رەسەيدىڭ زاپوروجە اتوم ەلەكتر ستانتسياسىنان اسكەرىن الىپ كەتۋدى 42 مەملەكەت سۇراپ وتىر. ۇندەۋ 14 تامىزدا ەۋرووداقتىڭ رەسمي سايتىندا جاريالاندى.

رەسەي ناۋرىزدا ەۋروپاداعى ەڭ ءىرى اتوم ەلەكتر ستانتسياسىن باسىپ العان بولاتىن. ول جاقتا ءالى كۇنگە دەيىن ۋكراينا ماماندارى جۇمىس ىستەپ جاتىر. سوڭعى اپتالاردا ستانتسيا اۋماعىنا بىرنەشە رەت سناريادتار قۇلاعان. كيەۆ پەن ماسكەۋ ءبىر-ءبىرىن ايىپتادى.

42 مەملەكەتتىڭ رەسەيگە ارناعان ۇندەۋىنە ەۋرووداق ەلدەرى، اۆستراليا، ۇلىبريتانيا، گرۋزيا، يسلانديا، كانادا، ليحتەنشتەين، مولدوۆا، جاڭا زەلانديا، نورۆەگيا، سولتۇستىك ماكەدونيا، اقش، چەرنوگوريا، وڭتۇستىك كورەيا جانە جاپونيا قول قويعان. ۇندەۋ اۆتورلارى رەسەيدى اسكەرىن اەس اۋماعى مەن جاقىن ماڭنان، تۇتاس ۋكراينادان الىپ كەتۋگە شاقىرعان.

"رەسەي اسكەرى مەن قارۋ-جاراعىنىڭ يادرولىق نىسانعا ورنالاسۋىنا جول بەرۋگە بولمايدى. بۇل اتوم ەنەرگيا جونىندەگى حالىقارالىق اگەنتتىككە (ماگاتە) مۇشە بارلىق ەل ساقتاۋى ءتيىس قاۋىپسىزدىك پرينتسيپتەرىنە قايشى" دەپ جازىلعان ۇندەۋدە.

مالىمدەمە اۆتورلارى رەسەي اسكەرىنىڭ يادرولىق نىساندا بولۋى ۋكرايناعا يادرولىق قاۋىپسىزدىك بويىنشا العان مىندەتتەمەلەرىن ورىنداۋعا، ماگاتە جۇمىسىنا دا بوگەت جاسايتىنىن ايتادى.

ماسكەۋ ورىس اسكەرى سوعىس جاعدايىندا نىساندى كۇزەتۋ ءۇشىن اەس-كە ورنالاستى دەپ اقتالعان بولاتىن. ماسكەۋ ماگاتە ينسپەكتورلارىن نىسانعا كەلۋگە ۇندەگەن. ال كيەۆ حالىقارالىق اگەنتتىك ماماندارى ۋكراينا زاڭىنا سايكەس ەلگە كەلىپ-كەتۋى ءتيىس دەپ ساپارعا قارسى بولعان.

بۇۇ رەسەي مەن ۋكراينانى ستانتسيا ماڭىندا سوعىستان تىس ايماق ۇيىمداستىرۋعا شاقىرعان ەدى. ۋكراينا مەن تاعى بىرنەشە مەملەكەت تە سونداي ۇندەۋ تاستادى. ماسكەۋ ۇسىنىستى قولداعان جوق.

Abai.kz