قويناۋى بايلىققا تولى كەندى التايدا قولا تابىلمادى دەگەن نە سۇمدىق؟! باتىر بابالارىمىزعا سوعىلعان تاس مۇسىندەردى كورگەندە وسىدان بوتەن وي كەلمەيدى ەكەن ساناعا. وسكەمەننىڭ قاق ورتاسىندا كەۋدەسىنەن «كەسىلىپ» قامىعىپ تۇرعان قاسىم قايسەنوۆتىڭ ءبيۋستى دە، تارباعاتاي اۋدانى بوعاس جوتاسىنداعى قارعىعان اتتىڭ ۇستىندە قالپاقتاي-اق بولىپ وتىرعان قابانباي باتىردىڭ ەسكەرتكىشى دە مەنىڭ بۇل پىكىرىمدى بەكىتە تۇسپەك...

قويناۋى بايلىققا تولى كەندى التايدا قولا تابىلمادى دەگەن نە سۇمدىق؟! باتىر بابالارىمىزعا سوعىلعان تاس مۇسىندەردى كورگەندە وسىدان بوتەن وي كەلمەيدى ەكەن ساناعا. وسكەمەننىڭ قاق ورتاسىندا كەۋدەسىنەن «كەسىلىپ» قامىعىپ تۇرعان قاسىم قايسەنوۆتىڭ ءبيۋستى دە، تارباعاتاي اۋدانى بوعاس جوتاسىنداعى قارعىعان اتتىڭ ۇستىندە قالپاقتاي-اق بولىپ وتىرعان قابانباي باتىردىڭ ەسكەرتكىشى دە مەنىڭ بۇل پىكىرىمدى بەكىتە تۇسپەك...

ەكىنشى دۇنيەجۇزىلىك سوعىستىڭ جەڭىسپەن اياقتالعان 65 جىلدىق مەرەيتويىنا ورايلاستىرىپ 2010 جىلدىڭ مامىر ايىندا شىعىس قازاقستان وبلىسىنىڭ ورتالىعى - وسكەمەن قالاسىنداعى كيروۆ كوشەسى مەن جەڭىس داڭعىلىنىڭ تۇيىسكەن تۇسىنا اتى اڭىزعا اينالعان پارتيزان، جازۋشى، حالىق قاھارمانى قاسىم قايسەنوۆكە قولادان بيۋست قويىلعان بولاتىن. قالالىق اكىمدىك ءبولىپ بەرگەن جەر تەلىمىنە دە، كوزگە قوراشتاۋ كورىنەتىن «شولاق» مۇسىنگە دە العاشقىدا كوڭىلىمىز تولماعانى راس. بىراق «جوقتىڭ قاسىندا وسىعان دا شۇكىر» دەگەن قازاقى تاۋبەشىلىگىمىزگە سالىپ ءھام جەرگىلىكتى بيلىك وكىلدەرىنىڭ ءدامدى ۋادەسىنە نانىپ ءىستىڭ سوڭىن جاقسىلىققا جورىعان ەدىك. دالىرەك ايتقاندا، بيلىكتەگىلەر قايسەنوۆ ءبيۋستىنىڭ جانىنداعى جانارماي قۇياتىن جەكەمەنشىك بەكەتتى باسقا جاققا كوشىرتىپ، ول جەرگە شاعىن اللەيا اشىلاتىنىن سۇيىنشىلەگەن. ءبىر وكىنىشتىسى بۇگىندە ول ورىندالمادى. ال قالا تۇرعىندارى مەن كەلىمدى-كەتىمدى قوناقتار بولسا، مۇقىم ۋكراين جۇرتى ءپىر تۇتقان قاس باتىردىڭ قالقايعان مۇسىنىنە مۇسىركەي قاراپ، گۇل شوقتارىن قويعاننان باسقا قولدان كەلەر قايرانى جوق.

ايتپاقشى، كايسەنوۆ تۇلەپ ۇشقان وسكەمەن وڭىرىنەن تولەگەن توقتاروۆ پەن ىزعۇتتى ايتىقوۆ سىندى تاعى ەكى باتىر شىققان. بۇل كۇندە ماسكەۋدى قورعاعان ەڭ العاشقى كەڭەس وداعىنىڭ باتىرلارىنىڭ ءبىرى تولەگەن توقتاروۆقا دا، جاۋ دزوتىن كەۋدەسىمەن جاپقان ىزعۇتتى ايتىقوۆقا دا وسكەمەندە ەسكەرتكىش تۇگىلى بيۋست تە بۇيىرماي تۇر.

بوعاستىڭ ءبىر بيىگىنە بارىپ ورنىققان حان باتىرى قابانبايدىڭ ەسكەرتكىشىن دە ەستى ادامنىڭ قابىلداي قويۋى ەكىتالاي. ءيا، تابانىنداعى تۇعىر تاسى بيىك، اسپانعا شاپشىعان ارعىماعى كەسەك دەمەسەڭىز، سىرت كوزگە ۇستىندەگى ادامى جوڭعار مەن قالماقتى لاقشا باقىرتقان باھادۇردەن گورى ەندى عانا نايزا ۇستاپ ۇيرەنىپ جۇرگەن بوزبالاعا ۇقسايتىنداي. الدە، قىتايلىق شەبەرلەر دارابوزدىڭ سارىاۋىز شاعىنداعى بەينەسىن سومدادى ما ەكەن؟ بىراق ورىنداۋشى تاپسىرىس بەرۋشىنىڭ تالابىنان قالاي اتتاپ كەتسىن. دەمەك گاپ وزىمىزدە. قىتايلىق دەگەننەن شىعادى عوي، بىزدەگى ەسكەرتكىشتەردىڭ دەنى سولاردىڭ تۋىندىلارى. دۇرىسى - «قىتايسكي» تاۋارلار.

- بۇل بۇكىل رەسپۋبليكادا بار ماسەلە. بۇدان بىلاي بارلىق ەسكەرتكىشتەر مەن مۇسىندەر مەملەكەتتىك ساراپتامادان ءوتىپ بارىپ قويىلسىن دەگەن باستاما كوتەرىلۋدە. ءبىز وعان قوسىلامىز. بولاشاقتا ارنايى كوميسسيا ولاردىڭ قويىلۋىنا رۇقسات بەرەتىن بولادى، - دەيدى شىعىس قازاقستان وبلىستىق ساۋلەت جانە قالا قۇرىلىسى باسقارماسىنىڭ باستىعى امانباي نۇركەنوۆ.

جاقىندا بىلدىك، وسكەمەن قالاسىنا كىرە بەرىس تۇستاعى بيىكتەۋ توبەگە قاراكەرەي قابانبايدىڭ ەسكەرتكىشىن ورناتقالى جاتىر ەكەن. جەرگىلىكتى بيلىكتىڭ ايتۋىنشا، ءمۇسىن الماتىدا جاسالىپتى. جاعىمدى جاڭالىقتى قۇلاعىمىز شالعان ساتتە-اق قۋانىپ قالعانىمىزبەن ارتىنشا تۇيسىگىمىزدىڭ تۇكپىرىنەن «قابانبايدىڭ ءمۇسىنى قانداي بولادى ەكەن؟» دەگەن سۇراقتىڭ سۋماڭ ەتكەنىن نەسىن جاسىرايىق. ونسىز دا باتىر بابالارىمىزدىڭ ارۋاعىن قالاي رازى قىلىپ جۇرگەنىمىز بەلگىلى عوي...

Abai.kz