قازاقستان پرەزيدەنتى قاسىم-جومارت توقاەۆ «روسسيا 24» ارناسىنا سۇحبات بەرىپ، سۇحبات بارىسىندا ۇقشۇ مەن ەەو جايلى دا ايتقان بولاتىن.

وندا پرەزيدەنت توقاەۆ «قازاقستان ەاەو پەن ۇقشۇ-دان شىقپايتىنىن، وعان نەگىز جوق ەكەنىن» ايتا كەتتى. سونىمەن قاتار، باتىس تاراپىنان سالىنعان سانكتسيالاردىڭ قازاقستان ارقىلى بۇزىلۋىنا جول بەرمەيتىنىن دە اشىق ايتتى. بۇعان رەسەي ساراپشىلارى تۋلاپ جاتىر.

«REGNUM» رەداكتورى مودەست كولەروۆ بىلاي دەيدى: «ەاەو مەن ۇقشۇ نەگىزگى ۇيىم، جۇيە رەتىندە ءولدى. ونى ولتىرگەن - قازاقستان. باتىس سالعان سانكتسيالار ماڭگىلىك، ال سول ماڭگىلىك سانكتسيالاردى «باۋىرلاس» قازاقستان قولدادى. بۇل دەگەنىمىز ەاەو مەن ۇقشۇ اياسىنداعى وداقتاستىققا ەش سايكەس ەمەس. ەندى ەاەو مەن ۇقشۇ ءومىر ءسۇرىپ جاتقانداي كەيىپ تانىتاتىنىن باقىلاپ وتىرايىق.

نە ءۇشىن؟ ەاەو مەن ۇقشۇ و باستا رەسەي رەسۋرسىن ەكسپلۋاتاتسيا جاساۋ ءۇشىن قۇرىلدى عوي. رەسەي مەن وزگە ەلدەر اراسىندا دونور ءپرينتسيپى سىندى قاتىناس بولۋى مۇمكىن، الايدا باتىس ول قاتىناستى توقتات دەگەندە وزگەلەر توقتاتادى. الايدا ونىڭ ورنىنا باتىس بالاما ۇسىنباسى انىق. وسىلايشا رەسەيدەن باس تارتقانداردىڭ ءوزىن باتىس جازالايدى. بۇرىنعى كسرو كەڭىستىگىندە رەسەيگە نە قالادى؟ تەك قانا وداقتاس ەل جوباسى اياسىندا وتىرىك كۇلىپ، ەرىكسىز جىميىپ قاتىناس جاساۋ قالادى. الايدا زاماناۋي ەۋرازيالىق ۇستەمدىك ناعىز ولىك دەسەك تە بولادى»، - دەيدى ول.

ەۋرازيالىق ەكونوميكالىق وداق قۇرىلعالى بەرى قازاقستان قوعامى اتالمىش وداقتان شىعۋ كەرەكتىگىن ايتىپ، تالاي مارتە جەلىدە پەتيتسياعا قول جيناپ، باستاما كوتەردى. ساراپشىلار ەاەو قازاقستان كاسىپكەرلەرىنە تەك قانا زيان اكەلەتىنىن ايتىپ كەلەدى. ال باتىستىڭ رەسەيگە سانكتسياسى كۇشەيگەن ساتتەن باستاپ، وداقتان شىعۋ كەرەكتىگىن ايتۋشىلار سانى كۇرت ارتتى.

ساراپشىلار قازاقستان وداقتان شىقپاسا، باتىس تاراپى وداققا مۇشە بارلىق ەلدەرگە سانكتسيا سالۋ مۇمكىندىگىن ەسكەرتۋدە. جاناما سانكتسيالار ەل ەكونوميكاسىن قۇردىمعا جىبەرىپ، جاعدايدى ءتىپتى تيتىقتاتىپ جىبەرەتىنىن ايتادى.

قازاقستان وداق ىشىندەگى رەسەي باستاماسىنا ءجيى قارسى شىعۋشى جالعىز ەل. مىسالى استىق ەكسپورتىنا تىيىم سالۋ مەن قانتتى ساتۋعا قاتىستى شەشىمدەرىنە قارسى شىقتى. ورتاق ۆاليۋتا مەن وداقتاستىقتى ەكونوميكادان وزگە سالالارعا وتكىزۋ كەرەكتىگىنە تىيىم سالۋ كەرەكتىگىن ايتتى.

Abai.kz