بيىل قازاقستاندا العاش رەت 1 جەلتوقسان كۇنى تۇڭعىش پرەزيدەنت كۇنى اتالىپ وتەدى. كۇنتىزبەگە قىزىل بەلگىمەن ەنەتىن بۇل كۇننىڭ ەلىمىز ءۇشىن ورنى بولەك. سەبەبى ءوزىنىڭ جەكە ءانۇرانى، مەملەكەتتىك رامىزدەرى بار تاۋەلسىز ەلىمىزدىڭ ۋىعىن قاداپ، شاڭىراعىن كوتەرىپ، ىرگەسىن بەكىتكەن تۇڭعىش پرەزيدەنتىمىز نۇرسۇلتان نازارباەۆتىڭ حالىق الدىندا، مەملەكەت الدىندا ەڭبەگى وراسان زور.

بيىل قازاقستاندا العاش رەت 1 جەلتوقسان كۇنى تۇڭعىش پرەزيدەنت كۇنى اتالىپ وتەدى. كۇنتىزبەگە قىزىل بەلگىمەن ەنەتىن بۇل كۇننىڭ ەلىمىز ءۇشىن ورنى بولەك. سەبەبى ءوزىنىڭ جەكە ءانۇرانى، مەملەكەتتىك رامىزدەرى بار تاۋەلسىز ەلىمىزدىڭ ۋىعىن قاداپ، شاڭىراعىن كوتەرىپ، ىرگەسىن بەكىتكەن تۇڭعىش پرەزيدەنتىمىز نۇرسۇلتان نازارباەۆتىڭ حالىق الدىندا، مەملەكەت الدىندا ەڭبەگى وراسان زور.

كسرو كۇيرەگەن ءولىارا شاقتا، جەرىنىڭ تۇتاستىعىن ساقتاي وتىرىپ، ەلدىڭ ىرگەسىن سوكپەي، تاتۋلىق پەن بىرلىكتى، دوستىق پەن سىيلاستىقتى تۋ ەتىپ كوتەرە وتىرىپ، تاۋەلسىزدىگى باياندى، جاسامپاز قازاقستان مەملەكەتىن قۇرا ءبىلدى. كۇرمەۋى كوپ قيىن شاقتا، سوقتىقپالى، سوقپاقسىز كەزدە تىڭنان تۇرەن سالىپ، وزىنە سەنىم ارتقان جۇرتىن ەشقانداي قانتوگىسسىز وركەنيەتكە جەتەلەگەن ءھام دامىعان الەۋەتتى مەملەكەتتەردىڭ الدىڭعى قاتارىنا قوسا بىلگەن پرەزيدەنتتىڭ ورنى ەرەك. دەمەك حالىق الدىندا وسىنداي تولاعاي تىرلىك اتقارعان پرەزيدەنت كۇنىن اتاپ ءوتۋ ەش ابەستىك ەمەس. قايتا قۋانىش، مارتەبە. جالپى، مۇنداي مەرەكە الەمدىك تاجىريبەدە بار. دۇنيەنىڭ بىرقاتار ەلدەرى سوڭعى ءبىر عاسىردا مەملەكەتتەرىنىڭ ىرگەتاسىن قالاعان اردا ۇلدارىنىڭ ەڭبەگىن ەلەپ-ەسكەرىپ، ولار تاققا مىنگەن كۇندى سالتاناتتى تۇردە، ۇلتتىق مەيرام ەتىپ بەلگىلەپ تويلاپ كەلەدى. وزگە مەملەكەتتەردى بىلاي قويعاندا، الەمنىڭ الپاۋىت ەلى اقش پرەزيدەنت كۇنىنە ەرەكشە كوڭىل بولەدى. 22 اقپاندا جىل سايىن اقش-تا پرەزيدەنت كۇنى دەپ اتالىپ وتەدى. بۇل مەيرام 1782 جىلدان باستاۋ الادى. ءدال وسى جىلى ۆيردجيني شتاتىنداعى ريچموند شاھارىندا العاش رەت اقش-تىڭ تۇڭعىش پرەزيدەنتى دجوردج ۆاشينگتوننىڭ تۋعان كۇنى اتالىپ ءوتتى. ءسوز جوق، شتاتتار ەلى ءۇشىن، تاۋەلسىزدىكتىڭ اتاسى سانالاتىن ۆاشينگتوننىڭ ورنى الابوتەن. تويلاۋعا اتاپ وتۋگە تۇراتىن بىرەگەي تۇلعا. 19 عاسىردان، ياعني 1880 جىلدان باستاپ بۇل كۇن اقش-تا كەڭ تۇردە اتالىپ وتە باستادى. سالتاناتتى جيىندار وتكىزىلىپ، تانىمال ساياساتكەرلەر شەشەندىك سوزدەرىن ارناپ جاتتى. ال قاراپايىم حالىق تا بۇل مەرەكەدەن كەندە قالعان جوق. وزدەرىنشە تويلادى. اتاپ ءوتتى. ءسويتىپ پرەزيدەنت كۇنى حالىقتىق مەرەكەگە اينالدى. سونداي-اق اقپان ايىندا سولتۇستىك پەن وڭتۇستىك سوعىسىن توقتاتقان جانە شتاتتار جەرىندەگى قۇلدىق بيلىكتى جويعان اقش ءۇشىن ورنى بولەك ۇلى قايراتكەر، پرەزيدەنت اۆراام لينكولننىڭ تۋعان (12 اقپان) كۇنى. بۇل كۇن رەسمي تۇردە مەيرامدار قاتارىنا قوسىلماسا دا، كوپشىلىك وزدەرىنشە اتاپ ءوتىپ جاتادى. 1971 جىلى پرەزيدەنت ريچارد نيكسوننىڭ ەكى ۇلى پرەزيدەنت كۇنىن بىرگە اتاپ ءوتۋ جونىندە ۇسىنىس ءبىلدىردى. سونداي-اق وزگە پرەزيدەنتتەردى دە وسى كۇنى ەسكە الۋ كەرەكتىگىن ەسكە سالدى. سودان بەرى اقپان ايىنىڭ ءۇشىنشى دۇيسەنبى كۇنى اقش-تا جالپى حالىقتىق دەمالىس كۇنى بولىپ بەلگىلەنىپ، مەيرام رەتىندە تويلانىپ كەلەدى. بۇل كۇنى ساياسي شەرۋلەر، ءارتۇرلى اكتسيالار ءوتىپ، وندا حالىقتىڭ رۋحىن كوتەرەتىن اڭگىمەلەر ايتىلىپ، ازاماتتاردىڭ قانداي مەملەكەتتە ءومىر ءسۇرىپ جاتقاندىعىن ماقتانىشپەن ەسكە سالىپ وتىرادى. 
ءدال وسىنداي مەرەكە ءبىزدىڭ ەلىمىزدە دە جاڭعىرىپ، جاڭاشا جاعدايدا تاۋەلسىزدىگىمىزدى پاش ەتىپ، اتالىپ ءوتىپ جاتسا جاقسى ەمەس پە؟ بىرىنشىدەن، بۇل مەملەكەتتىڭ ىرگەتاسىن قالاعان تۇڭعىش پرەزيدەنتىمىزگە ءىلتيپات، ەكىنشىدەن حالىقتىڭ قانداي ەلدە تۇرىپ جاتقانىن ەسكە سالىپ، سىيلاستىققا، دوستىققا شاقىرۋ، بەرەكە-بىرلىككە جەتەلەۋ بولماق.

سەيسەن امىربەكۇلى

«ايقىن» گازەتى