دۇيسەنبى, 26 قىركۇيەك 2022
46 - ءسوز 2307 2 پىكىر 26 شىلدە, 2022 ساعات 14:06

قاراپايىم قازاقتىڭ قالتاسىن دا ساقتاپ قالامىز دەسەك...

ءبىز قوعامدى دەموكراتيزاتسيالاندىرامىز، ءسوز بوستاندىعىن ەنگىزەمىز، پىكىر پليۋراليزمىن جاڭعىرتامىز دەپ ايتامىز. دۇرىس-اق، كەرەك قۇبىلىستار. سونىمەن قاتار، مەن قازاقتىڭ (باسقا ۇلتتىڭ ەمەس) ىسىراپشىلدىعىنا ءبىر كوڭىل بولەر ەدىم.

قازاقتىڭ تويى تىم ىسىراپشىل ءارى ماقتانقۇمارلىققا تولى. جىگىت جاعى دا، قىز جاعى دا، سوڭعىسىن بەرىپ شاشىلۋعا بەيىم، كوپتەگەن تويلار نەسيەگە جاسالىپ جاتقانى دا قۇپيا ەمەس. داراقىلىق، ءبىر-بىرىمەن جارىسۋ، "ەل نە دەيدى؟" دەگەن ساسىق كەۋدە، قۇر ماقتان. توي بىتكەننەن كەيىن قينالاتىن جاستار، نەسيە تولەيتىن دە جاستار، جوقشىلىققا شىداماي اجىراساتىن دا سول جاستار. ەلىمىزدەگى اجىراسۋ پايىزى جوعارى بولىپ وتىرعانىنىڭ ءبىر سەبەبى دە، سول تويداعى بوسقا مال شاشپاق سياقتى.

تويداعى ءتارتىپ بولەك اڭگىمە. الەۋمەتتىك جەلىدە تويدا ءىش كيىممەن بيلەپ، ءبىر-بىرىمەن سۇيكەلىپ شار جارىپ، ەكى بۇتىنا بانان قىستىرىپ ونى ايەلىنە جەگىزىپ دەگەن سياقتى انايى ويىنداردى كوزىمىز شالىپ قالادى. توي مادەنيەتى جوق. بۇرىڭعى قازاقتىڭ تويى - ماسەلەنى تالقىلاپ، ارازداسقان جاقتاردى تاتۋلاستىرۋ، ورتاعا وي تاستاۋ ەدى. بۇگىنگى توي قيقۋ مەن شيقۋ، انايىلىق پەن داراقىلىق ورداسىنا اينالدى.

ەلىمىزدە پروبلەما كوپ. بىلەمىن. دەسە دە، وسى توي ماسەلەسىن ءبىر جونگە سالاتىن كەز كەلگەن سياقتى. ساياسات/ەكونوميكا دا ماڭىزدى شىعار، بىراق قاراپايىم قازاقتىڭ كوپتەپ زارداپ شەگەتىن جەرى وسى تويدىڭ جونگە كەلمەۋى، تويدىڭ ورتاق ءتارتىبىنىڭ بولماۋى. تويدى ىسىراپشىلدىقتان قۇتقارساق، قاراپايىم قازاقتىڭ قالتاسىن دا ساقتاپ قالامىز.

سامات نۇرتازا

Abai.kz

2 پىكىر