قازاقستاننىڭ بىرنەشە قالاسىندا ايەلدەردىڭ زەينەت جاسىن 58-دەن اسىرماۋدى تالاپ ەتكەن جيىن ءوتتى، - دەپ حابارلايدى ازاتتىق راديوسى. 

قازاقستاننىڭ بىرنەشە ءىرى قالاسى: نۇر-سۇلتان، الماتى، اقتوبە جانە شىمكەنت قالالارىندا ايەلدەردىڭ زەينەت جاسىن 58-دەن اسىرماۋدى تالاپ ەتكەن جيىن ءوتتى. قازاقستان ايەلدەرى قوزعالىسى ۇيىمداستىرعان جيىنعا كەيبىر ساياسي پارتيا وكىلدەرى دە كەلىپ، بۇل ماسەلەنى پارلامەنتتە كوتەرۋگە ۋادە بەرگەن.

ءتۇرلى قالاداعى جيىننىڭ ۇراندارى ۇقساس بولدى. جيىنعا كەلگەندەر “تەك ايەلدەردىڭ زەينەت جاسىن كوتەرۋ - كونستيتۋتسيانى بۇزۋ”، “ايەلدەرگە زەينەتكە شىعۋ جاسىن - 58 جاستى قايتارىڭدار”، “زەينەت جاسىن كوتەردى، قايدا جۇمىس ىستەيمىز؟” دەگەن جازۋى بار پلاكات ۇستاپ شىققان. جيىنعا كەلگەندەردىڭ كوبى زەينەت جاسىنا جاقىنداعان، ۇلتتىق ستيلدەگى كيىم كيىپ، اق ورامال تاققان ايەلدەر.

ولاردىڭ ايتۋىنشا، اسىرەسە "دەنە ەڭبەگىمەن جۇمىس ىستەيتىن ايەلدەردى ەرلەرمەن بىردەي 63 جاستا زەينەتكە شىعارۋ – قيانات".

شىمكەنت قالاسىنداعى جيىنعا 30-دان استام ادام قاتىستى. جيىنعا كەلگەن 56 جاستاعى اەليتا حاسانوۆا زاۋىتتا قارا جۇمىس ىستەيتىنىن، جاس ۇلعايعان سايىن جۇمىس ىستەۋدىڭ قيىنداپ بارا جاتقانىن ايتتى.

نۇر-سۇلتان قالاسىنداعى جيىنعا 100-دەن اسا ادام قاتىستى. بۇل جيىنعا مارگاريتا دوتسەنكو اقمولا وبلىسىنىڭ ساندىقتاۋ اۋدانىنىڭ بالكاشينو اۋىلىنان ارنايى كەلگەن.

- قازىردىڭ وزىندە جۇمىسقا بارماق تۇگىلى، ورنىمنان ارەڭ تۇرامىن. ۇكىمەت زەينەت جاسىن 58-دەن اسىرماسىن،-دەيدى ول.

نۇر-سۇلتانداعى جيىنعا پارلامەنتتەگى "اق جول" پارتياسىنىڭ وكىلى سەرىك ءتۇسىپوۆ كەلىپ، بۇل ماسەلەنى پارلامەنتتە كوتەرۋ قاجەتتىگىن" ايتقان. ءوزىن "قازاقستان حالىقتىق پارتياسىنىڭ" وكىلىمىن دەپ تانىستىرعان نۇرداۋلەت ورازحانوۆ "ايەلدەردىڭ زەينەت جاسىن 58-دەن اسىرۋعا ءوز پارتياسى ءاۋ باستان قارسى بولعانىن" مالىمدەگەن. اتالعان ەكى پارتيا دا ايەلدەردىڭ زەينەت جاسىن ەرلەردىڭ زەينەت جاسىمەن بىرتىندەپ تەڭەستىرۋ تۋرالى زاڭ قابىلدانعاندا پارلامەنتتە وتىرعان بيلىكشىل پارتيالار سانالادى.

ميتينگىنى قازاقستان ايەلدەرى قوزعالىسى ۇيىمداستىرعان. قوزعالىس مۇنداي جيىننىڭ قوستاناي، پاۆلودار، سەمەي قالالارىندا دا وتەتىنىن مالىمدەگەن. وسى تاقىرىپتاعى جيىن بيىل مامىر ايىندا دا نۇر-سۇلتان، اقتوبە، تاراز، قوستاناي جانە سەمەي قالالارىندا بولعان.

بۇگىنگى جيىنعا جەرگىلىكتى اكىمدىكتەر رۇقسات بەرگەن. جينالعانداردى پوليتسيا مەن اكىمدىك قىزمەتكەرلەرى باقىلاپ تۇردى.

قازاقستان 2018 جىلدان باستاپ ايەلدەردىڭ زەينەت جاسىن التى اي سايىن كوتەرىپ كەلەدى. 2027 جىلعا قاراي ايەلدەر ەرلەرمەن بىردەي 63 جاستا زەينەتكە شىعۋعا ءتيىس. بيىل، 2022 جىلى ايەلدەردىڭ زەينەت جاسى 60,5 جىل بولدى.

مەملەكت مۇنى "قارتايعاندا ايەلدەر وزدەرىن زەينەتاقىمەن قامتاماسىز ەتۋ ءۇشىن زەينەت جاسىن بىرتىندەپ ۇلايعاپ وتىرمىز" دەپ تۇسىندىرەدى. بيىل مامىر ايىندا قازاقستاننىڭ ۆيتسە-پرەمەرى ەرالى توعجانوۆ ۇكىمەت ايەلدەردىڭ كەي ساناتىنىڭ زەينەت جاسىن تومەندەتۋدى كوزدەپ وتىرعانىن مالىمدەگەن. كەيىنىرەك ەڭبەك جانە حالىقتى الەۋمەتتىك قورعاۋ مينيسترلىگى "قولايلى نۇسقانى" انىقتاۋ ءۇشىن ەسەپ-قيساپ جاسايتىنىن حابارلاعان.

Abai.kz