كاسپي قۇبىر كونسورتسيۋمىنىڭ ماڭايىندا ۋشىققان شيەلەنىس پەن قازاقستاننىڭ قارا التىنى - مۇنايدىڭ تاعدىرى قازىر بۇكىل ەلدىڭ نازارىن وزىنە اۋدارىپ وتىر، ويتكەنى بۇل جاي عانا گەوساياسي تارتىس ەمەس، قازاقستاننىڭ ەكونوميكاسىنا اسەر ەتەر ماڭىزدى وقيعا.

قارا تەڭىز ايدىنىنداعى نوۆوروسسيسك تەرمينالىندا كەزەك-كەزەك ورىن العان درون شابۋىلدارى مەن سونان سوڭ تۋىنداعان ۇرەيلى بولجامدار قازاقستاننىڭ ەنەرگەتيكالىق قاۋىپسىزدىگى ماسەلەسىن تىعىرىققا تىرەپ تۇر. ەلىمىزدىڭ مۇناي ەكسپورتىنىڭ باسىم بولىگى وتەتىن نەگىزگى كۇرەتامىردىڭ قاۋىپسىزدىگىنە سىزات ءتۇستى. بۇل رەتتە قازاقستان مەن ۋكراينانىڭ ۇستانىمدارى؟ بۇل – باستى سۇراق!

ماسەلەنىڭ وزەگىنە ۇڭىلسەك: وسى ايدىڭ ورتاسىندا نوۆوروسسيسكىدەگى كقك تەرمينالدارىنا قاتىستى قاۋىپتى وقيعالار لەگى باستالدى. شىلدەنىڭ 17-ءسى, 19-ى جانە 20-سى كۇندەرى جۇك تيەۋ كەزىندەگى تانكەرلەرگە دروندار سوققى جاسادى.

الدىمەن «Yasa Polaris» جانە «Nordic Zenith» كەمەلەرى سوققىعا ىلىكسە، كەيىن ەنەرگەتيكا مينيسترلىگى «NELSA» تانكەرىنىڭ دە شابۋىلعا ۇشىراعانىن رەسمي تۇردە راستادى.

بۇل جاعدايدان كەيىن استانا شۇعىل تۇردە الاڭداۋشىلىق ءبىلدىرىپ، كقك نىساندارىنا جاسالىپ جاتقان شابۋىلداردى توقتاتۋعا ۇندەدى، ويتكەنى بۇل باعىت – قازاقستان مۇنايىنىڭ الەمدىك نارىققا شىعاتىن باستى قاقپاسى، بارلىق ەكسپورتىمىزدىڭ شامامەن 80 پايىزى وسى قۇبىر ارقىلى جۇزەگە اسادى.

قازاقستان مۇنايىنا قاۋىپ ءتوندى!

وسى تۇستا «Bloomberg» اگەنتتىگى جاعدايدىڭ ءتىپتى ۋشىعا تۇسەتىنىن حابارلاپ، الەمدىك قاۋىمداستىقتى دۇرلىكتىردى. اقپارات كوزدەرىنە سۇيەنگەن باسىلىم تانكەر يەلەرىنىڭ قاۋىپسىزدىكتەن قورقىپ، نوۆوروسسيسكىگە بارۋدان باس تارتىپ جاتقانىن، سالدارىنان كقك قازاقستاندىق مۇنايدى قابىلداۋدى شەكتەۋگە ءماجبۇر بولاتىنىن جازدى.

ەگەر بۇل بولجام شىندىققا اينالسا، وندىرىلگەن مۇنايدى ساقتايتىن ورىن بولماعاندىقتان، قازاقستان قارا التىن ءوندىرۋ كولەمىن امالسىز قىسقارتۋعا ءتيىس بولادى. باسىلىمنىڭ مالىمەتىنشە، مۇنداي قادام شىلدەنىڭ 21-ىنەن باستالىپ، اپتانىڭ سوڭىنا دەيىن سوزىلۋى مۇمكىن. دەگەنمەن، كقك باسشىلىعى مەن قازاقستاننىڭ ەنەرگەتيكا مينيسترلىگى بۇل اقپاراتقا قاتىستى ازىرگە رەسمي مالىمدەمە جاساعان جوق، ال بۇل ۇنسىزدىك قوعامداعى كۇدىكتى ودان سايىن كۇشەيتە تۇسۋدە.

كيەۆ نە دەيدى؟ ەلشى مايكو نە دەيدى؟

ال كيەۆ تاراپى بۇل ايىپتاۋلاردىڭ ءبارىن قاتاڭ تۇردە جوققا شىعارىپ وتىر. ۋكراينانىڭ قازاقستانداعى ەلشىسى ۆيكتور مايكو استانانىڭ الاڭداۋشىلىعىن جاقسى تۇسىنەتىندەرىن ايتا كەلە، بۇل شابۋىلدارعا ۋكراينانىڭ ەشقانداي قاتىسى جوق ەكەنىن مالىمدەدى (ەلشىنىڭ مالىمدەمەسىن ازاتتىق راديوسى جاريالادى).

ونىڭ ايتۋىنشا، ۋكراينا قارۋلى كۇشتەرى تەك قانا اسكەري نىسانداردى سوققىلاۋدا. ال قازاقستاننىڭ ەكونوميكالىق مۇددەلەرى مەن ينفراقۇرىلىمى ەشقاشان اسكەري ماقسات رەتىندە قاراستىرىلماعان.

سونىمەن قاتار، ەلشى مايكو رەسەي تاراپى ۋكراينالىق درونداردى راديوەلەكتروندىق قورعانىس قۇرالدارىمەن قاعىپ الىپ، ارانداتۋ ماقساتىندا وزدەرى قولدانۋى ىقتيمال دەگەن نۇسقانى دا العا تارتىپ، بۇل جاعدايدى جان-جاقتى تەرگەۋ قاجەتتىگىن جەتكىزدى.

قالاي بولعاندا دا، قارا تەڭىز جاعالاۋىنداعى كۇردەلى احۋال مەن درون شابۋىلدارى قازاقستاندىق مۇنايدىڭ ەركىن تاسىمالىنا ۇلكەن قاتەر ءتوندىرىپ تۇر. ەلشىلىك تاراپىنان اقتالۋلار مەن حالىقارالىق اگەنتتىكتەردىڭ دابىل قاققان بولجامدارى قاتار ءجۇرىپ جاتقان تۇستا، وتاندىق ەنەرگەتيكا سالاسىنىڭ بولاشاعى مەن ەكسپورتتىق تۇراقتىلىعى سىن ساعاتتى باستان كەشۋدە.

وسى تۋرالى پىكىرىڭىزدى Abai.kz اقپاراتتىق پورتالىنىڭ Telegram-داعى پاراقشاسىنا جازىڭىز...

ايانا قازتاي

Abai.kz