وسى سوڭعى جىلدارى كەيبىر ساۋاتسىز، ارانداتۋشى پوپۋليستەر ءوزىن قازاق كوشى-قونىنىڭ جالعىز جاناشىرى رەتىندە كورسەتىپ، قيت ەتسە بولدى ورگە-تومەن شاپقىلاپ، ايقايلاپ-اتتانداپ شىعا كەلەتىندى شىعاردى...

وندايلاردىڭ باستى ماقساتى ساياسي ۇپاي جيناپ، وزدەرىنىڭ ىشكى بىقسىق ەسەبىن جۇزەگە اسىرۋدان باسقا تۇك ەمەس!

ونداي  ارام پيعىلدى  الاوكپەلەردىڭ ۋاجىنە سەنسەك، قيىر جايلاپ شەت قونعان اعايىندى جارىلقاپ جۇرگەن سولار عانا ەكەن-مىس... قازاق بيلىگى مەن جەرگىلىكتى اعايىنداردىڭ شەتتەگى قازاققا جانى اشىمايدى ەكەن-مىس...

وۋ، اعايىن، شىندىقتىڭ جۇزىنە تۋرا قاراپ، ءادىلىن، اقيقاتىن ايتار بولساق، تاۋەلسىزدىكتىڭ العاشقى جىلىندا-اق (1992!) ءسىز بەن ءبىز، ياعني، قازىرگە دەيىن وتانعا ورالىپ ۇلگەرگەن  1,5 ميلليونداي قانداستار كىسى ەلىندە كىساپىر كۇي كەشىپ جۇرگەن كەزىمىزدە:

قازاقستان بيلىگىن دۇنيەجۇزى قازاقتارىنىڭ قۇرىلتايىن وتكىزۋگە;

سول قۇرىلتايدىڭ شەشىمىمەن شەتەلدە تۇرىپ جاتقان اعايىنداردى وتانعا شاقىرىپ اكەلۋگە;

دۇنيەجۇزى قازاقتارىنىڭ قاۋىمداستىعىن قۇرۋعا;

قر «حالىقتىڭ كوشى-قون زاڭىن» ازىرلەتىپ، قابىلداتۋعا;

شەتەلدەردەن اتاجۇرتقا (قازاقستان) قونىس اۋدارۋشىلارعا ارنايى قارجى (كۆوتا) ءبولىپ، ولارعا لايىقتى ماتەريالدىق-مورالدىق كومەك بەرۋگە;

شەتەلدەردە ءومىر ءسۇرىپ جاتقان اعايىنداردىڭ مىڭداعان جاس ۇرپاقتارىن قازاقستاننان جوعارى ءبىلىم الۋعا، جانە وعان جىل سايىن ارنايى كۆوتا بولگىزۋگە;

شەتەلدەردەن كەلگەن اعايىنداردىڭ ىقتيارحات نەمەسە ازاماتتىق الۋىن جەڭىلدەتۋگە;

قانداس شارۋالارعا جايىلىمدىق، ەگىستىك جەر بەرۋگە;

قانداس كاسىپكەرلەرگە قولداۋ كورسەتۋگە;

شەتەلدەردە تۇرىپ جاتقان اعايىنداردىڭ قازاقستانعا كەلىپ-كەتۋىنە قۇجاتتىق (ۆيزالىق) جەڭىلدىك جاساۋعا كوندىرگەن، ۇسىنىستار بەرگەن، سول جولدا شىر-پىر بولىپ جۇگىرگەن استە بۇگىنگى داڭعوي پوپۋليستەر ەمەس!

كەرىسىنشە وسى قازاقستاندا «مىڭ ءولىپ، مىڭ تىرىلە» ءجۇرىپ، مىڭ سان زۇلماتتا قازاقتىعىن، باۋىرمالدىعىن، ەل مەن جەردى ساقتاپ قالعان جەرگىلىكتى باۋىرلارىمىز - قازاقتىڭ الاششىل ۇل-قىزدارى، زيالىلارى جانە ەل اعالارى، ۇكىمەت پەن پارلامەنت مۇشەلەرى بولاتىن!

اعايىندار، وتانعا العاشقىلاردىڭ ءبىرى بولىپ ورالعان، 30 جىل بويى قازاق كوشى-قونىنا قاتىستى ماسەلەلەردى قاداعالاپ، قاراپ كەلە جاتقان ازامات رەتىندە سىزدەرگە ايتارىم ءھام وتىنەرىم:

جەرگىلىكتى اعايىندارىمىزدىڭ، وسىندا تۋىپ وسكەن ەل اعالارىنىڭ، ۇلتشىل زيالى قاۋىم وكىلدەرىنىڭ بۇل باۋىرمالدىعىن ەش قاشان دا ەستەن شىعارماۋىمىز كەرەك!

قىسقاسى ءسىز بەن ءبىزدىڭ وتانعا ورالۋىمىزعا جاعداي جاساعان، قۇشاعىن اشىپ قارسى العان، ءالى دە بولسا ەل تاعدىرىنا، ۇلت بولاشاعىنا كەرەكتى وسى ۇلى ءىستى جالعاستىرۋدى جوسپارلاپ وتىرعان، استە  بۇگىنگى داڭعوي پوپۋليستەر ەمەس، تاعى دا سول ەل اعالارى، ۇلت زيالىلارى، قازاق بيلىگى ەكەنىن ۇمىتپاۋعا ءھام تۇسىنۋگە ءتيىسپىز.

ال سوڭعى كۇندەرى سول باياعى ءبىردى-ەكىلى ساۋاتسىز داڭعوي پوپۋليستەر تاعى دا ايعاي-اتتانعا باسىپ، ەلدى دۇرلىكتىرىپ، ۇپاي جيناۋدىڭ قامىنا كىرىسىپ كەتىپتى...

ماسەلە قر ۇكىمەتى (انىعىندا قر ەڭبەك جانە  قر ەڭبەك جانە حالىقتى الەۋمەتتىك قورعاۋ مينيسترلىگى) ازىرلەگەن «2023-2027 جىلدار ارالىعىندا قابىلداناتىن كوشى-قون تۋرالى جاڭا باعدارلاما» تۋرالى.

اتالعان باعدارلاماداعى «قانداستار بەلگىلەنگەن ايماققا قونىستانىپ، 5 جىل تۇرعاننان كەيىن ازاماتتىق بەرىلەدى» دەگەن ۇسىنىس، تۇپتەپ كەلگەندە ۇلتتىق قاۋىپسىزدىكتى ويلاۋدان تۋعان ستراتەگيالىق بايلام.

الايدا 5 جىل بويى ازاماتتىقسىز ءجۇرۋ - اعايىنداردىڭ كوپتەگەن تىرلىگىنە قولبايلاۋ بولاتىنى بەلگىلى. 5 جىل ىشىندە تۋعان ۇرپاق كىم بولادى؟ 5 جىل ىشىندە زەينەتكە شىققان اعايىنداردىڭ زەينەتاقىسى قالاي بولادى؟ سايلاۋ-سايلانۋ قۇقىعى قالاي بولادى؟ ت.س.س. ماسەلەلەردى جەتكىلىكتى تالقىلاۋ، اقىلداسۋ كەرەك-اق.

دۇنيەجۇزى قازاقتارى قاۋىمداستىعىنىڭ رەسمي وكىلى، قانداستار ءۇشىن جانىن سالىپ، شىر-پىر بولىپ جۇرگەن قازاقتىڭ ايالى ۇلتشىل قىزى قارلىعاش بايباتشاقىزىنىڭ حابارلاۋىنشا، قاۋىمداستىق توراعاسىنىڭ ورىنباسارى، مەملەكەت جانە قوعام قايراتكەرى، مەملەكەتشىل تۇلعا زاۋىتبەك قاۋىسبەكۇلى اتالعان ماسەلەگە ۇلكەن ءمان بەرىپ، قالاي دا دۇرىس شەشىم شىعارتۋعا  بىلەك سىبانا كىرىسىپ كەتىپتى.

ىسكە ءسات دەيمىز!

دۇكەن ءماسىمحانۇلى

Abai.kz