاتشىلىقتان 2022 جىلى 5 قاڭتاردا بوساتىلدى. قىزمەتتەن كەتۋ سەبەبى، زەينەت جاسىنا تولۋىنا بايلانىستى دەلىنەدى.

عابيدوللا ءابدىراحىموۆ

عابيدوللا ءابدىراحىموۆ شىمكەنت قالاسىنىڭ اكىمى بولىپ ەكى رەت سايلاندى: 2015-2017 جانە 2018-2019 جىلدارى اكىم بولىپ قىزمەت ەتتى. ءابدىراحىموۆ اكىم بولىپ تۇرعان شاعىندا «ەرەكشە» سوزدەرىمەن ەستە قالدى. اسىرەسە لوندونعا قىزمەتتىك ساپارى كەزىندە «جۇرتقا قالاي ءومىر ءسۇرۋ كەرەگىن ءتۇسىندىرىپ ءارى ەلباسىعا العىس ايتقان» ۆيدەوسى قوعامدا قاتتى تالقىلاندى.

«لوندونننان سالەم. تاڭعى استان كەيىن گايد-پارككە قىدىرۋدى ءجون دەپ شەشتىم. لوندون - الەمنىڭ استاناسى. ونى دالەلدەۋدىڭ كەرەگى جوق، بىراق مەن ءبارىبىر قازاقستاندى جاقسى كورەم. قازاقستاندا جۇمىس ىستەپ، ءومىر ءسۇرۋ كەرەك. الەم ەلدەرىنە دەمالۋ ءۇشىن كەلۋ كەرەك. باقىت دەگەن سوندا سەكىلدى. بالالارىمىزعا، پاتريوت ۇرپاعىمىزعا قازاقستاندا تابىستى جۇمىس ىستەپ، بارىنە قول جەتكىزىپ، الەم ەلدەرىندە دەمالۋدى تىلەيمىن. مۇنىڭ نەگىزى 1993 جىلى پرەزيدەنت «بولاشاق» تۋرالى جارلىققا قول قويعان كەزدە باستالدى. مەن بىزگە ءتۇرلى سالالاردى، لاۋازىمداردى تاپسىرعان، كەڭەسىن بەرگەن اعا بۋىنعا، ەلباسىنا، ەلىمىزگە ريزاشىلىعىمدى بىلدىرەمىن. مەنىڭ ويىمشا، قازاقستاننىڭ بولاشاعى زور، مەن سوعان سەنەمىن»، - دەدى ول.

سول كەزدەگى پرەزيدەنت اكىمشىلىگىن باسقارعان قىرىمبەك كوشەرباەۆ عابيدوللا ءابدىراحيموۆ تۋرالى: «ونى ەلىمىزدەگى ەڭ لاۋازىمدى ءارى جاۋاپتى قىزمەتتەرگە تاعايىندادى. وكىنىشكە قاراي، مۇنى ءوزى جەتكىلىكتى تۇردە ۇعىنعان جوق»، - دەپ پىكىر بىلدىرگەن.

شىمكەنت قالاسىنىڭ اكىمى قىزمەتىنەن بوساتىلعاننان كەيىن ول ءبىراز ۋاقىت پرەمەر-ءمينيستردىڭ كەڭەسشىسى، سودان كەيىن مادەنيەت جانە سپورت ۆيتسە-ءمينيسترى بولىپ جۇمىس ىستەدى. ءابدىراحىموۆ قازىر ەلوردادا تۇرادى، 2021 جىلعى قىركۇيەكتەن باستاپ جۇمىسسىز. بىراق جاقىندا ول مەملەكەتتىك قىزمەت رەفورماسى تۋرالى ءوز ويلارىن بىلدىرگەن بولاتىن.

باۋىرجان بايبەك

باۋىرجان بايبەك بۇرىنعى «Nur Otan» پارتياسى توراعاسىنىڭ ءبىرىنشى ورىنباسارى قىزمەتىنەن كەتكەننەن كەيىن جىم-جىرت بولا قالدى. كەيىن 19 ساۋىردە dostyk.travel كومپانياسى الەۋمەتتىك جەلىدەگى پاراقشاسىندا بايبەكتىڭ مەككەدەگى سۋرەتىمەن جازبا جاريالادى. «قاسيەتتى رامازان ايىندا باۋىرجان بايبەك اعامىز اناسىمەن ۋمرا قاجىلىعىن جاسادى» دەپ جازدى. بايبەك ءوزىنىڭ جەكە الەۋمەتتىك پاراقشاسىندا سوڭعى رەت 9 قاڭتاردا جازبا قالدىرعان.

قازىر بايبەك «بولاشاق» كورپوراتيۆتىك قورىنىڭ قامقورشىلىق كەڭەسىنىڭ مۇشەسى قىزمەتىن جالعاستىرىپ جاتىر. سونداي-اق، ول كازگيۋ ۋنيۆەرسيتەتىندەگى قامقورشىلىق كەڭەستىڭ توراعاسى قىزمەتىنەن بوساتۋ تۋرالى ءوتىنىش جازدى. قازىر بايبەكتىڭ قايدا ەكەنى بەلگىسىز، بىراق ونىڭ دۋبايدا جۇرگەنىن الەۋمەتتىك جەلىلەردە بايقاعاندار بار ەكەن.

نۇرلان نىعماتۋلين

نۇرلان نىعماتۋلين ءۇش رەت ءماجىلىس توراعاسى بولىپ سايلاندى. 2022 جىلدىڭ 1 اقپانىندا ءماجىلىس توراعاسى قىزمەتىنەن كەتتى. كوپ ۇزاماي ونىڭ شەتەلگە كەتكەنى تۋرالى سىبىس شىقتى. ارتىنشا Abzhannews تەلەگرام ارناسىندا ونىڭ نۇر-سۇلتان قالاسىنداعى كينوتەاترلارىنىڭ بىرىندە جۇرگەنى تۋرالى ۆيدەو شىقتى.

ال، ءساۋىر ايىندا رەسمي ەمەس مالىمەتتەر بويىنشا ونىڭ باكۋگە ۇشىپ كەتكەنى جاريالاندى. ەكى ايدان بەرى نۇرلان نىعماتۋلين مەن ونىڭ اعاسى ەرلان نىعماتۋلين قازاقستاندا كورىنبەي كەتكەن.

نۇرتاي ابىقاەۆ

نۇرتاي ابىقاەۆ 75 جاستا. ول نۇرسۇلتان نازارباەۆتىڭ ەرتەدەن كەلە جاتقان دوسى ءارى سەرىگى. ساياسي ومىرىندە ول پرەزيدەنت اكىمشىلىگىن باسقاردى، پارلامەنت سەناتىنىڭ توراعاسى،  ەلشى بولدى، ۇقك توراعاسى جانە سەنات دەپۋتاتى بولىپ جۇمىس ىستەدى. 2017 جىلى ساياساتتان كەتتى.

2018 جىلدان باستاپ شەتەلدە تۇراتىن جانە قازاقستانعا ورالىپ جاتقان ەتنيكالىق قازاقتارعا كومەكتەسەتىن «وتانداستار» قورىن باسقاردى. ساياساتتانۋشى دانيار اشىمباەۆتىڭ ايتۋىنشا، ابىقاەۆ «وتانداستار» مەن قازاقستان گولف فەدەراتسياسىنىڭ پرەزيدەنتى قىزمەتىنەن كەتكەن. ونىڭ قازاقستان جاراتىلىستانۋ عىلىمدارى اكادەمياسىنىڭ توراعاسى دەگەن اتاعى بار.

يمانعالي تاسماعامبەتوۆ

يمانعالي تاسماعامبەتوۆپەن استانا مەن الماتىنىڭ اكىمى، قورعانىس ءمينيسترى جانە پرەمەر-ءمينيستردىڭ كەڭەسشىسى قىزمەتتەرىن اتقاردى. ول 2017 جىلى قازاقستاننىڭ رەسەيدەگى توتەنشە جانە وكىلەتتى ەلشىسى بولىپ تاعايىندالعان كەزدە ساياسي الاڭنان كەتتى. 2019 جىلى ەلشىلىك قىزمەتىنەن زەينەت جاسىنا جەتكەندىكتەن بوساتىلدى.

2022 جىلعى 18 مامىردا تاسماعامبەتوۆ قازاقستان گولف فەدەراتسياسىنىڭ پرەزيدەنتى بولىپ سايلاندى.

احمەتجان ەسىموۆ

ەلباسىنىڭ جيەنى احمەتجان ەسىموۆ تە ەليتالىق گولف كلۋبىنىڭ مۇشەسى. ول 2008-2015 جىلدار ارالىعىندا الماتىنىڭ اكىمى بولدى. 2017-2021 «سامۇرىق-قازىنا» ۇلتتىق قورىنىڭ باسقارما توراعاسى بولىپ قىزمەت اتقاردى. 2021 جىلعى 21 ساۋىردەن باستاپ – قازاقستان رەسپۋبليكاسى تۇڭعىش پرەزيدەنتىنىڭ-ەلباسىنىڭ شتاتتان تىس كومەكشىسى بولىپ ىستەپ كەلەدى. ول قازاقستاننان كەتپەگەن.

ارىستانبەك مۇحامەديۇلى

قازاقستاننىڭ بۇرىنعى مادەنيەت جانە سپورت ءمينيسترى ارىستانبەك مۇحامەديۇلى 2019 جىلدىڭ شىلدە ايىنان باستاپ قازاقستان رەسپۋبليكاسىنىڭ ۇلتتىق مۇراجايىن باسقارادى. جاقىندا ول «التىن ادامنىڭ الەم مۋزەيلەرىنە شەرۋى» حالىقارالىق كورمەسىن وتكىزۋ بويىنشا مەملەكەتتىك ساتىپ الۋ تۋرالى شارت اياسىندا 146 ملن تەڭگە سوماسىندا بيۋدجەت قاراجاتىن جىمقىردى دەگەن كۇدىككە ءىلىندى. وسىدان كەيىن مۇحامەديۇلىنىڭ سۋيتسيد جاساعانى تۋرالى اقپارات پايدا بولدى، بىراق ۇلتتىق مۋزەيدىڭ ءباسپاسوز حاتشىسى ايدار قىرىقبايۇلى بۇل اقپاراتتى جوققا شىعاردى. قازىرگى ۋاقىتتا ونىڭ دەنساۋلىعىنا ەشقانداي قاۋىپ ءتونىپ تۇرعان جوق.

ايجان تەمىرحان

Abai.kz