«نازارباەۆ سيندرومى» ءوز جەمىسىن ونەر كەڭىستىگىندە بەرە باستادى

قازىر «جاڭا قازاقستاننىڭ» العا باسۋى ءۇشىن ەڭ باستى كەدەرگى الاش قوعامىنىڭ «نازارباەۆ سيندرومىنان» قالاي ارىلۋىنا بايلانىستى. قازاق ۇلتىن ءوز ءتول مەملەكەتىن ومىرگە اكەلۋدەن الشاقتاتقان، ۇلتتىق-ءدىني پارتيا قۇرۋدان ايىرعان، اقپاراتتىق كەڭىستىگىن بۇرىنعى وتارشىل ەل رف باسى ءبۇتىن بايلاپ بەرگەن، انا تىلىنەن ماقۇرىم ميلەتي بيزنەس ەليتانى ەكنوميكالىق ساحناعا شىعارعان، ورىس ءتىلدى اكىمگەر كوماندانىڭ قولىنا قاراسى كوپ جەرگىلىكتى ۇلتپەن ساناسپايتىن ەتنيكالىق ازشىلىقتاعى ورىس ءتىلدى وتانداستارىمىزدى تايتەڭدەتۋ ءۇشىن  شەكسىز بيىلىك بەرگەن ءام ت.ب. قازاققا قانى قاس تىرلىك جاساعان ناسىلشىلدىك رەجىمنىڭ اۋىر زاردابىنان قۇتىلۋعا باتىل قادام جاساي الامىز با!؟ 130 ۇلتتىڭ مەكەنى دەگەن ميفي ەرتەگىنى تاڭعان «نازارباەۆ سيندرومىنىڭ» كۇنى باتا ما!؟

وسى «جاڭا قازاقستاننىڭ» ءوز ومىرشەڭدىگىن تانىتۋى قازاق ءتىلىنىڭ ەلىمىزدەگى ءىرى-ۇساق دياسپورا وكىلدەرىنىڭ باسىن انا ءتىلىمىزدىڭ ماڭىنا توپتاستىرۋ باستى باعدار.

رف ۋكرايناعا سوعىس اشۋى الەم ەلدەرى تاراپىنان سانكتسيا سالۋ مەن ەكونوميكالىق ەمبارگو جاريالاۋعا ۇلاستى. ەلىمىزگە ەسەپكە الىنعانى بار، الىنباعانى بار 500 مىڭداي رەسەيلىك اعىلدى. جارتى ميلليون ادام! سولاردىڭ تاراپىنان «شاڭىراققا قاراماي، جامان ءۇيدى قوناعى بيلەيدىنىڭ» كەرىن كەلتىرگەن تىرلىكتەرگە ءۇش ايدان بەرى كوزىمىز دە، ەتىمىز دە ۇيرەنىپ، ءتىپتى بەي-جاي قارايتىن بولا باستادىق.

بىراق رەسەيلىكتەردىڭ تايراڭداۋى الەمجەلىنىڭ عانا تاقىرىبى ما، الدە بيلىك وسى ورايدا باسىن قۇمعا تىققان تۇيەقۇس كەيىپ كورسەتۋدەن ارىلا ما؟ بۇل بەيادەپتىككە كۇشپەن قارسىلىق كورسەتكەن قازاقتى تۇرمەگە تىعۋ تىرلىگىن دوعارا ما؟ ساۋال كوپ بىراق ەش جاۋاپ جوق... وسىنداي ءولىارا شاقتا «ميلوحين: قازاقستاندا قازاق ءتىلىن ۇيرەنۋدىڭ كەرەگى جوق» دەگەن نامىسقا تيەر، «مەن قازاقپىن» دەگەننىڭ قانىن قارايتار بەينەسۇحباتى ەلگە تارادى.

31 مامىر كۇنى DINARA SATZHAN يۋتۋبارناسىندا دينارا ءساتجاننىڭ رەسەيلىك بلوگەر دانيا ميلوحين: «مى حوتيم دەلات س كازاحامي سوۆمەستنىە پروەكتى!» اتتى سۇحباتتى شىقتى.

وسى ۋاقىتقا دەيىن وعان 291 كوممەنتاري بەرىلگەن، تمد بويىنشا  50 مىڭعا جۋىق ادام تاماشالاعان. وسى سۇحباتتىڭ 8 مينۋت 31 سەكۋنتىندا: «بىرىنشىدەن، ءتىل ءۇشىن. بىزگە ادامدارمەن ارالاسىپ، جاڭا تانىستار تابۋ كەرەك. ءبارى ورىسشا سويلەگەندىكتەن، قيىندىق تۋمايدى. ماسەلەن، مەن اعىلشىن نەمەسە باسقا تىلدە سۇحبات بەرە المايمىن، اۋدارماشى جالداۋعا تۋرا كەلەر ەدى» دەگەنى ۇلتتىق نامىسىمىزعا ءتيدى.

سوندا ءميلوحيننىڭ بۇعان دەيىن اۋەلى انا تىلىمىزدەگى ءان-جىرىمىزدى مانسۇق ەتكەنى ازداي ەندى مۇلدەم باسقا شىقتى. سوندا كەلىمسەك شوۋمەندەر ۇلتتىق قۇندىلىعىمىزدى بەلدەن باسا بەرمەك پە...

رەسەيدىڭ  ۋكرايناداعى قانقۇيلى ارەكەتىن جاقتايتىن قازاق ەلىنە اعىلعان ورىس ءتىلدى كەلىمسەك شوۋمەندەر مەن ارتىستەرىن ءوز جەرىمىزدە باسقا شىعارماۋ كەرەكتىگىن شوۋمەن اديل ليان العاشقى بولىپ كوتەرىپ، مەيماناسى اسقان رەسەيلىك جۇلدىزسىماقتارعا قاتىستى: «نە حوچۋ، چتوبى پولزوۆاليس كازاحستانوم!» دەپ وتە ورىندى كوتەرگەن بولاتىن. بىراق وعان ەشكىم دەن قويعان جوق. قاڭعىپ كەلگەن ونەرپازدارعا سەس كورسەتىپ، كەۋدەسىن باسقىزاتىن ءسات تۋدى. بىراق ءبىز ولاردى ءتاۋباسىنا كەلتىرە الامىز با؟ ولاردى ەلدەن تۇرە قۋعا ءداتىمىز جەتە مە؟ بار تۇيتكىل وسىعان كەلىپ تىرەلىپ تۇر.

ءابىل-سەرىك الىاكبار

Abai.kz