بەيسەنبى, 28 ناۋرىز 2024
كورشىنىڭ كولەڭكەسى 2873 0 پىكىر 15 قىركۇيەك, 2022 ساعات 14:11

رەسەيدىڭ كۇنى قىلمىسكەرلەرگە قاراپ تۇر...

رەسەي ۋكراينا سوعىسىندا ۇلكەن شىعىنعا ۇشىراۋدا. بۇل سوعىسقا قاتىسقىسى كەلەتىن ەرىكتىلەردىڭ سانىن ازايتۋدا، سوعان بايلانىستى رەسەي الدىڭعى شەپكە اتتاندىرار اسكەر ىزدەپ، سابىلىپ ءجۇر.

سۇراۋى جوق، ولسە كومۋشىسى از ادامدار توبى تابىلدى. ول قاتاڭ رەجيمدە جازاسىن وتەپ جاتقان رەسەيلىك قىلمىسكەرلەر. مىنە، وسىلاردان ارنايى اسكەر جاساقتاپ، الدىڭعى شەپكە جىبەرمەك. انىعى جىبەرىپ جاتىر. ۋكراينا قولعا تۇسكەن تۇتقىندار اراسىندا سوتتالۋشى رەسەيلىكتەردىڭ كوپ ەكەنىن ايتۋدا. فوتو، ۆيدەو دالەلدەمەلەرىن دە ۇسىندى.

كۇنى كەشە عانا الەكسەي ناۆالنىيدىڭ كومانداسى ءوزىنىڭ تەلەگرام ارناسىندا ۆيدەو جاريالادى. ۆيدەودا ۆلاديمير ءپۋتيننىڭ جاقىن دوسى  ەۆگەني پريگوجيننىڭ رەسەيدىڭ ماري ەل رەسپۋبليكاسىنداعى تۇرمەدە ءسوز سويلەپ تۇرعانى انىق تۇسىرىلگەن.

ۆ پەرۆۋيۋ وچەرەد ينتەرەسۋيۋت ۋبيتسى ي رازبوينيكي — ۆام ۋ ناس پونراۆيتسيا». پوحوجە، ەۆگەني پريگوجين ليچنو ۆەربۋەت ناەمنيكوۆ ۆ كولونياح

پريگوجين بىلاي دەيدى: "مەن ۆاگنەر دەگەن جەكە اسكەري كومپانيانىڭ وكىلىمىن. مۇمكىن ەستىگەن بولارسىڭدار. قازىر ءبىز سوعىسىپ جاتىرمىز. بۇل اۋىر سوعىس، وتە اۋىر. شەشەن نەمەسە باسقا سوعىستارمەن مۇلدە سالىستىرۋعا كەلمەيدى. ستالينگراد سوعىسىنداعىداي وق جۇمساپ جاتىرمىز. ماعان ەرىكتىلەر كەرەك. جاستارى 22-50 جاس ارالىعىندا بولعانى دۇرىس. دەنساۋلىعى وتە جاقسى، شىمىر بولسا 50 جاستان جوعارىلاردى دا قاراستىرۋعا بولادى. بۇنىڭ بارلىعى جەكە سويلەسۋ بارىسىندا انىقتالادى. ەرەجەلەر كەلەسىدەي: ۇرىس دالاسىنان قاشۋعا بولمايدى. شەگىنبەيمىز، بەرىلمەيمىز. ونى دايىندىق بارىسىندا ايتامىز. توناۋ جانە زورلاۋعا قاتاڭ تىيىم سالىنادا. ۇرىس دالاسىنان قاشقاندارعا سوعىس ەرەجەسى بويىنشا اتۋ جازاسى بەرىلەدى. جارتى جىل سوعىسقاننان كەيىن، رەسەي بيلىگى سەندەرگە راقىمشىلىق جاريالايدى. سولايشا ءوز جوندەرىڭە، بوستاندىققا كەتەسىڭدەر. قالاساڭدار بىزبەن بىرگە بولساڭدار بولادى. قازا تاپقانداردى قۇرمەتپەن جەرلەيمىز. قايدا جەرلەۋ كەرەكتىگىن ۇرىس الدىندا ايتساڭدار بولعانى. بىزدە ۇشاق، تىكۇشاق، تانك جانە تاعى باسقا سوعىسقا كەرەك تەحنيكانىڭ بارلىعى بار", - دەيدى ول.

پريگوجين "ۆاگنەر" جاك (جەكە اسكەري كومپانيا) باسشىسى رەتىندە تانىمال. ۆاگنەر جەندەتتەرى بۇعان دەيىن سيريادا جانە ليۆيادا سوعىسقانى بەلگىلى. سيريادا ۆاگنەرلىكتەر اقش-تىڭ جاك-سىمەن قاقتىعىسقا ءتۇسىپ، قىرىلىپ قالعانى جايلى اقپارات بار. انىقتالماعان دەرەكتەر بويىنشا ۆپگنەرلىكتەر سيريادا ءبىر كۇندە 200-دەن استام ادامىن جوعالتقان.

پريگوجين ۆەربۋەت زاكليۋچەننىح نا ۆوينۋ — ۆيدەو — REFORM.by

ۋكراينا سوعىسىنا ۆاگنەرلىكتەر 2014 جىلدان بەرى قاتىسۋدا. ولار نەگىزىنەن دونباسستاعى سەپاراتيستەردى اسكەري دايىندىقتان وتكىزىپ، قارۋ-جاراقپەن قامتاماسىز ەتىپ، جەكەلەگەن وپەراتسيالاردى ىسكە اسىرىپ كەلدى. ال 24-اقپاندا اشىق سوعىس باستالعان ساتتە، شابۋىلداۋشى اسكەردىڭ ءرولىن اتقاردى. ۆاگنەر جەندەتتەرى ۋكراينادا ۇلكەن شىعىنعا ۇشىراۋدا. ءتىپتى لۋگانسك وبلىسىنداعى ۆاگنەردىڭ باس شتابىنا پريگوجين بارعان ساتتە، ۋكراينا زىمىرانمەن سوققى جاساعان بولاتىن. پريگوجين سوققى جاسالعان ساتتە عيماراتتا بولماي شىقتى، ال عيمارات ىشىندەگى جۇزگە جۋىق ۆاگنەرلىك قازا تاپتى، جاراقات الدى. وقيعانىڭ ۆيدەوسىن رەسەيلىك تەلەگرام ارنالار دا تاراتتى.

وسى ۋاقىتقا دەيىن رەسەيدىڭ 17 اباقتىسىندا قىلمىسكەرلەردى سوعىسقا قاتىستىرۋ بويىنشا ۇگىت-ناسيحات جۇرگىزىلگەنى بەلگىلى بولدى. بۇل تۋرالى مەدۋزا ارنايى زەرتتەۋىن جاريالاعان بولاتىن. ال قىركۇيەكتىڭ العاشقى كۇندەرىندە پۋتين قىلمىستىق توپتىڭ سەركەسى بولعان، 25 جىلعا سوتتالعان، ماۋسىم ايىندا ۆاگنەردىڭ قۇرامىنا كىرىپ، سوعىسۋعا كەلىسىم بەرگەن يۆان نەپاراتوۆتى ماراپاتتادى. نەپاراتوۆ 5 تامىزدا باحمۋت بويىندا قازا تاپقان بولاتىن. پۋتين ونى "ەرلىگى ءۇشىن" مەدالىمەن ماراپاتتاعانى انىقتالدى.

ساراپشىلار قىلمىسكەرلەردى الدىڭعى شەپكە جىبەرۋدىڭ ارتۋى رەسەي اسكەرىندەگى شىعىننىڭ كوپ ەكەنىن كورسەتەدى دەيدى. رەسەي "ارنايى وپەراتسيا" دەپ جاريالاعاندىقتان اشىق موبيليزاتسيا جۇرگىزە المايدى. سوندىقتان سوعىسقا قاتىسۋشى ەرىكتىلەردى باسقا ادىسپەن تابۋعا ءماجبۇر. سونىڭ ءبىرى قىلمىسكەرلەردى سوعىسقا تارتۋ. ۇزاق جىلعا سوتتالعاندار "بوستاندىق بەرەدى" دەگەن اقپاراتقا سەنىپ، سوعىسقا قاتىسۋعا كەلىسىم بەرۋدە.

ماماندار قىلمىسكەرلەر قانشا دايىندىقتان وتسە دە، كاسىبي اسكەرگە توتەپ بەرۋى ەكىتالاي دەيدى. سەبەبى دايىندىق ول تاجىريبە ەمەس. سونىمەن قاتار سوعىستا ءتارتىپ ماڭىزدى، ال قىلمىسكەرلەردەن جاساقتالعان اسكەردە ول ۇلكەن ماسەلە.

اسحات قاسەنعالي

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2249
عيبىرات

قايسار رۋحتى عازيز جان

مۇحتار قۇل-مۇحاممەد 3499