پرەزيدەنت قوستاناي وبلىسىندا بولعان ءورتتى ءسوندىرۋ جونىندەگى شۇعىل ارەكەت ەتۋ شتابىنىڭ وتىرىسىن وتكىزدى.

مەملەكەت باسشىسى توتەنشە جاعدايلار ءمينيسترى يۋري يلين مەن قوستاناي وبلىسىنىڭ اكىمى ارحيمەد مۇحامبەتوۆتىڭ ءورتتى اۋىزدىقتاۋ، ەلدى مەكەندەردەگى ازاماتتاردى ەۆاكۋاتسيالاۋ جانە زارداپ شەككەن تۇرعىندارعا قولداۋ كورسەتۋ جونىندە قابىلدانعان شارالار تۋرالى باياندامالارىن تىڭدادى.

پرەزيدەنت وڭىردەگى احۋالدىڭ باقىلاۋدا ەكەنىن ايتتى. تابيعي اپاتتى جويۋ ءۇشىن بارلىق قاجەتتى شارالار قابىلدانعان.

قاسىم-جومارت توقاەۆ بولعان جاعدايدان ءتيىستى ساباق الۋ قاجەت ەكەنىن اتاپ ءوتىپ، ءورتتى تولىق ءارى جىلدام اۋىزدىقتاۋ ءۇشىن شۇعىل ارەكەت ەتۋ شتابىنا بارلىق ۆەدومستۆونىڭ ۇزدىكسىز جۇمىسىن قامتاماسىز ەتۋگە باعىتتالعان بىرقاتار ناقتى تاپسىرما بەردى.

پرەزيدەنت ۇيلەرىن تاستاپ كەتۋگە ءماجبۇر بولعان ادامدارعا تولىققاندى قولداۋ كورسەتۋدىڭ ماڭىزدى ەكەنىن اتاپ ءوتتى. ۇكىمەت پەن قوستاناي وبلىسىنىڭ اكىمدىگىنە زارداپ شەككەن تۇرعىندارعا شۇعىل تۇردە وتەماقى تولەۋ ماسەلەسىن قامتاماسىز ەتۋ تاپسىرىلدى.

– زارداپ شەككەن ازاماتتاردىڭ بارىنە قاجەتتى كومەك بەرىلەدى. ولار قاۋىپسىز جەرگە كوشىرىلدى. مەنىڭ تاپسىرمام بويىنشا ۇكىمەت ءتيىستى ماسەلەلەردى شەشۋ جۇمىستارىمەن اينالىسىپ جاتىر. كومەك كورسەتىلەتىنە ەشقانداي كۇمان بولماۋعا ءتيىس، – دەدى مەملەكەت باسشىسى.

قاسىم-جومارت توقاەۆ ءورتتىڭ شىعۋ سەبەبىن انىقتاۋ قاجەت ەكەنىنە نازار اۋداردى. ونىڭ ايتۋىنشا، ورمان القابىن قايتا قالپىنا كەلتىرۋ ءۇشىن كەشەندى شارالار ازىرلەپ، الداعى ۋاقىتتا وسىنداي اپاتتى جاعدايلاردى بولدىرماۋ جونىندەگى الدىن الۋ جۇمىستارىن جۇرگىزۋ كەرەك.

پرەزيدەنت توتەنشە جاعدايلار مينيسترلىگىن ۆەدومستۆو قىزمەتكەرلەرىنىڭ الەۋمەتتىك، سونىڭ ىشىندە تۇرعىن ۇيگە جانە جاتاقحاناعا قاتىستى ماسەلەلەرىن شەشۋگە جانە قامتاماسىز ەتۋگە، سونداي-اق كاسىبي كادرلاردىڭ دايىندىق دەڭگەيىن ارتتىرۋعا قابىلەتتى ينستيتۋت رەتىندە ايتارلىقتاي كۇشەيتۋ قاجەت ەكەنىن ايتتى.

مەملەكەت باسشىسى توتەنشە جاعدايلار، ىشكى ىستەر جانە قورعانىس مينيسترلىكتەرىنىڭ ءورت ءسوندىرۋ بولىمشەلەرىنىڭ جەكە قۇرامىمەن، سونداي-اق ءورتتى اۋىزدىقتاۋعا تارتىلعان ەرىكتىلەرمەن كەزدەستى.

قاسىم-جومارت توقاەۆ توتەنشە جاعدايدى جويۋعا اتسالىسقان بارلىق ازاماتتىڭ جاساعان ەرلىگى ءۇشىن العىس ءبىلدىرىپ، ولار ناگرادالار مەن سىيلىقتارعا ۇسىنىلاتىنىن ايتتى.

پرەزيدەنت ماتەريالدىق ۇلەس جاعدايىن جاقسارتۋ، تۇرعىن ۇيمەن قامتاماسىز ەتۋ جانە كادرلار دايىنداۋ ءۇشىن جاعداي جاساۋ جونىندە شارالار قابىلداناتىنىن جەتكىزدى.

پرەزيدەنت سونىمەن قاتار احمەت بايتۇرسىنۇلىنىڭ مەرەيتويى اتاپ وتىلەتىنىن اتاپ ءوتتى.

«راسىندا، بۇل – ۇلكەن شارۋا. زارداپ شەككەن ازاماتتاردىڭ ءبارى ەكى-ءۇش ايدىڭ ىشىندە باسپانالى بولادى دەپ ۋادەمدى بەردىم. وعان كۇمانىم جوق. ول – ءبىر. ەكىنشىدەن، احمەت بايتۇرسىنۇلىنىڭ مەرەيتويىنا قاتىستى. ەڭ الدىمەن، وسى ماسەلەنى شەشەيىك. سودان كەيىن اماندىق بولسا، وسى ءبىر قاسيەتتى جەرگە كەلىپ، احمەت بايتۇرسىنۇلى بابامىزدىڭ رۋحىنا تاعزىم ەتىپ، تويدى وتكىزەمىز»، – دەدى پرەزيدەنت.

Abai.kz