قىرعىز-تاجىك شەكاراسىندا تاعى قاقتىعىس، تاعى اتىس بولدى. 

قىرعىزستان ۇلتتىق قاۋىپسىزدىك مەملەكەتتىك كوميتەتىنىڭ شەكارا قىزمەتى 14 قىركۇيەكتە باتكەن وبلىسىنىڭ بۇلاق-باشى اۋدانىندا قىرعىزستان شەكاراشىلارى تاجىكستاننان كەلگەن جاساقتى انىقتاعانىن حابارلادى.

قىرعىزستان ۇلتتىق قاۋىپسىزدىك مەملەكەتتىك كوميتەتى وكىلدەرىنىڭ ايتۋىنشا، كورشى ەلدىڭ اسكەري قىزمەتكەرلەرى كەلىسىمدى بۇزا وتىرىپ، مەملەكەتتىك شەكارانىڭ بەلگىلەنبەگەن ۋچاسكەسىندە جاۋىنگەرلىك پوزيتسياعا ورنالاسقان.

"قىرعىز تاراپىنىڭ اۋماقتان كەتۋ تۋرالى تالاپتارىن ەلەمەي، تاجىك شەكاراشىلارى وق جاۋدىردى. بۇعان جاۋاپ رەتىندە قىرعىزستان شەكاراشىلارى دا قارۋ قولداندى. اتىس باستالدى، ونىڭ بارىسىندا تاجىك تاراپى مينومەت قولداندى. ساعات 9:30-داعى جاعداي بويىنشا، اتىس مەزگىل-مەزگىل بولىپ جاتىر. الدىن الا مالىمەت بويىنشا، قىرعىز تاراپىنان زارداپ شەككەندەر مەن جارالانعاندار جوق", - دەدى قىرعىزستان شەكارا قىزمەتىنىڭ ءباسپاسوز ورتالىعى وكىلدەرى.

قازىر جاعداي ءبىرشاما تۇراقتاندى. ەكى ەل ماسەلەنى بەيبىت شەشۋگە تىرىسۋدا.

Abai.kz