5 شىلدەدە شىمكەنت قالالىق پروكۋراتۋراسىنىڭ ارنايى پروكۋرورلار باسقارماسىنىڭ باسشىسى نۇرجان كولباەۆ شىعارىپ، 20 شىلدەدە قالا پروكۋرورىنىڭ ورىنباسارى ەرجان مارات بەكىتكەن قاۋلىنى پروكۋراتۋرا "كۇدىكتى 21 ادامعا" كەشە، شىلدەنىڭ 25-ىنە بەرگەن.

قاۋلىدا قاڭتار وقيعاسى كەزىندە "جاپپاي تارتىپسىزدىككە قاتىستى" دەپ ايىپتالعان 68 ادامنىڭ 58-ىنە سوت ۇكىمى شىققانى، 9 ادامنىڭ ءىسى سوت تەرگەۋىندە، ءبىر ادامنىڭ ءىسى قالا پروكۋراتۋراسىندا ەكەنى، تاعى دا 27 ادام كۇدىكتى رەتىندە تەرگەۋدە وتىرعانى ايتىلعان.

قاڭتار وقيعاسىنا بايلانىستى "جاپپاي تارتىپسىزدىك" بابىنىڭ "جاپپاي تارتىپسىزدىككە شاقىرۋ" بولىگى بويىنشا (272-باپتىڭ 3-بولىگى) كۇدىككە ىلىنگەن 21 ادامنىڭ ءىسى "جابىرلەنۋشى" دەپ تانىلعان "كورمە" ورتالىعى مەن قالا اكىمدىگىمەن كەلىسىمگە كەلۋىنە، كەلتىرگەن زالالدى وتەۋىنە، ايىپتى مويىنداۋى مەن جاساعان ىسىنە وكىنەتىنىنە بايلانىستى توقتاتىلعان.

قىلمىستىق جاۋاپتان بوساتىلعانداردىڭ ۇلكەنى – 46 جاستا، كىشىسى – 20 جاستا. ولاردىڭ ىشىندە قوعام بەلسەندىلەرى نۇرلىباي تاتاەۆ پەن كاريما حايدارقۇلوۆا دا بار.

- ءىستىڭ توقتاتىلعانىمەن تولىق كەلىسەمىن. قازىرگى كەزدە سوتتالماعاننىڭ ءوزى – جەڭىس، - دەيدى بەلسەندى نۇرلىباي تاتاەۆ.

4-6 قاڭتار ارالىعىندا شىمكەنتتە بولعان قاڭتار وقيعاسى بەيبىت شەرۋمەن باستالىپ، سوڭى جاپپاي دۇربەلەڭگە ۇلاسقان. وقيعا كەزىندە 20 ادام قايتىس بولعان. ولاردىڭ ۇلكەنى – 37 جاستا، كىشىسى – 17 جاستا.

قاڭتار ايىندا قالالىق دەنساۋلىق ساقتاۋ باسقارماسى وقيعا كەزىندە 125 ادام جارالاعانىن مالىمدەگەن. شىمكەنت قالالىق پروكۋراتۋرا مالىمەتىنە قاراعاندا، ەكى جۇزدەن استام ادام جارالانعان، ونىڭ 72-سىنە وق تيگەن.

Abai.kz