الاش بالاسىن 30 جىل ادەمى ەرتەگىسىمەن تويدىرعان، تۇتاس ەلدى تىلدىك بەلگىسىنە قاراي قازاق جانە ورىس ءتىلدى قاۋىمداستىق دەپ قاققا بولگەن، العاشقىلارىن شەگىنە جەتكەن قايىرشىلىققا ۇشىراتقان نازارباەۆتىڭ ۇلتىمىزعا قانى قاس ناسىلشىلدىك رەجىمى كەلمەسكە كەتىپ، ەلدىڭ ساياسي ورتاسىندا «نازارباەۆ سيندرومى» دەگەن اتاۋ الدى.

قازىر «جاڭا قازاقستاننىڭ» العا باسۋى ءۇشىن ەڭ باستى كەدەرگى الاش قوعامىنىڭ «نازارباەۆ سيندرومىنان» قالاي ارىلۋىنا بايلانىستى. قازاق ۇلتىن ءوز ءتول مەملەكەتىن ومىرگە اكەلۋدەن الشاقتاتقان، ۇلتتىق-ءدىني پارتيا قۇرۋدان ايىرعان، اقپاراتتىق كەڭىستىگىن بۇرىنعى وتارشىل ەل رەسەي باسى ءبۇتىن بايلاپ بەرگەن، انا تىلىنەن ماقۇرىم ميلەتي بيزنەس ەليتانى ەكنوميكالىق ساحناعا شىعارعان، ورىس ءتىلدى اكىمگەر كوماندانىڭ قولىنا قاراسى كوپ جەرگىلىكتى ۇلتپەن ساناسپايتىن ەتنيكالىق ازشىلىقتاعى ورىس ءتىلدى وتانداستارىمىزدى تايتەڭدەتۋ ءۇشىن  شەكسىز بيىلىك بەرگەن ءام ت.ب. قازاققا قانى قاس تىرلىك جاساعان ناسىلشىلدىك رەجىمنىڭ اۋىر زاردابىنان قۇتىلۋعا باتىل قادام جاساي الامىز با؟! 130 ۇلتتىڭ مەكەنى دەگەن ميفي ەرتەگىنى تاڭعان «نازارباەۆ سيندرومىنىڭ» كۇنى باتا ما؟!

قازاققا ۇلتتىق مەملەكەت قۇرۋعا مۇمكىندىك بەرمەگەن جان 2019 جىلى 19 ناۋرىزدا بيلىكتەن كەتكەندە جاي كەتكەن جوق، الاش بالاسىنىڭ مويىنا قازاقستاننىڭ سىرتقى قارىزى  158,8 ميلليارد اقش دوللارىن ءىلىپ كەتتى، 2022 جىلدىڭ 1 قاڭتارىنداعى جاعداي بويىنشا ەلباسىدان مۇراعا قالعان سىرتقى قارىزىمىز $165 ملرد-قا جەتتى.

قازىر قالامداستارىمىز ەل تۇرعىندارىنىڭ 80 پايىزدايىن قۇرايتىن اۆتوحون ۇلت قازاققا قانى قاس «130 ۇل» دەگەن قيالي ميف پەن «ۇشتۇعىرلى ءتىل» دەگەن ارامازالىقتى ويلاپ تاپقان ناسىلشىلدىك رەجىمدى ورناتقان «نازارباەۆ سيندرومىنىڭ» ءتۇرلى ارسىزدىعىنىڭ بەت پەردەسىن اشىپ جاتىر.

ءبىز جەكە باسقا تابىنۋدىڭ ءۇش-اق سالدارىن ايتايىق. استانا قالاسى ءوز تاريحي اتاۋى اقمولا اتىن يەلەنە مە؟ ءانۇرانىمىزدىڭ نۇرسۇلتان جىرىمداعان نۇسقاسى اۋەلگى ءتول نۇسقاسىمەن اۋىستىرىلا ما؟ سارا نازارباەۆنىڭ ەشكىمگە كەرەكسىز مەكتەپ وقۋشىلارىنىڭ مي اشىتقان «ءوزىن-ءوزى تانۋ»  ءپانى 2022-2023 وقۋ جىلىندا مەكتەپ باعدارلاماسىنان الىنىپ تاستالا ما؟

وسى «جاڭا قازاقستاننىڭ» ءوز ومىرشەڭدىگىن تانىتۋى قازاق ءتىلىنىڭ ەلىمىزدەگى ءىرى-ۇساق دياسپورا وكىلدەرىنىڭ باسىن انا ءتىلىمىزدىڭ ماڭىنا توپتاستىرۋ باستى باعدار.

نازارباەۆتىڭ «دامىعان 50 ەلۋدىڭ قاتارىنا قوسىلۋ» ەرتەگىسىنە وقىعان قازاقتاردىڭ بەرەر جاۋابى: «الەمدە  49 ءتىل عانا ءوز بولمىسىن ساقتاپ قالا الادى. ويتكەنى انا تىلىندە عىلىمي-ءىلىمي دەربەستىك ورناتىپ، اقپاراتتىق جانە ىنتەرنەت كونتەنت قالىپتاستىرىپ وتىر وسىلاردىڭ قاتارىنا 50-ءشى بولىپ قازاقتى قالاي قوسامىز. «100 جاڭا وقۋلىق» كوزبوياۋشىلىعىن جوققا شىعارىپ، ءتىل بولاشاعىن سۋبتيتر شەشەدى، دىبىستاۋ بەكەمدەيدى، كىتابي اۋدارما كەلەسى ۇرپاققا اماناتتايدى.

وسى اماناتتى «جاڭا قازاقستان» قۇرۋعا تالپىنعان بيلىك قازاق ءتىلدى ايماقتاردى دامىتۋعا باعىت-باعدار ۇستانىپ، جەكە باسقا تابىنۋدىڭ ەرەك ءتۇرى «نازارباەۆ سيندرومىنان» ارىلسا عانا جۇزەگە اسىرا الادى.

ءابىل-سەرىك الىاكبار

Abai.kz