«قاڭتار قاسىرەتى» ۇعىمى مەملەكەت باسشىسى قاسىم-جومارت توقاەۆتىڭ اۋزىمەن ايتىلدى. بۇل قاسىرەتتىڭ بولۋىنا بيلىككە قول جەتكىزۋگە مۇددەلى توپتار كىنالى. ەكىنشى جاعىنان وليگارحتاردىڭ كەسىرىنەن ناشارلاعان حالىقتىڭ الەۋمەتتىك جاعدايى دا سەبەپ بولدى. اۋەلى بەيبىت ەكونوميكالىق تالاپتارمەن باستالعان ەرەۋىلدى ارانداتۋشىلار، ەكسترەميستەر قاسىرەتكە اينالدىرىپ جىبەردى. ۇيىمداستىرۋشىلار انىقتالا جاتار، دەگەنمەن ارانداتۋشىلار مەن ەكسترەميستەرگە تويتارىس بەرۋگە جاراماعان قۇزىرلى ورگانداردىڭ دا ايىبى بار.

قاقتىعىس كەزىندە جازىقسىز ادامدار ءشاھيت بولدى، مۇنى مويىنداۋىمىز كەرەك. توڭكەرىسكە سەبەپشى بولىپ، ەل ءىشىن ويران قىلعان ىقپالدى توپتاردىڭ ارەكەتىنەن جازىقسىز ادامدار، پوليتسيا قىزمەتكەرلەرى، بەيبىت شەرۋگە قاتىسقاندار قازا تاپتى. مەملەكەتتى قۇلاتۋ ماقساتىندا جاسالعان توڭكەرىس بولماعاندا جازىقسىز قۇربان بولعان جاندار وسى كۇنى ورتامىزدا امان-ەسەن جۇرەر ەدى.  ومىرى قيىلعانداردىڭ اراسىندا قولىنا قارۋ الماعان، ويىندا جامانشىلىق بولماعان، تەك ارانداپ قالعاندارى جەتەرلىك.

ەندى وسىنىڭ ءبارىن ەسكەرە وتىرىپ، بيلىك پەن حالىق ءبىر-بىرىمەن ساناسۋ كەرەگىن تۇسىنەمىز. مەملەكەتتىڭ ەڭ باستى بايلىعى – ازاماتتارى، ونى باعالاۋى ءتيىس. بۇدان ساباق الۋ ءۇشىن الداعى ۋاقىتتا ءبىر دە ءبىر شەشىم كەلىسىمسىز قابىلدانباۋ قاجەت.

حانگەلدى ءابجان

Abai.kz